Yoxuwa 21 - BIBELE Mahungu Lamanene

Miti ya va ka Levhi

¹ Kutani varhangeri va mindyangu ya va ka Levhi va ya eka muprista Eliyazara na Yoxuwa n'wana Nuni ni varhangeri va tinyimba ta Vaisraele,

² emutini wa Xilo etikweni ra Kanana, va fika va ku ka vona: “HOSI Xikwembu xi lerisile leswaku hina hi nyikiwa miti yo tshama eka yona, ni madyelo ya yona ya swifuwo.”

³ Kutani Vaisraele va endla hilaha HOSI Xikwembu xi leriseke hakona: Va teka miti leyi ni madyelo ya yona ya swifuwo emigangeni ya vona, va nyika Valevhi.

⁴ Kutani ku huma xiphemu xa mindyangu ya va ka Kohata: Valevhi lava va nga vatukulu va muprista Aroni va kumile miti ya 13, yi huma eka nyimba ya ka Yuda, ni ya ka Simiyoni, ni ya ka Benjamini.

⁵ Va ka Kohata lava van'wana va kumile miti ya vona ya 10, yi huma eka mindyangu ya nyimba ya ka Efrayimi, ni ya ka Dani, ni le ka hafu ya nyimba ya ka Manase.

⁶ Va ka Gerixoni va kumile miti ya 13 eBaxani, yi huma eka mindyangu ya nyimba ya ka Isakara, ni ya ka Asere, ni ya ka Neftali, ni le ka hafu ya nyimba ya ka Manase.

⁷ Va ka Merari, hi ku ya hi mindyangu ya vona, va kumile miti ya 12, yi huma eka nyimba ya ka Rhuveni ni ya ka Gadi, ni ya ka Zebuloni.

⁸ Vaisraele va nyikile Valevhi miti leyi ni madyelo ya yona ya swifuwo hi ku tirhisa vuhlolotwana, hilaha HOSI Xikwembu xi leriseke Muxe hakona.

⁹ Eka nyimba ya ka Yuda ni ya ka Simiyoni, ku hlawuriwile miti leyi ku nga ta vuriwa mavito ya yona laha hansi.

¹⁰ Miti leyi yi nyikiwile mindyangu yin'wana ya Valevhi va ka Kohata, lava va nga vatukulu va Aroni, hikuva hi vona va nga sungula ku averiwa.

¹¹ Va nyikiwile muti wa Kiriyata-Araba (Araba a a ri tata wa Anaki), wu nga muti wa Hebroni lowu nga magangeni ya Yuda, ni madyelo ya wona ya swifuwo ku rhendzeleka na wona.

¹² Kambe masimu ni swimitana swa muti lowu swona swi nyikiwile Kalebe n'wana Yefune swi va swa yena.

¹³ Vatukulu va muprista Aroni va nyikiwile muti wa Hebroni ni madyelo ya wona ya swifuwo, leswaku wu va lowu vadlayi va nga ta ya tumbela eka wona. Miti yin'wana leyi va nyikiweke yona, yi ri ni madyelo ya yona ya swifuwo, hi leyi: Libina,

¹⁴ na Yatira, na Exitemoka,

¹⁵ na Holoni, na Debiri,

¹⁶ na Ayini, na Yuta, na Beta-Xemexe. Eka tinyimba leti timbirhi, ku humile miti ya 9.

¹⁷ Eka nyimba ya ka Benjamini, ku humile miti leyi landzelaka ni madyelo ya yona ya swifuwo: Gibiyoni, na Geba,

¹⁸ na Anatoto, na Alimoni. Miti leyi i mune.

¹⁹ Miti hinkwayo ya vatukulu va muprista Aroni ni madyelo ya yona ya swifuwo i 13.

²⁰ Mindyangu leyin'wana ya Valevhi va ka Kohata yi nyikiwile miti exikarhi ka vanhu va nyimba ya ka Efrayimi.

²¹ Va nyikiwile muti wa Xikeme ni madyelo ya wona ya swifuwo, emagangeni ya Efrayimi, leswaku wu va lowu vadlayi va nga ta ya tumbela eka wona; miti yin'wana leyi va nyikiweke yona yi ri ni madyelo ya yona ya swifuwo, hi leyi: Gezere,

²² na Kibisayimi, na Beta-Horoni. Miti ya kona hinkwayo i mune.

²³ Eka nyimba ya ka Dani, ku humile miti leyi landzelaka ni madyelo ya yona ya swifuwo: Elteke, na Gibitoni,

²⁴ na Ayaloni, na Gati-Rimoni. Miti leyi i mune.

²⁵ Eka hafu ya nyimba ya ka Manase, ku humile miti leyi landzelaka ni madyelo ya yona ya swifuwo: Taanaka, na Yibileyamu. Miti leyi i mimbirhi.

²⁶ Miti hinkwayo leyi yi nyikiweke mindyangu ya va ka Kohata lavan'wana, swin'we ni madyelo ya kona ya swifuwo, i khume.

²⁷ Eka hafu ya nyimba ya ka Manase, va ka Gerixoni, wu nga ndyangu wun'wana wa va ka Levhi, va kumile miti leyi landzelaka ni madyelo ya yona ya swifuwo: Golani eBaxani, wu nga muti lowu vadlayi va nga ta ya tumbela eka wona, na Bexetera. Miti leyi i mimbirhi.

²⁸ Eka nyimba ya ka Isakara, ku humile miti leyi landzelaka ni madyelo ya yona ya swifuwo: Kixiyoni, na Daberata,

²⁹ na Yaramutu, na Eni-Ganimi. Miti leyi i mune.

³⁰ Eka nyimba ya ka Asere, ku humile miti leyi landzelaka ni madyelo ya yona ya swifuwo: Mixala, na Abidoni,

³¹ na Helikati, na Rehobo. Miti leyi i mune.

³² Eka nyimba ya ka Neftali, ku humile miti leyi landzelaka ni madyelo ya yona ya swifuwo: Kedexe eGaleliya, wu nga muti lowu vadlayi va nga ta ya tumbela eka wona, na Hamoti-Dori, na Karitana. Miti leyi i minharhu.

³³ Miti hinkwayo ya mindyangu ya va ka Gerixoni hi ku hambana-hambana ka yona, ni madyelo ya yona ya swifuwo, i 13.

³⁴ Eka nyimba ya ka Zebuloni, Valevhi lavan'wana, va nga va mindyangu ya ka Merari, va kumile miti leyi landzelaka ni madyelo ya yona ya swifuwo: Yokineyama, na Karita,

³⁵ na Dimina, na Nahalala. Miti leyi i mune.

³⁶ Eka nyimba ya ka Rhuveni, ku humile miti leyi landzelaka ni madyelo ya yona ya swifuwo: Beseri, na Yahasi,

³⁷ na Kedemoto, na Mefata. Miti leyi i mune.

³⁸ Eka nyimba ya ka Gadi, ku humile miti leyi landzelaka ni madyelo ya yona ya swifuwo: Ramoto eGiliyadi, wu nga muti lowu vadlayi va nga ta ya tumbela eka wona, na Mahanayimi,

³⁹ na Hexiboni, na Yazere. Miti leyi hinkwayo i mune.

⁴⁰ Miti hinkwayo leyi yi averiweke Valevhi lava a va ha sele, va nga va mindyangu ya ka Merari hi ku hambana-hambana ka yona, i 12.

^41-42 Miti hinkwayo leyi Valevhi va nyikiweke yona emigangeni ya Vaisraele, i 48. Hinkwayo a yi rhendzeriwa hi madyelo ya yona ya swifuwo.

Vaisraele va teka tiko ri va ra vona

⁴³ Hi ndlela leyi, HOSI Xikwembu xi nyika Vaisraele tiko hinkwaro leri xi tshembiseke vatata wa vona leswaku xi ta va nyika rona. Loko va ri tekile ri va ra vona, va tshamile eka rona.

⁴⁴ HOSI Xikwembu xi va wisisile matlhelo hinkwawo hilaha xi hlambanyeleke vatata wa vona hakona. A ku vanga na un'we wa valala va Vaisraele loyi a a va tiyela hikuva HOSI Xikwembu a xi nyiketile valala va vona hinkwavo emavokweni ya vona.

⁴⁵ Swilo hinkwaswo leswo saseka leswi HOSI Xikwembu xi swi tshembiseke Vaisraele swi vuye swi hetiseka, a ku vanga na xin'we xa swona lexi nga humelelangiki.