Yoxuwa 13 - BIBELE Mahungu Lamanene

Tindhawu leti a ta ha fanele ku tekiwa

¹ Enkarhini lowu, Yoxuwa a a dyuharile swinene. Kutani HOSI Xikwembu xi ku ka yena: “U dyuharile ngopfu, kambe ka ha sele tindhawu to tala ta tiko leti mi faneleke ku ti teka ti va ta n'wina.

² Tindhawu leti ta ha saleke hi leti: Swifundzha hinkwaswo swa Vafilista, ni swifundzha hinkwaswo swa Vagexuri.

³ (Ku sukela enkoveni wa Xihoro lowu nga vuxeni bya tiko ra Egipta, ku ya fika endzilekaneni wa Ekroni hi tlhelo ra n'walungu, ndhawu leyi a yi tiviwa yi ri ya Vakanana. A ku ri ni tihosi ta ntlhanu ta Vafilista, ku nga hosi ya Gaza, ni ya Axidodo, ni ya Axikeloni, ni ya Gati, ni ya Ekroni.) Ka ha ri ni swifundzha swa Avhimi,

⁴ leswi nga dzongeni, ni tiko hinkwaro ra Vakanana, ni ra Meyara leri nga ra Vasidoni, ku ya fika le Afeke endzilekaneni wa Vaamori;

⁵ ni tiko ra Vagebali, ni ndhawu hinkwayo ya Lebanoni hi tlhelo ra le vuxeni, ku sukela eBaali-Gadi ehansi ka ntshava ya Hermoni, ku ya fika exiphandzeni xa Hamata.

⁶ Vaaki hinkwavo va le magangeni ya Lebanoni, ku ya fika eMisrefoto-Mayimi, ku katsa ni Vasidoni, mina ndzi ta va hlongola va suka emahlweni ka Vaisraele. Wena u fanele ku avela Vaisraele tiko leri, yi va ndzhaka ya vona, hilaha ndzi ku leriseke hakona.

⁷ Sweswi avela tinyimba leta 9 ni hafu ya va ka Manase etiko leri, yi va ndzhaka ya vona.”

Ta tinyimba leti tshameke evuxeni bya Yordani

⁸ Va ka Rhuveni ni va ka Gadi, swin'we ni hafu ya va ka Manase, va kumile ndzhaka ya vona leyi va yi nyikiweke hi Muxe entsungeni wa nambu wa Yordani, hi tlhelo ra le vuxeni. Tindhawu leti Muxe nandza wa HOSI Xikwembu a va nyikeke tona hi leti:

⁹ Ku sukela le Arowere, eribuweni ra nkova wa Arinoni, ni muti lowu wu nga xikarhi ka nkova, ni rivala hinkwaro ra Medeba ku ya fika eDiboni;

¹⁰ ni miti hinkwayo ya Sihoni hosi ya Vaamori, loyi a a fuma ku sukela eHexiboni ku ya fika endzilekaneni wa Vaamori;

¹¹ ni tiko ra Giliyadi, ni xifundzha xa Vagexuri, ni xa Vamaakati, ni ntshava hinkwayo ya Hermoni, ni tiko hinkwaro ra Baxani ku ya fika eSaleka,

¹² ri nga tiko hinkwaro ra Ogo loyi a a fuma a ri karhi a tshama le Axitaroto ni le Edreyi (Ogo hi yena ntsena loyi a a sele eka masalela ya Refayimi); vanhu lava, Muxe ú va hlurile, a va hlongola va suka etikweni.

¹³ Kambe loko va ri Vagexuri ni Vamaakati, Vaisraele a va va hlongolanga, kutani ni namuntlha va ha tshama exikarhi ka Vaisraele.

¹⁴ Va nyimba ya ka Levhi, Muxe a nga va nyikanga ndzhaka. Magandzelo lawa ma hiseriwaka HOSI Xikwembu xa Israele, hi yona ndzhaka ya vona, hilaha HOSI Xikwembu xi leriseke Muxe hakona.

Tindhawu leti nyikiweke va ka Rhuveni

¹⁵ Kutani Muxe a nyika va ka Rhuveni ndzhaka ya vona hi ku ya hi mindyangu ya vona.

¹⁶ Ndhawu ya vona yi sukela le Arowere, eribuweni ra nkova wa Arinoni, yi katsa ni muti lowu wu nga exikarhi ka nkova, ni rivala hinkwaro kusuhi na Medeba;

¹⁷ yi katsa na Hexiboni, ni miti hinkwayo leyi nga rivaleni, wu nga muti wa Diboni, ni wa Bamoto-Baali, ni wa Beta-Baala-Meyoni,

¹⁸ ni wa Yahasa, ni wa Kedemoto, ni wa Mefata;

¹⁹ ni muti wa Kiriyatayimi, ni wa Sibima, ni wa Sereta-Xahara egangeni ra nkova,

²⁰ ni wa Beta-Peyori, ni maganga ya ntshava ya Pisga, ni muti wa Beta-Yeximoto.

²¹ Leyi hi yona miti hinkwayo ya le rivaleni, ni tiko hinkwaro leri fumiwaka hi Sihoni hosi ya Vaamori, loyi a a fuma a ri eHexiboni. Sihoni hi yena loyi Muxe a n'wi hluleke, a hlula ni varhangeri va Vamidiyani, ku nga Evhi, na Rekemu, na Suru, na Huru, na Reba, ti nga tindhuna ta Sihoni leti a ti tshama etikweni leri.

²² Exikarhi ka lava dlayiweke hi Vaisraele hi fumu a ku ri na Balaama n'wana Beyori yena loyi a a ri mungoma.

²³ Ndzilekana wa va ka Rhuveni a ku ri nambu wa Yordani. Leyi hi yona ndzhaka ya va ka Rhuveni hi ku ya hi mindyangu ya vona ni miti ya vona ni swimitana swa vona.

Tindhawu leti nyikiweke va ka Gadi

²⁴ Muxe ú nyikile ni va ka Gadi ndzhaka ya vona hi ku ya hi mindyangu ya vona.

²⁵ Tiko ra vona ri katsa tindhawu leti: Yazere, ni miti hinkwayo ya Giliyadi, ni hafu ya tiko ra Vaamoni, ni ku ya fika le Arowere hi tlhelo ra le vuxeni bya Raba;

²⁶ ni ku sukela eHexiboni, ku ya fika eRamati-Misipe ni le Betonimi; ni ku sukela eMahanayimi, ku ya fika etikweni ra Lo-Debara,

²⁷ yi katsa ni nkova wa Beta-Harama, na Beta-Nimra, na Sukoti, na Safoni, ni tiko hinkwaro ra Sihoni hosi ya Hexiboni. Ndzilekana wa vona a wu ri nambu wa Yordani, ku ya fika emakumu ka Lwandle ra Galeliya hi tlhelo ra le vuxeni bya nambu wa Yordani.

²⁸ Leyi hi yona ndzhaka ya va ka Gadi hi ku ya hi mindyangu ya vona ni miti ya vona ni swimitana swa vona.

Tindhawu ta le vuxeni leti nyikiweke va ka Manase

²⁹ Muxe ú nyikile hafu ya nyimba ya va ka Manase ndzhaka ya vona; va nyikiwile hi ku ya hi mindyangu ya vona.

³⁰ Xifundzha xa vona xi sukela eMahanayimi, xi katsa ni tiko hinkwaro ra Baxani leri fumiwaka hi Ogo, ni miti hinkwayo ya Yayiri yo ringana 60, leyi nga eBaxani,

³¹ ni hafu ya tiko ra Giliyadi, ni muti wa Axitaroto, ni wa Edreyi, yi nga miti ya Ogo leyi nga eBaxani. Miti leyi yi averiwile hafu ya va ka Makiri, n'wana Manase, hi ku ya hi mindyangu ya vona.

³² Leyi hi yona ndzhaka leyi Muxe a nga avela Vaisraele erivaleni ra Mowabu, entsungeni wa nambu wa Yordani, hi tlhelo ra le vuxeni bya muti wa Yeriko.

³³ Kambe va ka Levhi, Muxe a nga va nyikanga ndzhaka; HOSI Xikwembu xa Israele hi xona ndzhaka ya vona, hilaha Muxe a va byeleke hakona.