Yoxuwa 19 - BIBELE Mahungu Lamanene

Tindhawu leti nyikiweke va ka Simiyoni

¹ Kutani ku huma xiphemu xa vumbirhi lexi averiweke va ka Simiyoni hi ku ya hi mindyangu ya vona. Ndzhaka ya vona a yi ri xikarhi ka ndzhaka ya va ka Yuda.

² Ndzhaka ya vona yi katsa miti leyi: Berexeba, na Xeba, na Molada;

³ na Hasari-Xuwala, na Bala, na Esemu;

⁴ na Elitolada, na Betuli, na Horma;

⁵ na Sikilaga, na Beta-Marikaboto, na Hasari-Susa;

⁶ na Beta-Lebawoto, na Xaruheni. Miti ni swimitana swa yona i 13.

⁷ Miti yin'wana hi leyi: Ayini, na Rimoni, na Etere, na Axani. Miti ni swimitana swa yona i mune.

⁸ Ku katsiwa ni swimitana hinkwaswo leswi rhendzeleke miti leyi ku ya fika eBaalata-Bere, wu nga muti wa Rhama lowu wu nga edzongeni. Leyi hi yona ndzhaka ya va ka Simiyoni hi ku ya hi mindyangu ya vona.

⁹ Ndzhaka leyi yi averiweke va ka Simiyoni a xi ri xiphemu xa tiko ra va ka Yuda, hikuva va ka Yuda a va averiwile xiphemu lexikulu; kutani xiphemu xin'wana xa tiko leri a ri ri ra va ka Yuda xi nyikiwile va ka Simiyoni.

Tindhawu leti nyikiweke va ka Zebuloni

¹⁰ Kutani ku huma xiphemu xa vunharhu lexi averiweke va ka Zebuloni, hi ku ya hi mindyangu ya vona. Ndhawu leyi yi nga ndzhaka ya vona yi famba ku ya fika eSaridi.

¹¹ Kutani ndzilekana wa kona wu tlhandluka wu kongoma evupeladyambu etlhelo ra Mariyala wu hundza hi le Dabexeti, wu ya fika exinkobyaneni lexi xi nga evuxeni bya Yokineyama.

¹² Ku suka eSaridi ndzilekana wu jika wu kongoma endzilekaneni wa Kisiloti-Taboro, hi tlhelo ra le vuxeni, wu hundza wu ya eDaberata, kutani wu ya fika eYafiti.

¹³ Ku suka kona, wu kongoma evuxeni eGati-Hefere ni le Eti-Kasini, wu hundza wu ya fika eRimoni, wu jika wu kongoma eNeya.

¹⁴ Hi tlhelo ra le n'walungwini, ndzilekana wu jikela eHanatoni wu ya helela eka Nkova wa Yifita-Eli.

¹⁵ Ndzilekana wu katsa ni miti leyi: Katati, na Nahalala, na Ximroni, na Yidala, na Betlehema. Miti ni swimitana swa yona i 12.

¹⁶ Miti leyi ni swimitana swa yona hi yona ndzhaka ya va ka Zebuloni hi ku ya hi mindyangu ya vona.

Tindhawu leti nyikiweke va ka Isakara

¹⁷ Kutani ku huma xiphemu xa vumune lexi xi averiweke va ka Isakara hi ku ya hi mindyangu ya vona.

¹⁸ Tiko ra vona ri katsa miti leyi: Yizriele, na Kesuloto, na Xuneme;

¹⁹ na Hafarayimi, na Xiyoni, na Anaharati;

²⁰ na Rabiti, na Kixiyoni, na Ebeze;

²¹ na Remete, na Eni-Ganimi, na Eni-Hada, na Beta-Pasese.

²² Ndzilekana wu katsa ni tindhawu leti: Taboro, na Xahasuma, na Beta-Xemexe, kutani wu ya helela enambyeni wa Yordani. Miti ni swimitana swa yona i 16.

²³ Miti leyi ni swimitana swa yona hi yona ndzhaka ya va ka Isakara hi ku ya hi mindyangu ya vona.

Tindhawu leti nyikiweke va ka Asere

²⁴ Kutani ku huma xiphemu xa vuntlhanu lexi xi averiweke va ka Asere hi ku ya hi mindyangu ya vona.

²⁵ Tiko ra vona ri katsa miti leyi: Helikati, na Hali, na Beteni, na Akixafa;

²⁶ na Alameleke, na Amadi, na Mixala. Hi tlhelo ra vupeladyambu ndzilekana wu hundza hi le Karmele na le Xihoro-Libinata.

²⁷ Kutani wu jika wu kongoma eBeta-Dagoni evuxeni, wu hundza hi le Zebuloni ni le ka Nkova wa Yifita-Eli, wu kongoma en'walungwini eBeta-Emeke na Neyiele, wu ya emahlweni wu ya ta hi le Kabulu,

²⁸ ni le Ebrona, ni le Rehobo, ni le Hamoni, ni le Kana, wu ya fika ni le Sidoni lonkulu.

²⁹ Kutani ndzilekana wu jika wu kongoma eRhama, wu fika ekhokholweni ra Tiri wu jika wu kongoma eHosa, wu ya helela elwandle. Ndzilekana wu katsa ni miti leyi: Mahalabu, na Akizibi,

³⁰ na Uma, na Afeke, na Rehobo. Miti ni swimitana swa yona i 22.

³¹ Miti leyi ni swimitana swa yona hi yona ndzhaka ya va ka Asere hi ku ya hi mindyangu ya vona.

Tindhawu leti nyikiweke va ka Neftali

³² Kutani ku huma xiphemu xa vu-6 lexi xi averiweke va ka Neftali hi ku ya hi mindyangu ya vona.

³³ Ndzilekana wa tiko ra vona wu sukela eHelefa wu ya ta hi le nkuhlwini lowu nga Saananimi, ni le Adaminekeba, ni le Yabinele, ni le Lakumi, wu ya helela enambyeni wa Yordani.

³⁴ Kutani ndzilekana wu jika wu kongoma le Azinoto-Tabori evupeladyambu. Ku suka kona wu kongoma eHukoko, wu ya hundza hi le dzongeni ra Zebuloni, ni le vupeladyambu bya Asere, wu ya ta hi le Yordani evuxeni bya Yuda.

³⁵ Miti ya makhokholo hi leyi: Sidimi, na Sere, na Hamata, na Rakata, na Kinereta,

³⁶ na Adama, na Rhama, na Hasoro,

³⁷ na Kedexe, na Edreyi, na Eni-Hasori;

³⁸ na Yironi, na Migidali-Ele, na Horeme, na Beta-Anati, na Beta-Xemexe. Miti ni swimitana swa yona i 19.

³⁹ Miti leyi ni swimitana swa yona hi yona ndzhaka ya va ka Neftali hi ku ya hi mindyangu ya vona.

Tindhawu leti nyikiweke va ka Dani

⁴⁰ Kutani ku huma xiphemu xa vu-7 lexi averiweke va ka Dani hi ku ya hi mindyangu ya vona.

⁴¹ Tiko leri ri nga ndzhaka ya vona ri katsa miti leyi: Sora, na Exitawulu, na Yiri-Xemexe;

⁴² na Xaalabini, na Ayaloni, na Yitila;

⁴³ na Elone, na Timina, na Ekroni;

⁴⁴ na Elteke, na Gibetoni, na Baalata;

⁴⁵ na Yehudi, na Bene-Beraka, na Gati-Rimoni;

⁴⁶ na Me-Yarikona, na Rakoni, ni ndhawu leyi langutaneke ni muti wa Yopa.

⁴⁷ Loko va ka Dani va tsandzekile ku teka tindhawu leti va averiweke tona, va tlhandlukile va ya hlasela muti wa Lexeme va wu hlula. Kutani va dlaya vaaki va wona hi fumu, va teka muti lowu wu va wa vona, va tshama eka wona, va wu thya vito ra Dani kokwa wa vona.

⁴⁸ Miti leyi ni swimitana swa yona hi yona ndzhaka ya va ka Dani hi ku ya hi mindyangu ya vona.

Ndhawu leyi nyikiweke Yoxuwa

⁴⁹ Loko Vaisraele va hetile ku avelana tindhawu hinkwato ta tiko, leti a ti fanele ku va ndzhaka ya vona, va nyikile Yoxuwa n'wana Nuni ndzhaka ya yena exikarhi ka vona.

⁵⁰ Vaisraele va endlile hilaha HOSI Xikwembu xi va leriseke hakona. Va nyika Yoxuwa ndhawu leyi a kombeleke yona, wu nga muti wa Timinata-Sera, lowu wu nga emagangeni ya Efrayimi. Kutani Yoxuwa a pfuxa muti lowu, a tshama eka wona.

⁵¹ Leyi hi yona ndzhaka leyi muprista Eliyazara na Yoxuwa n'wana Nuni ni varhangeri va mindyangu ya tinyimba ta Vaisraele va yi aveke hi ku tirhisa vuhlolotwana emahlweni ka HOSI Xikwembu le Xilo, enyangweni ya Ntsonga lowo Hlawuleka. Hi ndlela leyi, ku va loko va hetile ku avela vanhu etiko.