Zakariya 13 - BIBELE Mahungu Lamanene

¹ “Hi siku rero ku ta baleka xihlovo lexi xi nga ta basisa vatukulu va Davhida ni vaaki va Yerusalema, xi susa swidyoho swa vona ni swilo swa vona swa manyala.”

Xikwembu xi ta herisa vukhongeri bya hava

² HOSI Xikwembu xi vurisa sweswo xi ri: “Hi siku rero, ndzi ta susa mavito ya swikwembu swa hava etikweni, leswaku swi nga ha tsundzukiwi. Naswona ndzi ta hlongola lava tivulaka vaprofeta, va suka laha tikweni ni mimoya ya vona ya thyaka.

³ Kutani loko un'wana o tlhela a humelela a tiendla muprofeta, vatswari va yena va ta n'wi byela va ku: ‘A wu nga hanyi, hikuva u vhumbha mavunwa u ku u rhumiwile hi Xikwembu!’ Kutani loko a ri karhi a vhumbha, vatswari va yena va ta n'wi tlhava a fa.

⁴ Hikokwalaho vanhu va ta chava ku tikurisa hi swivono swa vona, kumbe ku tiendla vaprofeta; va ta chava ni ku xisa van'wana hi ku ambala swiambalo swa vaprofeta leswi lukiweke hi voya.

⁵ Kambe va ta vula va ku: ‘A ndzi muprofeta, ndzo va murimi ntsena, naswona nsimu ya mina i ndzhaka leyi ndzi yi kumeke ndza ha ri lontshwa.’

⁶ Kutani loko un'wana a n'wi vutisa a ku: ‘Xana timbanga leti u nga na tona exifuveni ti vange hi yini?’ yena ú ta hlamula a ku: ‘Ndzi boxeteriwe hi vanghana va mina emutini wa vona.’ ”

⁷ HOSI ya matimba hinkwawo yi ri: “We fumu, pfuka u lwa ni murisi wa mina, lwana na yena yaloyi a nga yima kusuhi na mina. Bana murisi leswaku tinyimpfu ti ta hangalaka; lavatsongo hi mina ndzi nga ta va ba!

⁸ Mina HOSI ndzi ri: Etikweni hinkwaro laha ku nga ni vanhu vanharhu, vambirhi eka vona va ta dlayiwa, lowa vunharhu ú ta tshikiwa a hanya.

⁹ Lava va nga ta sala, ndzi ta va kambela, ndzi va basisa hi ndzilo, kukota loko va basisa nsuku kumbe silivhere. Va ta ndzi huwelela, kutani mina ndzi ta va hlamula ndzi ku: ‘Mi vanhu va mina!’ Vona va ta vula va ku: ‘We HOSI, u Xikwembu xa hina!’ ”