Yohane 7 - BIBELE Mahungu Lamanene

Ta vamakwavo va Yesu lava nga pfumeriki

¹ Endzhaku ka sweswo Yesu a famba-famba eGaleliya; a nga lavanga ku famba-famba eYudiya hikuva Vayuda a va lava ku n'wi dlaya.

² Nkhuvo wa Vayuda wo endleriwa emintsongeni a wu ri kusuhi.

³ Kutani vamakwavo wa yena va ku ka yena: “Suka la, u ya eYudiya, leswaku vadyondzisiwa va wena na vona va ta vona mintirho leyi u yi endlaka.

⁴ Hikuva a ku na munhu la endlaka xo endla a ri exihundleni, loko a lava ku twakala ematlhelweni hinkwawo; loko mintirho leyi u yi endlaka yi ri yo yaleyi, tikombe eka misava hinkwayo.”

⁵ (Hikuva, na vona vamakwavo wa yena a va nga ri na ku pfumela eka yena.)

⁶ Hiloko Yesu a ku ka vona: “Nkarhi wa mina a wu si fika; kambe eka n'wina nkarhi wihi ni wihi wu lulamile.

⁷ Misava yi nga ka yi nga mi vengi, kambe mina ya ndzi venga, hikuva ndzi tiyisa vumbhoni bya leswaku mintirho ya yona yi bihile.

⁸ N'wina tlhandlukelani enkhubyeni, mina a ndzi yi enkhubyeni wolowo, hikuva nkarhi wa mina a wu si fika swinene.”

⁹ Loko a vurile sweswo, a tisalela eGaleliya.

Ta Yesu enkhubyeni wa le mitsongeni

¹⁰ Kambe loko vamakwavo wa yena va tlhandlukerile enkhubyeni, na yena a tlhandlukela kona, ku nga ri erivaleni, kambe exihundleni.

¹¹ Vayuda a va n'wi lava enkhubyeni, va ku: “Ú kwihi munhu wa kona xana?”

¹² A ku ri ni ku hleva-hleva ngopfu entshungwini, hi mhaka ya yena. Van'wana a va ku: “I munhu lonene!” Van'wana a va ku: “E-e, ú lahlekisa vanhu.”

¹³ Hambiswiritano, a ku vanga na munhu la vulavuleke hi yena erivaleni, hikwalaho ka ku chava Vayuda.

¹⁴ Loko nkhuvo wu ri exikarhi, Yesu a tlhandlukela eTempeleni a sungula ku dyondzisa.

¹⁵ Vayuda va hlamala, va ku: “Xana munhu loyi ú byi kuma kwihi vutivi, kasi a nga dyondzanga?”

¹⁶ Yesu a va hlamula a ku: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke.

¹⁷ Loko munhu a navela ku endla ku rhandza ka Xikwembu, ú ta tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena?

¹⁸ Loyi a vulavulaka swo huma emiehleketweni ya yena, ú tilavela ku dzunisiwa, kasi la lavaka ku dzunisa loyi a n'wi rhumeke, ú tshembekile, kutani ku hava ku homboloka eka yena.

¹⁹ Xana Muxe a nga mi nyikanga Nawu xana? Kambe hambiswiritano, ku hava na un'we wa n'wina la hlayisaka Nawu. Hikokwalaho ka yini mi lava ku ndzi dlaya ke?”

²⁰ Ntshungu wu hlamula, wu ku: “U ni demona wena; xana i mani la lavaka ku ku dlaya xana?”

²¹ Yesu a va hlamula a ku: “Ndzi endlile ntirho wun'we, kutani hinkwenu ma ha hlamala hikwalaho ka wona.

²² Muxe ú mi nyikile ntolovelo wa ku yimba (a hi leswaku a wu huma eka Muxe, kambe a wu huma eka vakokwana), kutani ma yimbisa munhu hi siku ra Savata!

²³ Loko mi yimbisa munhu hi siku ra Savata, mi endlela ku hlayisa Nawu wa Muxe; kutani xana mi ndzi karihela yini, leswi mina ndzi nga hanyisa munhu emirini wa yena hinkwawo hi siku ra Savata xana?

²⁴ Mi nga yi hi nghohe loko mi avanyisa, kambe avanyisani hi ku lulama.”

Xana loyi hi yena Mesiya xana?

²⁵ Vaaki van'wana va Yerusalema va ku: “Xana a hi yena loyi va n'wi lavaka leswaku va ta n'wi dlaya ke?

²⁶ Vonani! Ú vulavula erivaleni, kambe a va n'wi kongomi; xana tihosi ti nga va ti swi kumile hakunene leswaku hi yena Mesiya xana?

²⁷ Kasi loyi, ha n'wi tiva lomu a humaka kona, kambe loko a ri Mesiya, siku a humelelaka, ku hava munhu na un'we la nga ta tiva lomu a humaka kona.”

²⁸ Loko Yesu a ri karhi a dyondzisa eTempeleni, a tlakusa rito, a ku: “Ma ndzi tiva, mi tiva ni lomu ndzi humaka kona; a ndzi lo titisa, kambe Loyi a ndzi rhumeke, yena i ntiyiso hi xiviri xa wona, kutani a mi n'wi tivi.

²⁹ Mina ndza n'wi tiva, hikuva ndzi huma eka yena, naswona hi yena la ndzi rhumeke.”

³⁰ Kutani va ringeta ku n'wi khoma; kambe a ku vanga na un'we la nga yisa voko eka yena, hikuva nkarhi wa yena a wu nga si fika.

³¹ Lavo tala exikarhi ka ntshungu va pfumela ka yena, va ku: “Loko Mesiya a ta, xana ú ta endla mahlori lama tlulaka lawa ya endliweke hi munhu loyi xana?”

Malandza ma rhumiwa ku ya khoma Yesu

³² Vafarisi va twa leswi ntshungu wu hlevetelaka swona ehenhla ka Yesu, kutani vaprista lavakulu ni Vafarisi va rhuma malandza ku ya n'wi khoma.

³³ Kavaloko a ku ka vona: “Ndza ha ta va na n'wina nkarhinyana, kutani endzhaku ka swona ndzi ta ya eka Loyi a ndzi rhumeke.

³⁴ Mi ta ndzi lava, kambe a mi nga ndzi kumi; ni laha ndzi nga ta va kona, mi nga ka mi nga ti.”

³⁵ Hiloko Vayuda va vutisana, va ku: “Ú lava ku ya kwihi munhu loyi, lomu hi nga ta tsandzeka ku n'wi kuma kona xana? Xana ú lava ku ya eka Vayuda lava hangalakeke exikarhi ka vamatiko, ni ku dyondzisa vamatiko xana?

³⁶ Xana ú vula yini, loko a ku: ‘Mi ta ndzi lava, kambe a mi nga ndzi kumi’, ni loko a ku: ‘Laha ndzi nga ta va kona, mi nga ka mi nga ti?’ ”

Ta milambu ya mati lama hanyaka

³⁷ Hi siku ro hetelela ra nkhuvo, ri nga lerikulu, Yesu a suka a yima, kutani a tlakusa rito a ku: “Loko munhu a ri ni torha, a a te ka mina a ta nwa.

³⁸ Hilaha Tsalwa ri vuleke hakona, ‘milambu ya mati lama hanyaka yi ta khuluka yi huma embilwini ya loyi a pfumelaka eka mina.’ ”

³⁹ Hi ku vula sweswo, a a ringanisa Moya lowu lava pfumeleke eka yena va nga ta nyikiwa wona. Ku fikela nkarhi wolowo, Moya lowo Kwetsima a wu nga si nyikiwa, hikuva Yesu a a nga si tlakusiwa.

Ta ku hambana ka vanhu

⁴⁰ Loko van'wana exikarhi ka ntshungu va twile marito lawa, va ku: “Loyi hi yena Muprofeta hakunene.”

⁴¹ Van'wana va ku: “Loyi, hi yena Mesiya.” Kambe van'wana va ku: “Xana Mesiya a nga huma eGaleliya ke?

⁴² Xana Tsalwa a ri vulanga leswaku Mesiya ú ta huma erixakeni ra Davhida, a velekiwa eBetlehema, emutini lowu Davhida a a tshama ka wona xana?”

⁴³ Kutani ku pfuka ku hambana exikarhi ka ntshungu hikwalaho ka yena.

⁴⁴ Van'wana va vona a va navela ku n'wi khoma, kambe a ku vanga na un'we la nga yisa voko eka yena.

Ta vakulukumba lava nga pfumeriki

⁴⁵ Kavaloko malandza ma vuyela eka vaprista lavakulu ni ka Vafarisi; vona va ma vutisa, va ku: “Hikwalaho ka yini mi nga vuyanga na yena ke?”

⁴⁶ Malandza ma hlamula, ma ku: “A ku si va na munhu ni siku ni rin'we la vulavulaka ku fana ni munhu loyi.”

⁴⁷ Vafarisi va va hlamula, va ku: “Xana na n'wina mi xiseteriwile xana?

⁴⁸ I mani eka vakulukumba ni le ka Vafarisi loyi a tshamaka a pfumela eka yena xana?

⁴⁹ Kambe loko va ri vanhu va ntshungu wolowo, lava nga tiviki Nawu, va rhukaniwile.”

⁵⁰ Un'wana wa vona, yena Nikodema loyi a nga tshama a ta ka Yesu, a ku ka vona:

⁵¹ “Xana Nawu wa hina wu nga avanyisa munhu, a nga si yingisiwa, ni leswi a swi endleke swi nga si tiviwa xana?”

⁵² Va n'wi hlamula, va ku: “Xana na wena u huma eGaleliya ke? Lavisisa swinene u ta vona leswaku ku hava muprofeta la humaka eGaleliya.” [

Ta wansati wa muoswi

⁵³ Kutani va hangalaka, un'wana ni un'wana a ya ekaya ka yena.