Yonasi 2 - BIBELE Mahungu Lamanene

Ku tlangela ka Yonasi

¹ Kutani Yonasi a khongela HOSI Xikwembu xa yena a ri endzeni ka nhlampfi leyi, a ku:

² “Ekhombyeni ra mina, ndzi ku vitanile we HOSI, kutani u ndzi hlamurile; ndzi komberile ku pfuniwa ndzi ri exivandleni xa vafi, kutani wena u yingisile ku rila ka mina.

³ U ndzi hoxile exidziveni, exivindzini xa malwandle, mati layo tala ma ndzi funengetile; magandlati ya wena ni maboboma ya wena hinkwawo ma hundzile hi le henhla ka mina.

⁴ Kutani a ndzi ku, ndzi hlongoleriwe kule ni mahlo ya wena. Hambiswiritano, Tempele ya wena leyo hlawuleka, ndzi ta tlhela ndzi yi vona.

⁵ Mati a ma ndzi rhendzerile ku fika enhan'wini, kutani magandlati ya xidziva ma ndzi khubumeta; swimila swa lwandle a swi ndzi tsondzela nhloko.

⁶ Ndzi mbombomerile emasungulweni ya tintshava, etikweni ra le hansi leri tinyangwa ta rona a ti lava ku ndzi pfalela hilaha ku nga heriki. Kambe wena HOSI Xikwembu xanga, u tsavurile vutomi bya mina ekheleni ra vafi.

⁷ Loko ndzi ri kusuhi ni ku nyiketa moya wa mina, ndzi ku anakanyile; xikhongelo xa mina xi fikile eka wena, eTempeleni ya wena leyo hlawuleka.

⁸ Lava namarhelaka swikwembu swa hava va hambana ni vukhongeri bya xiviri.

⁹ Kambe loko a ri mina, ndzi ta endla leswi ndzi swi hlambanyeke: Ndzi ta ku humesela magandzelo, hi tinsimu to tlangela. Hakunene Xikwembu xa ponisa!”

¹⁰ HOSI Xikwembu xi vulavula ni nhlampfi, kutani nhlampfi yi hlantela Yonasi eribuwini ra lwandle.