Zakariya 2 - BIBELE Mahungu Lamanene

Xivono xa ngoti ya ku pima ha yona

¹ Ndzi tlakusa mahlo ya mina, kutani ndzi vona wanuna loyi a a khomile ngoti yo pima ha yona.

² Kutani ndzi ku ka yena: “Xana u ya kwihi ke?” A ndzi hlamula a ku: “Ndzi ya eku pimeni ka muti wa Yerusalema, ndzi ta vona leswaku wu anamile ku fika kwihi, naswona wu lehile ku fika kwihi.”

³ Kutani ntsumi leyi a yi vulavula na mina, yi ta kusuhi na mina, yi hlanganisiwa hi ntsumi yin'wana.

⁴ Kutani ntsumi leyi a yi vulavula na mina yi lerisa leyin'wana yi ku: “Tsutsuma u ya byela jaha leri khomeke ngoti u ku: ‘Muti wa Yerusalema wu ta tshama wu nga ri na rirhangu, hikuva vaaki va wona ni swifuwo leswi nga ta va eka wona, swi ta va swi tele ngopfu.

⁵ HOSI Xikwembu xi vurisa sweswo xi ri: Ndzi ta va rirhangu ra ndzilo leri nga ta rhendzela muti wa Yerusalema, kutani ndzi ta twakala exikarhi ka wona.’ ”

Xikwembu xi vitana lava nga vukhumbini

⁶ HOSI Xikwembu xi vurisa sweswo xi ri: “Pfukani! Pfukani! Humani ematikweni ya le n'walungwini hi ku tsutsuma; hambileswi a ndzi mi hangalaserile ematlhelweni hinkwawo ya misava, vuyani! Ndzi vurisa sweswo mina HOSI.

⁷ N'wina lava mi tshamaka exikarhi ka va le Babilona, pfukani mi vuyela eSiyoni!”

⁸ HOSI Xikwembu xa matimba hinkwawo, lexi xi ndzi rhumeke ndzi ri ni ku dzuneka ka xona, xi vurisa sweswo ehenhla ka matiko lawa ya mi xanisaka, xi ri: “Lava va mi boxaka timbanga, swi fana ni loko va ndzi dlonyola mina HOSI.

⁹ Vonani, ndzi ta tlakusa voko ra mina ehenhla ka vona ndzi va ba, kutani va ta tekeriwa swilo swa vona hi lava a va ri mahlonga ya vona.” Enkarhini wolowo mi ta swi tiva leswaku HOSI ya matimba hinkwawo, hi yona leyi yi ndzi rhumeke.

¹⁰ HOSI Xikwembu xi vurisa sweswo xi ri: “N'wina vaaki va Yerusalema, banani nkulungwana mi tsaka, hikuva vonani, ndzi ta ta ndzi ta aka exikarhi ka n'wina.

¹¹ Hi siku rolero, vanhu va matiko layo tala va ta ndzi namarhela mina HOSI, kutani va ta endla tiko ra mina va aka exikarhi ka n'wina!” Enkarhini wolowo mi ta swi tiva leswaku HOSI ya matimba hinkwawo, hi yona yi ndzi rhumeke eka n'wina.

¹² Va le Yuda va ta fumiwa hi HOSI Xikwembu, va va ndzhaka ya xona etikweni lero hlawuleka, kutani xona xi ta tlhela xi tihlawulela muti wa Yerusalema.

¹³ N'wina swivumbiwa hinkwaswo miyelani emahlweni ka HOSI Xikwembu, hikuva xi le kusuhi ni ku tikomba xi huma evutshan'wini bya xona lebyo hlawuleka.