Zakariya 4 - BIBELE Mahungu Lamanene

Xivono xa xitlhoma-timboni lexi endliweke hi nsuku

¹ Ntsumi leyi a yi vulavula na mina, yi tlhela yi ta yi ta ndzi hlakahla, ku fana ni loko ku pfuxiwa munhu evurhongweni.

² Kutani yi ndzi vutisa yi ku: “Xana u vona yini xana?” Mina ndzi ku: “Ndzi vona xitlhoma-timboni lexi endliweke hi nsuku ntsena; ehenhla ka xona ku ni nkambana wa mafurha, ni timboni ta 7 leti tlhomiweke enon'weni wa nkambana; kutani rivoni rin'wana ni rin'wana na rona ri ni milomo ya 7.

³ Ematlhelo ka xitlhoma-timboni, ku ni mirhi mimbirhi ya mitlhwari, wun'wana exineneni, wun'wana eximatsini.”

⁴ Hiloko ndzi vutisa ntsumi leyi a yi vulavula na mina ndzi ku: “We N'wini wanga, xana swilo leswi swi vula yini xana?”

⁵ Kutani yona yi ndzi hlamula yi ku: “Xana a wu swi tivi leswaku swilo leswi swi vula yini ke?” Mina ndzi ku: “We N'wini wanga, a ndzi swi tivi.”

Switshembiso swa Xikwembu eka Zerubabele

⁶ Hiloko ntsumi yi ndzi lerisa ku ya byela Zerubabele rito ra HOSI Xikwembu leri nge: “Entirhweni wa wena, a wu nga humeleli hi vunhenha kumbe hi ku tirhisa matimba, kambe u ta humelela ntsena hi ku pfuniwa hi Moya wa mina. Ndzi vula sweswo, mina HOSI ya matimba hinkwawo.

⁷ “We nhulu leyikulu ya maribye, wo va yini? Emahlweni ka Zerubabele, u ta hundzuka rivala, kutani yena ú ta humesa ribye ra yinhla, ntshungu wu ri karhi wu huwelela wu ku: ‘Ribye leri a ri katekisiwe, a ri katekisiwe!’ ”

⁸ Rito ra HOSI Xikwembu ri tlhele ri ta ka mina, ri ku:

⁹ “Zerubabele hi yena la nga veka masungulo ya Tempele leyi, kutani wa ha ri yena loyi a nga ta yi aka yi hela.” Enkarhini wolowo mi ta tiva leswaku HOSI ya matimba hinkwawo, hi yona yi ndzi rhumeke eka n'wina.

¹⁰ Xana i vamani lava soleke ntirhonyana lowutsongo wa masungulo xana? A va tsake sweswi, loko va vona Zerubabele a khomile ribye lero hlawuleka ngopfu. Ntsumi yi tlhela yi ku: “Timboni ta 7 i mahlo ya HOSI Xikwembu, lama valangaka misava hinkwayo.”

Nhlamuselo ya xivono xa xitlhoma-timboni

¹¹ Kutani ndzi ku ka yena: “Xana mirhi mimbirhi leyi ya mitlhwari, leyi nga matlhelo ka xitlhoma-timboni exineneni ni le ximatsini, yi vula yini xana?”

¹² Ndzi tlhela ndzi vutisa, ndzi ku: “Xana marhavi lawa mambirhi ya mitlhwari, lama chelaka mafurha ya wona layo saseka enkambaneni hi tipompo timbirhi ta nsuku, ma vula yini xana?”

¹³ Ntsumi yi ndzi hlamula yi ku: “Xana a wu swi tivi leswaku swilo leswi swi vula yini ke?” Mina ndzi ku: “We N'wini wanga, a ndzi swi tivi.”

¹⁴ Kutani ntsumi yi ndzi hlamusela yi ku: “Leswi swi komba vavanuna vambirhi, lava hlawuriweke ku tisa mafurha enkambaneni, va ta tirhela HOSI Xikwembu xa misava hinkwayo.”