Yohane 19 - BIBELE Mahungu Lamanene

¹ Kutani Pilato a teka Yesu, a n'wi nyiketa leswaku va n'wi ba.

² Kutani masocha ma luka harhi ya mitwa, ma yi tlhandleka enhlokweni ya yena, ma n'wi ambexa nguvu yo vangama ya xivunguvungu;

³ a ma tshamela ku ta, ma ku ka yena: “Xewani, hosi ya Vayuda!” Kutani a ma n'wi ba hi timpama.

⁴ Pilato a engeta a huma, a ku ka Vayuda: “Vonani, ndzi mi humesela yena, mi ta tiva leswaku a ndzi kumi nandzu ni wun'we eka yena.”

⁵ Yesu a huma, a tlhandlekiwile harhi ya mitwa enhlokweni, a ambarile nguvu yo vangama ya xivunguvungu. Pilato a ku ka vona: “Vonani, hi yoloye munhu wa n'wina!”

⁶ Loko vaprista lavakulu ni malandza va n'wi vona, va huwelela, va ku: “N'wi vambe! N'wi vambe!” Pilato a ku ka vona: “N'wi tekeni, n'wina hi n'wexe, mi ya n'wi vamba; hikuva mina a ndzi kumi nandzu eka yena.”

⁷ Vayuda va n'wi hlamula, va ku: “Hi ni nawu, kutani hi nawu wa hina ú fanele ku fa, hikuva ú tiendlile N'wana wa Xikwembu.”

⁸ Loko Pilato a twa sweswo, a chava ngopfu,

⁹ a tlhelela endlwini ya vuhosi, a ku ka Yesu: “U huma kwihi?” Yesu a nga n'wi hlamuli.

¹⁰ Pilato a ku ka yena: “Xana wa ala ku vulavula na mina xana? A wu swi tivi xana leswaku ndzi ni matimba ya ku ku ntshunxa, ni matimba ya ku ku vamba ke?”

¹¹ Yesu a hlamula, a ku: “A wu nga ta va ni matimba ehenhla ka mina ni kutsongo, loko a wu nga nyikiwanga hi Tilo. Hikokwalaho, loyi a nga ndzi nyiketa eka wena, ú ni nandzu lowukulu ngopfu.”

¹² Loko a twa sweswo, Pilato a lava ndlela yo n'wi ntshunxa; kambe Vayuda va huwelela, va ku: “Loko u ntshunxa munhu loyi, a wu munghana wa hosi Khezari; un'wana ni un'wana la tiendlaka hosi, ú lwa na Khezari.”

¹³ Loko Pilato a twa marito walawo, a humesela Yesu ehandle, kutani a tshama exitshan'wini xa ku avanyisa, endhawini leyi va nge i “Xiandlala-hi-maribye” (hi ririmi ra Xiheveru i “Gavata”).

¹⁴ A ri ri siku leri rhangelaka Paseka, kutani a wu lava ku va nkarhi wa nhlekanhi. Kutani Pilato a ku ka Vayuda: “Vonani, hi leyi hosi ya n'wina!”

¹⁵ Vona va huwelela, va ku: “N'wi suse! N'wi suse! N'wi vambe!” Pilato a ku ka vona: “Xana ndzi ta vamba hosi ya n'wina ke?” Vaprista lavakulu va hlamula, va ku: “A hi na hosi loko a nga ri Khezari ntsena.”

¹⁶ Hiloko Pilato a va nyiketa Yesu, leswaku a vambiwa. Va teka Yesu,

Ta ku vambiwa ka Yesu

¹⁷ kutani a huma a byarhile xihambano xa yena n'wini, a ya endhawini leyi a va ku i “Ndhawu ya Pala”, leyi hi Xiheveru va nge i “Gologota”.

¹⁸ Va n'wi vamba kwalaho, a ri ni van'wana vambirhi, un'wana hi tlhelo rin'wana, un'wana hi tlhelo lerin'wana, Yesu a ri xikarhi.

¹⁹ Pilato a tsala ni papila ra xitiviso, a ri nameka ehenhla ka xihambano. Leswi a swi tsariwile hi leswi: “Yesu wa Nazareta, hosi ya Vayuda.”

²⁰ Vayuda lavo tala va hlaya xitiviso xexo, hikuva ndhawu leyi Yesu a nga vambiwela ka yona, a yi ri kusuhi ni muti; naswona, papila a ri tsariwile hi Xiheveru, ni Xilatini, ni Xigriki.

²¹ Hikokwalaho vaprista lavakulu va Vayuda va ku ka Pilato: “U nga tsali leswo: ‘Hosi ya Vayuda’, kambe tsala u ku: ‘Hi yena la nga te: Ndzi hosi ya Vayuda’.”

²² Pilato a hlamula, a ku: “Lexi ndzi nga tsala, ndzi tsarile!”

²³ Loko masocha ma vambile Yesu, va teka tinguvu ta yena, va ti avanyisa hi swiputsa swa mune, va avelana swona; va teka ni nkhancu, kambe nkhancu wa kona a wu nga rhungiwanga, a wu lukiwile wu ri nguvu yin'we ku sukela ehenhla ku fikela ehansi.

²⁴ Kutani va byelana, va ku: “Hi nga wu handzuleni, kambe a hi hoxeni vuhlolotwana, hi ta tiva leswaku wu ta va wa mani.” Leswi a ku ri ku hetisa Tsalwa leri nge: “Va avelene tinguvu ta mina, va kumile xiambalo xa mina hi ku hoxa vuhlolotwana.” Hi swo leswi masocha ma nga endla swona.

²⁵ Enkarhini wolowo, mana wa Yesu, ni makwavo Mariya, nsati wa Klopasi, na Mariya wa Magadala, a va yimile kusuhi ni xihambano.

²⁶ Yesu a vona mana wa yena, a vona ni mudyondzisiwa loyi a a n'wi rhandza a yimile kusuhi na yena, kutani a ku ka mana wa yena: “Manana, vona, n'wana wa wena hi loyi!”

²⁷ Kutani a ku ka mudyondzisiwa: “Vona, mana wa wena hi loyi!” Ku sukela nkarhi wolowo, mudyondzisiwa loyi a n'wi amukela, a n'wi rhurhela ekaya ka yena.

Ta ku fa ka Yesu

²⁸ Yesu, hi ku tiva leswaku swilo hinkwaswo swi hetisekile, a ku: “Ndzi ni torha”, ku ri ku hetisa Matsalwa.

²⁹ Mbita leyi a yi tele hi ntsuvi a yi vekiwile kwalaho, kutani va peta xiponji xi tala hi ntsuvi, va xi tlhoma erihlangeni ra hisopa, va yisa enon'weni wa yena.

³⁰ Loko Yesu a kumile ntsuvi lowu, a ku: “Swi hetisekile.” Kutani a korhamisa nhloko, a fa.

Tsheve ra Yesu ri tlhaviwa

³¹ A ri ri siku leri rhangelaka Savata. Hikokwalaho, Vayuda va kombela Pilato leswaku milenge ya lava vambiweke yi tshoviwa, ni leswaku mintsumbu yi hawuriwa; leswi a ku ri ku endlela leswaku yi nga sali exihambanweni hi Savata, hikuva siku ra kona ra Savata a ri ri lerikulu.

³² Kavaloko masocha ma ta, ma tshova milenge ya lowo rhanga wa lava a va vambiwile na Yesu, ni ya loyi un'wana.

³³ Kutani va ta eka Yesu, kambe loko va vona leswaku ú file, a va n'wi tshovanga milenge.

³⁴ Hambiswiritano, un'wana wa masocha a n'wi tlhava tsheve hi tlhari, kutani kan'we-kan'we ku huma ngati ni mati.

³⁵ Loyi a swi voneke, ú vula vumbhoni leswaku na n'wina mi ta kota ku pfumela. Vumbhoni bya yena byi tiyile, kutani wa swi tiva leswaku ú vula ntiyiso.

³⁶ Hakunene timhaka leti ti humelerile leswaku Tsalwa ri hetiseka, leri nge: “A ku na rhambu na rin'we ra yena leri nga ta tshoviwa.”

³⁷ Nakambe Tsalwa rin'wana ri ri: “Va ta hlalela loyi va n'wi tlhaveke.”

Ta ku lahliwa ka Yesu

³⁸ Endzhaku ka sweswo, Yosefa wa Arimatiya a kombela eka Pilato mpfumelelo wa ku ya hawula ntsumbu wa Yesu. Yosefa loyi a a ri mudyondzisiwa wa Yesu, kambe exihundleni, hi ku chava Vayuda. Kutani Pilato a n'wi pfumelela. Hiloko a ya hawula ntsumbu wa Yesu.

³⁹ Nikodema, loyi a tshamaka a ta nivusiku eka Yesu, na yena a fika a tisa mafurha ya “mirha” lama pfanganyisiweke ni mhangani, lama lavaka ku ringana 30 kg, ku tika ka swona.

⁴⁰ Kutani va teka ntsumbu wa Yesu, va wu phutsela hi minceka ni mirhi yo nun'hwela, hi mukhuva lowu Vayuda va lahlaka ha wona.

⁴¹ A ku ri ni ntanga endhawini leyi a nga vambiwa ka yona, kutani laha ntangeni a ku ri ni sirha lerintshwa, leri a ku nga si lahliwa munhu eka rona.

⁴² Va lata Yesu kona, hikokwalaho ka leswi Vayuda a va tilunghisela Savata, hikuva sirha a ro va kwala kusuhi.