Yohane 15 - BIBELE Mahungu Lamanene

Yesu i nsinya wa xiviri wa vhinya

¹ “Hi mina nsinya wa xiviri wa vhinya; murimi i Tata wa mina.

² Rhavi rin'wana ni rin'wana leri nge ka mina, leri nga vekiki mihandzu, wa ri susa; kambe rin'wana ni rin'wana leri vekaka, wa ri khutulela ri saseka, leswaku ri ta veka ku tlula ni khale.

³ Nisweswi n'wina mi sasekisiwile, hikwalaho ka rito leri ndzi mi byeleke rona.

⁴ Tshamani eka mina, kukotisa leswi na mina ndzi tshamaka eka n'wina. Tanihi leswi rhavi ri nga kotiki ku veka ha roxe loko ri nga namarheli nsinya, na n'wina mi nge swi koti loko mi nga ndzi namarheli.

⁵ Hi mina nsinya wa vhinya; n'wina mi marhavi. Loyi a tshamaka eka mina, kukota leswi na mina ndzi tshamaka eka yena, ú veka mihandzu yo tala; hikuva handle ka mina mi nga ka mi nga koti ku endla nchumu.

⁶ Un'wana ni un'wana la nga tshamiki eka mina, wa cukumetiwa ehandle tanihi rhavi leri omeke. Marhavi layo tano ma hlengeletiwa, kutani ma hoxiwa endzilweni ma tshwa.

⁷ Loko mi tshama eka mina, ni loko marito ya mina ma tshama eka n'wina, kombelani xin'wana ni xin'wana lexi mi xi rhandzaka, kutani mi ta endleriwa xona.

⁸ Tata wa mina ú dzunisiwa hi loko mi veka mihandzu leyo tala, ku kombisa leswaku mi vadyondzisiwa va mina va xiviri.

⁹ “Tanihi leswi Tatana a ndzi rhandzeke, na mina ndzi mi rhandzile; tshamani erirhandzwini ra mina.

¹⁰ Loko mi hlayisa milawu ya mina, mi ta tshama erirhandzwini ra mina, hilaha na mina ndzi hlayiseke milawu ya Tata wa mina, kutani ndzi tshama erirhandzwini ra yena.

¹¹ “Ndzi mi byerile timhaka leti, leswaku ku tsaka ka mina ku va eka n'wina, ni leswaku ku tsaka ka n'wina ku va loku hetisekeke.

¹² Nawu wa mina hi lowu: Hileswaku mi rhandzana, kukotisa leswi na mina ndzi mi rhandzeke.

¹³ A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.

¹⁴ Mi vanakulorhi loko mi endla leswi ndzi mi lerisaka swona.

¹⁵ A ndza ha mi vuri malandza, hikuva nandza a nga tivi lexi n'wini wa yena a xi endlaka; kambe ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina.

¹⁶ A hi n'wina mi ndzi hlawuleke; hi mina ndzi mi hlawuleke, kutani ndzi mi vekile leswaku mi ya, mi ya veka mihandzu, ni leswaku mihandzu ya n'wina yi va kona masiku hinkwawo; kutani xin'wana ni xin'wana lexi mi nga ta xi kombela eka Tatana hi vito ra mina, ú ta mi nyika xona.

¹⁷ Leswi ndzi mi lerisaka swona hileswaku mi rhandzana.

Ta ku vengiwa hi misava

¹⁸ “Loko misava yi mi venga, tivani leswaku yi rhangile yi venga mina, yi nga si mi venga.

¹⁹ Loko a mi ri va misava, misava a yi ta rhandza swa yona. Kambe leswi mi nga riki va misava, ni leswi ndzi mi hlawuleke eka yona, misava ya mi venga.

²⁰ Tsundzukani leswi ndzi mi byeleke swona, loko ndzi te: ‘Nandza a hi nkulu eka n'wini wa yena.’ Loko va ndzi xanisile, na n'wina va ta mi xanisa; loko va hlayisile rito ra mina, ni ra n'wina va ta ri hlayisa.

²¹ Kambe va ta endla hinkwaswo leswi eka n'wina hikwalaho ka mina, hikuva a va tivi Loyi a ndzi rhumeke.

²² Loko a ndzi nga tanga ndzi ta vulavula na vona, ingi va nga ri na nandzu; kambe sweswi a va na lexi va nga tilandzulaka ha xona enandzwini wa vona.

²³ Loyi a ndzi vengaka, ú venga na Tata wa mina.

²⁴ Loko a ndzi nga endlanga, exikarhi ka vona, mintirho leyi yi nga si endliwaka hi munhu na un'we, a va nga ta va na nandzu; kambe va yi vonile mintirho ya mina, kutani va hi vengile, mina na Tata wa mina.

²⁵ A swi ri leswaku rito leri nga tsariwa eNawini wa vona ri hetiseka, leri nge: ‘Va ndzi vengile ntsena ehandle ka mhaka.’

²⁶ “Siku ku nga ta fika Muyimeri, loyi ndzi nga ta mi rhumela yena a ta hi le ka Tatana, a nga Moya wa ntiyiso lowu humaka eka Tatana, ú ta humesa vumbhoni ehenhla ka mina;

²⁷ na n'wina mi timbhoni ta mina, hikuva mi ve na mina ku sukela eku sunguleni.