Yohane 5 - BIBELE Mahungu Lamanene

Ta Yesu loko a hanyisa muvabyi eBetesda

¹ Endzhaku ka sweswo, nkhuvo wa Vayuda wu va kona, kutani Yesu a tlhandlukela eYerusalema.

² Le Yerusalema, hi tlhelo ra Nyangwa-ya-Tinyimpfu, ku ni vuhlambelo lebyi hi Xiheveru va nge i Betesda, byi rhendzeriwe hi tinxaxa ta ntlhanu ta timhandze letikulu.

³ Vanhu lavo tala ngopfu lava vabyaka, kukota lavo-fe-mahlo, ni swilema, ni lava omeke swirho, a va tolovele ku tshama kona [va yimela ku pfindluka ka mati,

⁴ hikuva, hi minkarhi yin'wana, ntsumi ya Hosi a yi xikela evuhlambelweni, yi ta pfindlusa mati; kutani la rhangeke a nghena loko mati ma ha ku pfindlusiwa, a a hanyisiwa, hambi a ri ni vuvabyi byihi na byihi.]

⁵ Kona kwalaho, a ku ri ni munhu loyi a a ri ni malembe ya 38 a ri karhi a vabya.

⁶ Loko Yesu a n'wi vona a etlele kwalaho, ni loko a tivile leswaku ú vabyile nkarhi lowo leha, a ku ka yena: “Xana wa swi lava ku hanyisiwa xana?”

⁷ Muvabyi a n'wi hlamula, a ku: “Hosi, a ndzi na munhu loyi a ndzi petaka evuhlambelweni, loko mati ma ha ku pfindluka; kutani loko ndzi ku ndzi ya kona, un'wana a ndzi rhangela, a nghena.”

⁸ Yesu a ku ka yena: “Pfuka, u teka sangu ra wena, u famba.”

⁹ Hi nomu lo, munhu loyi a hanyisiwa, kutani a teka sangu ra yena, a famba. Siku ra kona a ri ri ra Savata.

¹⁰ Hikokwalaho Vayuda va ku eka loyi a hanyisiweke: “Namuntlha i siku ra Savata, kutani u tlula Nawu loko u rhwala sangu ra wena.”

¹¹ A va hlamula, a ku: “Loyi a nga ndzi hanyisa, hi yena la nga te ka mina: ‘Teka sangu ra wena, u famba!’ ”

¹² Va n'wi vutisa, va ku: “I mani munhu wa kona loyi a nga te ka wena, ri teke u famba, xana?”

¹³ Loyi a hanyisiweke a nga tivanga leswaku i mani, hikuva Yesu a a sukile hikwalaho ka ntshungu lowu a wu ri kona.

¹⁴ Endzhaku ka sweswo Yesu a ya n'wi kuma eTempeleni, kutani a ku ka yena: “Vona, u hanyisiwile. Loko u nga lavi ku weriwa hi khombo lerikulu leri tlulaka lero rhanga, tshika ku dyoha.”

¹⁵ Kutani munhu yoloye a ya byela Vayuda leswaku loyi a n'wi hanyiseke i Yesu.

¹⁶ Hikwalaho ka swona, Vayuda va sungula ku xanisa Yesu, hikuva a a endlile swilo leswi hi siku ra Savata.

¹⁷ Kambe Yesu a va byela, a ku: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.”

¹⁸ Hikwalaho ka sweswo, Vayuda va hundzisa hi ku navela ku n'wi dlaya, hikuva a a nga tlulanga nawu wa Savata ntsena, kambe a a vurile leswaku Xikwembu i tata wa yena wa xiviri, kutani a tiendla la ringanaka ni Xikwembu.

Ta vuhosi bya N'wana

¹⁹ Kutani Yesu a ku ka vona: “Ndzi tiyisisile ndzi ri ka n'wina, N'wana a nga ka a nga tisunguleli a endla xilo hi yexe; ú endla ntsena lexi a xi voneke xi endliwa hi Tata wa yena; hinkwaswo leswi Tatana a swi endlaka, na yena N'wana wa swi endla.

²⁰ Hikuva Tatana ú rhandza N'wana; wa n'wi komba hinkwaswo leswi a swi endlaka, kutani ú ta n'wi komba ni mintirho leyikulu leyi tlulaka ni leyi, ku endlela leswaku n'wina mi ta hlamala.

²¹ Kukotisa leswi Tatana a pfuxaka vafi, a engeta a va nyika vutomi, swi tano na yena N'wana, ú nyika vutomi eka lava a rhandzaka ku va nyika byona.

²² Naswona Tatana a nga avanyisi munhu ni un'we, kambe ú nyikile N'wana ntirho hinkwawo wo avanyisa,

²³ leswaku hinkwavo va va ni xichavo eka N'wana, kukotisa leswi va nga ni xichavo eka Tatana. Un'wana ni un'wana la nga riki na xichavo eka N'wana, a nga na xichavo ni ka Tatana la n'wi rhumeke.

²⁴ “Ndzi tiyisisile ndzi ri ka n'wina, la yingisaka rito ra mina, a va a pfumela eka Loyi a ndzi rhumeke, ú ni vutomi lebyi nga heriki; kutani a nga ka a nga avanyisiwi, kambe ú humile eku feni a ya nghena evutomini.

²⁵ Ndzi tiyisisile ndzi ri ka n'wina: Nkarhi wa ta, nisweswi wu tile, lowu vafi va nga ta twa rito ra N'wana wa Xikwembu, kutani lava va ri twaka va ta hanya.

²⁶ Tanihi leswi Tatana hi xiviri xa yena a nga xihlovo xa vutomi, hi mukhuva wolowo ú nyikile N'wana ku va xihlovo xa vutomi na yena.

²⁷ Naswona, ú n'wi nyikile matimba ya ku avanyisa, hikuva i N'wana-wa-Munhu.

²⁸ Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni va nga ta twa rito ra yena,

²⁹ kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”

Ta vumbhoni ehenhla ka Yesu

³⁰ “Ndzi nga ka ndzi nga tisunguleli ndzi endla xilo hi ndzexe; ndzi avanyisa hilaha ndzi byeriwaka hakona; hikokwalaho, ku avanyisa ka mina ku lulamile, hikuva a ndzi lavi ku endla ku rhandza ka mina, kambe ku rhandza ka Loyi a ndzi rhumeke.

³¹ “Loko ndzi tivekela vumbhoni, vumbhoni bya mina a byi na ntiyiso.

³² Ú kona un'wana la vekaka vumbhoni ehenhla ka mina, kutani ndzi tiva leswaku vumbhoni lebyi a byi vekaka ehenhla ka mina byi ni ntiyiso.

³³ Mi rhumerile vanhu eka Yohane, kutani ú vekile vumbhoni ehenhla ka ntiyiso.

³⁴ A ndzi tiseketeli hi vumbhoni byo huma ka munhu, kambe ndzi vula timhaka leti leswaku mi ta ponisiwa.

³⁵ Yohane a a ri rivoni leri pfurhaka ni ku vangama; kutani n'wina mi swi nkhensile, mi tsakela hi nkarhinyana ku vonakala ka yena.

³⁶ Kambe vumbhoni lebyi ndzi nga na byona byi tlula bya Yohane, hikuva mintirho leyi Tatana a ndzi nyikeke leswaku ndzi yi hetisisa, yi nga yona mintirho leyi ndzi yi endlaka, hi yona leyi vekaka vumbhoni ehenhla ka mina, bya leswaku ndzi rhumiwile hi Tatana.

³⁷ Naswona, Tatana la ndzi rhumeke, na yena hi xiviri xa yena ú vekile vumbhoni ehenhla ka mina. A mi si twa rito ra yena ni siku ni rin'we, ni nghohe ya yena a mi si yi vona.

³⁸ Rito ra yena a ri akanga eka n'wina, hikuva a mi pfumeri eka loyi Tatana a n'wi rhumeke.

³⁹ Mi lavisisa Matsalwa, hikuva mi anakanya leswaku, eka wona, mi ta kuma vutomi lebyi nga heriki; kasi hi wona lama vekaka vumbhoni ehenhla ka mina.

⁴⁰ Kutani a mi swi lavi ku ta eka mina leswaku mi ta kuma vutomi.

⁴¹ “A ndzi tiseketeli hi ku dzunisiwa loku humaka eka vanhu;

⁴² kambe ndza mi tiva n'wina, a mi na rirhandzu eka Xikwembu.

⁴³ Mina ndzi tile hi vito ra Tata wa mina, kambe a mi ndzi amukeri; kasi loko un'wana a nga ta hi vito ra yena n'wini, mi ta n'wi amukela.

⁴⁴ Mi nga pfumerisa ku yini ke, kasi mi tsakela ku dzunisana, mi nga lavi ku dzunisiwa loku humaka eka Xikwembu, lexi nga xin'we ntsena!

⁴⁵ Mi nga anakanyi leswaku mina ndzi ta mi mangalela emahlweni ka Tatana; loyi a mi mangalelaka i Muxe, yena loyi mi nga veka ku tshemba ka n'wina eka yena.

⁴⁶ Loko a mi pfumerile Muxe, na mina a mi ta ndzi pfumela; hikuva a ti ri ta mina leti a nga tsala tona.

⁴⁷ Loko mi nga pfumeri matsalwa ya yena, mi nga pfumerisa ku yini marito ya mina xana?”