Yoxuwa 7 - BIBELE Mahungu Lamanene

Ta ku dyoha ka Akani

¹ Vaisraele va tlurile nawu hi tlhelo ra swilo leswi nyiketiweke leswaku swi herisiwa, hikuva Akani n'wana Karimi wa Zabidi wa Zera, wa nyimba ya ka Yuda, ú pamburile swilo swin'wana leswi nyiketiweke leswaku swi herisiwa. Hikwalaho ka swona, HOSI Xikwembu xi hlundzukela Vaisraele.

² Loko va ri mutini wa Yeriko, Yoxuwa a rhuma vavanuna va ya mutini wa Ayi, lowu nga kusuhi ni muti wa Beta-Avene, hi tlhelo ra le vuxeni bya muti wa Betele, a ku ka vona: “Tlhandlukani mi ya valanga matshamelo ya muti.” Kutani va tlhandluka va famba va ya valanga muti wa Ayi.

³ Loko va vuya, va fika va byela Yoxuwa va ku: “U nga kali u rhumela Vaisraele hinkwavo, kambe u ngo rhumela ntsena vavanuna va kwalomu ka 2 000 kumbe 3 000, va tlhandluka va ya hlasela muti wa Ayi; u nga tshiki vanhu hinkwavo va tikarhata va tlhandluka va ya le Ayi, hikuva muti lowu a wu na vanhu vo tala.”

⁴ Kutani vavanuna va kwalomu ka 3 000 va tlhandlukela kona, kambe va ya vuya hi ku tsutsuma, va chava vavanuna va muti wa Ayi.

⁵ Vavanuna va muti wa Ayi va hlongorisile Vaisraele ku sukela enyangweni ya muti, ku kondza va ya fika eXebarimi, va dlaya Vaisraele va kwalomu ka 36 loko va ri karhi va rhelela. Kutani Vaisraele va tshuka swinene, va hela ni matimba.

⁶ Kutani Yoxuwa ni vakulukumba va Israele va handzulela swiambalo swa vona, va ticheletela ritshuri etinhlokweni, va wela hansi hi mimombo emahlweni ka Areka ya HOSI Xikwembu, va etlela kona dyambu ri kondza ri pela.

⁷ Kutani Yoxuwa a ku: “We Hosi N'wini wa hina, hikwalaho ka yini u hi perisile nambu wa Yordani, u ta hi nyiketa emavokweni ya Vaamori leswaku va hi herisa xana? Leswi swi tlula hi loko a hi lo titshamela entsungeni wa nambu wa Yordani!

⁸ We N'wini wanga, xana ndzi nga vula yini sweswi, hikuva Vaisraele va suke va tsutsuma va chava valala va vona!

⁹ Vakanana ni vaaki hinkwavo va tiko va ta yi twa mhaka leyi, kutani va ta hi hlasela va hi herisela makumu; kutani xana wena u ta endla yini hi vito ra wena lerikulu xana?”

¹⁰ Kutani HOSI Xikwembu xi ku ka Yoxuwa: “Pfuka! Hikwalaho ka yini u tiwisela ehansi hi mombo xana?

¹¹ Vaisraele va dyohile; va tshovile ntwanano wa mina lowu ndzi va leriseke wona; va pamburile swilo swin'wana eka leswi swi nyiketiweke leswaku swi herisiwa; va yivile va tlhela va hemba; swilo leswi va swi vekile exikarhi ka tinhundzu ta vona.

¹² Hikokwalaho, Vaisraele va nga ka va nga swi koti ku hlula valala va vona; va tsutsuma va chava valala va vona hikuva na vona Vaisraele va fana ni swilo leswi nyiketiweke leswaku swi herisiwa. Mina a ndzi nga vi na n'wina, loko mi nga si herisa swilo leswi nga xikarhi ka n'wina leswi nyiketiweke leswaku swi herisiwa.

¹³ Suka u yima u ya basisa Vaisraele; u ta va byela ku tibasisela siku ra mundzuku, hikuva mina HOSI Xikwembu xa vona ndzi ni rito eka vona leri nge: ‘Exikarhi ka n'wina Vaisraele ku ni swilo leswi nyiketiweke leswaku swi herisiwa, kutani valala va n'wina mi nga ka mi nga va hluli, loko swilo leswi swi nyiketiweke leswaku swi herisiwa, mi nga si swi susa exikarhi ka n'wina.’

¹⁴ Mundzuku nimpundzu, mi ta xaxametiwa hi tinyimba ta ka n'wina, kutani nyimba leyi mina Hosi ndzi nga ta yi hlawula yi ta xaxamela hi mindyangu ya yona; kutani ndyangu lowu ndzi nga ta wu hlawula, wu ta xaxamela hi tindlu ta wona; kutani vanhu va yindlu leyi ndzi nga ta yi hlawula, va ta xaxamela ha un'we-un'we.

¹⁵ Munhu loyi a nga ta kumiwa a ri ni swilo leswi nyiketiweke leswaku swi herisiwa, ú ta hisiwa hi ndzilo, yena ni hinkwaswo leswi a nga na swona, hikuva ú ta va a tshovile ntwanano wa mina HOSI, naswona ú ta va a endlile mhaka leyi khomisaka tingana exikarhi ka Vaisraele.”

¹⁶ Kutani Yoxuwa a pfuka nimpundzu swinene, a xaxameta Vaisraele hi tinyimba ta vona, kutani ku hlawuriwa nyimba ya ka Yuda;

¹⁷ hiloko a xaxameta mindyangu ya ka Yuda, ku hlawuriwa ndyangu wa ka Zera, kutani a xaxameta va ndyangu wa ka Zera, ku hlawuriwa yindlu ya ka Zabidi;

¹⁸ hiloko a xaxameta va yindlu ya ka Zabidi ha un'we-un'we, kutani ku hlawuriwa Akani n'wana Karimi wa Zabidi wa Zera, wa nyimba ya ka Yuda.

¹⁹ Kutani Yoxuwa a ku ka Akani: “N'wananga, dzunisa HOSI Xikwembu xa Israele, u twarisa vito ra xona: Sweswi, ndzi byele leswi u swi endleke; u nga tshuki u ndzi fihlela nchumu.”

²⁰ Akani a hlamula a ku: “Ku vula ntiyiso, ndzi dyohile emahlweni ka HOSI Xikwembu xa Israele. Leswi ndzi swi endleke hi leswi:

²¹ Exikarhi ka swilo leswi a hi swi phanghile, ndzi vonile xiambalo xo saseka lexi humaka eXinara, ni silivhere yo tika 2,4 kg, ni gadi ra nsuku ro tika 600 g, kutani ndzi swi navela, hiloko ndzi swi teka; sweswi swilo leswi ndzi swi celerile entsongeni wa mina, ehansi ka swona ndzi rhangisile silivhere.”

²² Kutani Yoxuwa a rhuma vanhu va tsutsuma va ya ntsongeni wa Akani; kunene va fika va swi kuma swi celeriwile entsongeni wa yena, silivhere yi rhangisiwile ehansi ka swona.

²³ Kutani va swi humesa va swi yisa eka Yoxuwa ni Vaisraele hinkwavo, va fika va swi fumba emahlweni ka HOSI Xikwembu.

²⁴ Kutani Yoxuwa ni Vaisraele lava a a ri na vona hinkwavo va teka Akani n'wana Zera, va teka ni silivhere, ni xiambalo, ni gadi ra nsuku, ni vana va yena va xinuna ni va xisati, ni tihomu ta yena, ni timbhongolo, ni tinyimpfu, ni ntsonga wa yena, ni swilo hinkwaswo leswi a a ri na swona, va famba na swona va ya eka Nkova wa Akora.

²⁵ Kutani Yoxuwa a ku ka Akani: “Hikwalaho ka yini u hi vangele khombo xana? Namuntlha HOSI Xikwembu xi ta tisa khombo ehenhla ka wena.” Hiloko Vaisraele hinkwavo va khandla Akani hi maribye a fa; va hisa swilo swa yena hinkwaswo, va khandletela ni va ka vona va fa.

²⁶ Vaisraele va fumba maribye ehenhla ka ntsumbu wa Akani ma endla nhulu leyikulu leyi nga kona ni namuntlha; kutani vukari bya HOSI Xikwembu byi vohla. Hikwalaho, ndhawu leyi ni namuntlha ya ha vuriwa Nkova wa Akora (hileswaku “Nkova-wa-Khombo”).