Zakariya 3 - BIBELE Mahungu Lamanene

Muprofeta Zakariya a kombiwa Muprista Lonkulu hi xivono

¹ HOSI Xikwembu xi ndzi komba Yoxuwa muprista lonkulu a yimile emahlweni ka ntsumi ya xona, xi ndzi komba na Sathana loyi a a yimile hi tlhelo ra xinene ra Yoxuwa, a tiyimisela ku n'wi mangalela.

² Kutani ntsumi ya HOSI Xikwembu yi ku ka Sathana: “We Sathana, HOSI Xikwembu lexi hlawuleke Yerusalema, a xi ku laye xi ku pfala nomo. Xana Yoxuwa a nga fani ni rihunyi leri susiweke endzilweni xana?”

³ Yoxuwa a a yimile emahlweni ka ntsumi, a ambarile swiambalo swa thyaka.

⁴ Kutani ntsumi yi byela malandza ya yona yi ku: “N'wi hluvuleni swiambalo leswi swa thyaka.” Kutani yi ku ka Yoxuwa: “Vona, ndzi susile nandzu wa wena, kutani sweswi ndzi ta ku ambexa swiambalo swa nkhuvo.”

⁵ Ntsumi yi engeta yi ku: “N'wi ambexeni xihuku xo basa enhlokweni.” Kutani va n'wi ambexa xona, va n'wi ambexa ni swiambalo leswintshwa, ntsumi ya HOSI yi ri karhi yi swi vona.

⁶ Kutani ntsumi ya HOSI yi tshembisa Yoxuwa yi ku ka yena:

⁷ “HOSI ya matimba hinkwawo yi vurisa sweswo yi ri: “ ‘Loko u famba etindleleni ta mina, ni loko u hlayisa swileriso swa mina, u ta va muhlayisi wa Tempele ya mina, u langutela ni rivala ra yona, kutani ndzi ta ku nyika xiyimo xo fana ni xa lava va ndzi tirhelaka kwala.’ ”

Xikwembu xi ta rhuma nandza wa xona

⁸ HOSI Xikwembu xi ri: “We Yoxuwa muprista lonkulu, yingisa! Yingisani na n'wina vaprista-kulobye lava mi tshameke na yena: Hakunene, mi vanhu lava hlolaka leswinene; vonani, ndzi ta mi rhumela nandza wa mina loyi va nge i Hluke.

⁹ Emahlweni ka wena Yoxuwa, ndzi ta veka ribye leri nga ni matlhelo ya 7; ehenhla ka ribye rero, ndzi ta kevetlela marito, kutani ndzi ta susa nandzu wa tiko leri hi siku rin'we ntsena. Ndzi vurisa sweswo, mina HOSI ya matimba hinkwawo.

¹⁰ “Esikwini rolero, mi ta rhambana hinkwenu, mi titshamela emindzhutini ya mirhi ya n'wina ya vhinya ni ya minkuwa. Ndzi vurisa sweswo mina HOSI ya matimba hinkwawo.”