Yoxuwa 18 - BIBELE Mahungu Lamanene

Ta ku averiwa ka tiko eXilo

¹ Loko Vaisraele va tekile tiko hinkwaro ra Kanana, ntshungu hinkwawo wu hlengeletana eXilo wu dzima Ntsonga lowo Hlawuleka.

² Exikarhi ka Vaisraele a ka ha sele tinyimba ta 7 leti a ti nga si averiwa ndzhaka ya tona.

³ Kutani Yoxuwa a ku ka Vaisraele: “Xana ma ha yimela yini, leswi mi tshikaka ku nghena mi teka tiko leri HOSI Xikwembu xa vatata wa n'wina xi mi nyikeke rona xana?

⁴ Ndzi hlawuleleni vavanuna vanharhu enyimbeni yin'wana ni yin'wana, lava ndzi nga ta va rhuma va ya rhendzeleka ni tiko hinkwaro va ri karhi va tsala-tsala tindhawu leti va navelaka leswaku ti va ndzhaka ya vona; kutani va ta tlhela va vuya haleno ka mina.

⁵ Va ta avanyisa tiko hi swiphemu swa 7; va ka Yuda va ta ya emahlweni va tshama endhawini ya vona ya le dzongeni, ni va ka Yosefa endhawini ya vona ya le n'walungwini.

⁶ Kutani n'wina mi ta tsala tinhlamuselo ta swiphemu leswi swa 7, mi ndzi tisela leswi mi swi tsaleke. Mina ndzi ta mi vutisela timhaka eka HOSI Xikwembu xa hina hi ku tirhisa vuhlolotwana.

⁷ Loko va ri va ka Levhi, vona a va nga averiwi ndzhaka exikarhi ka n'wina. Vuprista bya HOSI Xikwembu hi yona ndzhaka ya vona. Va ka Gadi ni va ka Rhuveni ni hafu ya va nyimba ya ka Manase, vona va kumile ndzhaka ya vona entsungeni wa nambu wa Yordani evuxeni, leyi va nyikiweke yona hi Muxe nandza wa HOSI Xikwembu.”

⁸ Loko vavanuna lava a va fanele ku ya tsala-tsala tindhawu ta tiko va lava ku famba, Yoxuwa a va lerisa a ku: “Mi rhendzeleka ni tiko hinkwaro mi ri karhi mi tsala-tsala tindhawu ta rona, kutani mi tlhela mi vuya haleno ka mina. Mina ndzi ta mi vutisela timhaka eka HOSI Xikwembu kwala Xilo hi ku tirhisa vuhlolotwana.”

⁹ Kutani vavanuna lava va khoma ndlela va ya rhendzeleka ni tiko hinkwaro va ri karhi va tsala tindhawu ta tiko ra kona ebukwini, va ri avanyisa hi swiphemu swa 7, hi ku ya hi miti ya rona; kutani va tlhelela eka Yoxuwa emixaxeni le Xilo.

¹⁰ Yoxuwa a va vutisela timhaka eka HOSI Xikwembu hi ku tirhisa vuhlolotwana eXilo; kutani a avela Vaisraele tiko, nyimba yin'wana ni yin'wana yi kuma xiphemu xa yona.

Tindhawu leti nyikiweke va ka Benjamini

¹¹ Kutani ku huma xiphemu lexi averiweke va ka Benjamini hi ku ya hi mindyangu ya vona, yi nga ndhawu leyi yi nga xikarhi ka nyimba ya ka Yuda ni nyimba ya ka Yosefa.

¹² En'walungwini ndzilekana wa va ka Benjamini wu sukela enambyeni wa Yordani, kutani wu tlhandluka wu kongoma exintshabyaneni lexi nga en'walungwini wa Yeriko, wu ya emahlweni wu tsemakanya hi le magangeni wu kongoma evupeladyambu wu ya helela emananga ya Beta-Avene.

¹³ Ku suka kona ndzilekana wu kongoma edzongeni etlhelo ra Luzi, wu ya ta hi le xintshabyaneni xa Luzi (hileswaku Betele), kutani wu rhelela wu kongoma le Ataroti-Adara ehenhla ka ntshava leyi yi nga edzongeni ra muti wa Beta-Horoni-wa-le-nkoveni.

¹⁴ Kutani ndzilekana wu jika wu kongoma etlhelo rin'wana, wu ta hi le vupeladyambu bya ntshava leyi langutaneke na Beta-Horoni, wu kongoma edzongeni, wu ya helela eKiriyata-Baala (hileswaku Kiriyata-Yeyarimi), wu nga muti wa va ka Yuda. Lowu hi wona ndzilekana wa le vupeladyambu.

¹⁵ Edzongeni ndzilekana wu sukela emakumu ka muti wa Kiriyata-Yeyarimi, wu famba wu kongoma le Efroni, wu ya fika eswihlobyeni swa Nefitowaka.

¹⁶ Kutani wu rhelela wu ya ta hi le hansi ka ntshava leyi langutaneke ni Nkova wa Bene-Hinomu, emakumu ka Nkova wa Refayimi hi tlhelo ra le n'walungwini, wu ya emahlweni wu ya ta hi le ka Nkova wa Hinomu edzongeni ra xintshabyana xa Vayebusi, wu kondza wu ya fika le Eni-Rogele.

¹⁷ Kutani ndzilekana wu jika wu kongoma etlhelo ra le n'walungwini, wu famba wu ya le Eni-Xemexi. Ku suka kona wu famba wu ya eGeliloto, ku langutana ni xiphandze xa Adumimi, wu rhelela wu kongoma eribyeni ra Bohani n'wana Rhuveni.

¹⁸ Ndzilekana wu hundza wu ya ta hi le n'walungwini wa xintshabyana xa Beta-Araba, wu rhelela wu kongoma le Araba.

¹⁹ Kutani wu hundza wu ya ta hi le n'walungwini wa xintshabyana xa Beta-Hogila, wu ya helela ensongeni wa Lwandle-ra-ku-fa, lowu wu nga en'walungwini, laha nambu wa Yordani wu helelaka kona edzongeni. Lowu hi wona ndzilekana wa le dzongeni.

²⁰ Evuxeni nambu wa Yordani hi wona ndzilekana wa kona. Leyi hi yona mindzilekana hinkwayo ya ndzhaka ya va ka Benjamini hi ku ya hi mindyangu ya vona.

²¹ Miti ya va nyimba ya ka Benjamini hi ku ya hi mindyangu ya vona hi leyi: Yeriko, na Beta-Hogila, na Emeke-Kesisi;

²² na Beta-Araba, na Semarayimi, na Betele;

²³ na Avhimi, na Para, na Ofira;

²⁴ na Kefara-Amonayi, na Ofini, na Geba. Miti ni swimitana swa yona i 12.

²⁵ Miti yin'wana hi leyi: Gibiyoni, na Rhama, na Beroto;

²⁶ na Mispe, na Kefira, na Moza;

²⁷ na Rekemu, na Yiripele, na Tarala;

²⁸ na Sela, na Hayelefe, na Yebusi (hileswaku Yerusalema), na Gibeya, na Kiriyata-Yeyarimi. Miti ni swimitana swa yona i 14. Leyi hi yona ndzhaka ya va ka Benjamini hi ku ya hi mindyangu ya vona.