Yuwele 2 - BIBELE Mahungu Lamanene

Siku ra HOSI ra chavisa

¹ Banani mhalamhala eSiyoni, yi mbvungunyiseni entshaveni leyo hlawuleka ya HOSI! Vaaki hinkwavo va tiko a va rhurhumele, hikuva siku ra HOSI ra ta, ri kwala kusuhi.

² Siku ra kona ri to va ra munyama, ri to khwìxìì! ri ta va siku ra mapapa ni hunguva! Ku ni vanhu lavo tala va matimba, lava khubumeteke tintshava ku fana ni xinyami; vo fana na vona a va si tshama va voniwa, naswona endzhaku ka vona a ku nga ha voniwi vo tano, hilaha ku nga heriki.

³ Emahlweni ka vona va rhangisile ndzilo lowu herisaka, kasi endzhaku ka vona ku ni langavi leri vuvumelaka. Loko va nga si fika, tiko a ri fana ni ntanga wa Edeni, kambe loko va hundzile, ri sala ri fana ni mananga lama omeke swinene, a ku na nchumu lexi kotaka ku va balekela.

⁴ Va vonaka onge i tihanci, va tsutsuma ku fana ni tihanci ta nyimpi.

⁵ Loko va tlula-tlula etinhlohlorhini ta tintshava, va ni huwa yo fana ni ya makalichi, ni ya ku baleka ka tinhlahle ta ndzilo lowu hisaka byanyi bya tlhongwe; va fana ni vuthu ra matimba leri nga jamela ku lwa nyimpi.

⁶ Loko va fika, vanhu va hela matimba, tinghohe hinkwato ta basuluka.

⁷ Va nghena hi ku tsutsuma ku fana ni tinhenha, va khandziya makhumbi tanihi masocha. Un'wana ni un'wana ú ta hi ndlela ya yena, a ku na loyi a hambukaka eka yona.

⁸ A va susumetani, un'wana ni un'wana ú kongoma emahlweni; va vhoya exikarhi ka matlhari; a va yimisiwi hi nchumu!

⁹ Va dumela muti va nghena, va tsutsuma-tsutsuma ehenhla ka rirhangu ra wona; va khandziya etindlwini, va nghena hi mafasitere kukota makhamba.

¹⁰ Loko va fika, misava ya tsekatseka, matilo wona ma rhurhumela. Dyambu ni n'weti swi hundzuka munyama, tinyeleti ta timeka.

¹¹ Emahlweni ka mavuthu ya xona, HOSI Xikwembu xo huwelela kunene, hikuva vandla ra xona ri kurile ku tlula mpimo, ri ni matimba, vandla leri ri endlaka swileriso swa xona. Siku ra HOSI i rikulu, ra chavisa; xana ri ta tiyeriwa hi mani xana?

Tiko ri tsundzuxiwa ku hundzuka

¹² HOSI Xikwembu xi vula sweswo xi ri: “Hambi ku ri sweswi, mi nga ha vuyela eka mina hi timbilu ta n'wina hinkwato, mi titsona, mi rila mi khavaxela.”

¹³ Handzulani timbilu ta n'wina, ku nga ri swiambalo. Tlhelelani eka HOSI Xikwembu xa n'wina, hikuva xa tsetselela, xi twela vusiwana, xi hlwela ku kariha, xi tele tintswalo, xa tlhela emakungwini ya xona ya ku twisa vanhu ku vava.

¹⁴ A hi tivi, kumbexana Xikwembu xi nga tlhela emakungwini ya xona, xi mi avela minkateko ya xona, xi mi nyika mapa ni vhinyo ya magandzelo, mi swi humesela yona HOSI, Xikwembu xa n'wina.

¹⁵ Banani mhalamhala eSiyoni; tilulamiseleni siku ra ku titsona swakudya, mi vitana nhlengeletano leyo hlawuleka.

¹⁶ Hlengeletani ntshungu mi wu basisa, vitanani vakulukumba, mi hlengeleta ni vana, hambi swi ri swihlangi swa le makatleni. Jaha lera ha ku tekaka, ri humeseni endlwini ya rona, hlomisa na rona, a ri hume.

¹⁷ Vaprista, vona malandza ya HOSI Xikwembu, a va nghene exivaveni xa Tempele, va ya rila kusuhi ni alitari; a va vule va ku: “We HOSI, hi vanhu va wena ni ndzhaka ya wena, hi tsetselele, u nga tshuki u hi sandzisa ni ku hi endla xihlekiso eka vamatiko. Vanhu vambe va nga tshuki va vula va ku: ‘Xikwembu xa vona xi kwihi ke?’ ”

Xikwembu xi tsetselela tiko ra xona

¹⁸ Kutani HOSI Xikwembu xi vavisekela tiko ra xona, xi twela vanhu va xona evusiwana.

¹⁹ HOSI Xikwembu xi hlamula vanhu va xona, xi ku: “Vonani, ndzi ta mi nyika mavele ni vhinyo ni mafurha, mi ta dya mi xurha. A ndzi nga ha mi vangeli ku sandziwa hi vamatiko.

²⁰ “Lava taka hi le n'walungwini, ndzi ta va hlongola va ya kule na n'wina, ndzi ta va yisa emananga, etikweni leri omeke swinene. Lava rhangeke emahlweni, ndzi ta va byisela eLwandle-ra-ku-fa, lava saleke endzhaku ka vona, ndzi ta va nghenisa eLwandle-ra-Mediteraniya. Mintsumbu ya vona yi ta nun'hwa yi ku ngù-ngù-ngù, hikuva va mi hoxele ngopfu.

²¹ “N'wina masimu, mi nga chavi, tsakani, mi yimbelela, hikuva mina HOSI ndzi endlile swilo leswi hlamarisaka.

²² Mi nga chavi n'wina swiharhi, hikuva madyelo enhoveni ma hlukile; mirhi yi tswarile mihandzu, minkuwa ni vhinya swa nemba hi mihandzu.

²³ N'wina vanhu va Siyoni, tsakani, yimbelelani mi dzunisa HOSI Xikwembu xa n'wina, hikuva xi mi niserile mpfula yo ringana, xi lo mi chululela yona kunene; ku fana ni khale, mpfula leyo sungula yi nile, hambi yi ri leyo tsema nguva na yona yi nile.

²⁴ “Swivuya swi ta tala hi mavele, swibya swi ta khapa hi vhinyo ni mafurha.

²⁵ Ndzi ta mi rihela malembe lawa tinjiya ta magerere ti mi karhateke ha wona, ni xijajani, ni mherhavunguvungu, ni xigon'wani, ri nga rona vuthu ra mina lerikulu, leri a ndzi mi rhumerile rona.

²⁶ “Swakudya, mi ta dya mi tlhela mi nga ha swi lavi, kutani mi ta dzunisa vito ra mina HOSI Xikwembu xa n'wina, mina ndzi mi endleleke swilo swo hlamarisa; kutani vanhu va mina a va nga ha tlheli va khomiwa hi tingana, ni siku ni rin'we.

²⁷ Mi ta swi tiva leswaku ndzi kona exikarhi ka Vaisraele, ni leswaku mina HOSI, ndzi Xikwembu xa n'wina; a ku na xin'wana ehandle ka mina. Hakunene vanhu va mina a va nga ha tlheli va khomiwa hi tingana, ni siku ni rin'we.”

Xikwembu xi ta chululela vanhu emoya wa xona

²⁸ “Endzhaku ka sweswo, nkarhi wu ta fika lowu ndzi nga ta chela moya wa mina ehenhla ka vanhu hinkwavo. Vana va n'wina va xinuna ni va xisati va ta vhumbha, lava dyuhaleke va n'wina va ta lorha milorho, vana va n'wina va majaha va ta vona swivono.

²⁹ Hambi ma ri malandza ya xinuna ni ya xisati, eminkarhini yeleyo, ndzi ta ma chela moya wa mina.

³⁰ “Ndzi ta endla swihlamariso etilweni ni la misaveni: Ku ta vonaka ngati, ni ndzilo, ni papa ra musi.

³¹ Dyambu ri ta fihliwa hi munyama, ni n'weti wu ta tshwuka ku fana ni ngati, siku lerikulu ro chavisa ra mina ri nga si fika.

³² Enkarhini wolowo, un'wana ni un'wana la nga ta huwelela eka mina, ú ta ponisiwa. Entshaveni ya Siyoni ni le mutini wa Yerusalema, va kona lava nga ta pona, hilaha ndzi vuleke hakona mina HOSI. Kutani eka lava nga ta sala, ndzi ta hlawula van'wana.”