Yohane 13 - BIBELE Mahungu Lamanene

Ta Yesu loko a hlambisa vadyondzisiwa emilenge

¹ Nkhuvo wa Paseka a wu nga si fika, kambe Yesu a a tiva leswaku nkarhi wa yena wu fikile wa ku suka laha misaveni, a ya eka Tatana. A a rhandza vanhu va yena laha misaveni, kutani ú va rhandzile ngopfu ku yisa eku heteleleni.

² Diyavulosi a ku ri khale a bohile makungu ya leswaku Yudasi, n'wana Simoni Iskariyota, ú ta xenga Yesu. Loko ku ri karhi ku laleriwa,

³ Yesu, hi ku tiva leswaku Tatana ú vekile swilo hinkwaswo emavokweni ya yena, ni leswaku ú humile eka Xikwembu, naswona a ya eka Xikwembu,

⁴ a suka a yima eku laleleni, a susa xifunengelo xa yena, a teka nceka, a tikhama ha wona.

⁵ Kutani a chela mati enkambaneni, a sungula ku hlambisa vadyondzisiwa emilenge, a yi sula hi nceka lowu a tikhameke ha wona.

⁶ A ta eka Simoni Petro; kutani Petro a ku ka yena: “Hosi, xana u lava ku ndzi hlambisa milenge wena xana?”

⁷ Yesu a n'wi hlamula, a ku: “Leswi ndzi swi endlaka a wu si swi tiva sweswi, kambe u ta swi twisisa endzhaku.”

⁸ Petro a ku ka yena: “U nga ka u nga ndzi hlambisi milenge ni siku ni rin'we!” Yesu a n'wi hlamula, a ku: “Loko ndzi nga ku hlambisi, a wu nchumu eka mina.”

⁹ Simoni Petro a ku ka yena: “Hosi, ku nga ri milenge ya mina ntsena, kambe na wona mavoko ni nhloko!”

¹⁰ Yesu a ku ka yena: “Loyi a hlambeke miri a nga ha faneli ku engeta a hlamba, loko yi nga ri milenge ntsena, hikuva hinkwawo miri wa yena wu basile; kutani n'wina, mi basile, kambe ku nga ri hinkwenu.”

¹¹ (Yesu a a tiva loyi a a ri kusuhi ni ku n'wi xenga; hikwalaho a nga vula a ku: “A hi hinkwenu lava mi baseke.”)

¹² Loko a hetile ku va hlambisa milenge, a teka xifunengelo xa yena a tlhela a tshama ehansi, a ku ka vona: “Xana ma twisisa leswi ndzi mi endleleke swona xana?

¹³ Mi ndzi vula ‘Mudyondzisi’ ni ‘Hosi’; ma vurisa, hikuva ndzi yena.

¹⁴ Kutani ke loko mina, Hosi ya n'wina ni Mudyondzisi wa n'wina, ndzi mi hlambisile milenge, na n'wina mi ta fanela ku hlambisana milenge,

¹⁵ hikuva ndzi mi vekele ntila, leswaku na n'wina mi endlisa leswi ndzi nga endlisa swona eka n'wina.

¹⁶ Ndzi tiyisisile ndzi ri ka n'wina: Nandza a hi nkulu eka n'wini wa yena, ni murhumiwa a hi nkulu eka loyi a n'wi rhumeke.

¹⁷ Loko mi tiva swilo leswi, mi tlhela mi swi endla, mi ta va mi katekile.

¹⁸ “A ndzi vulavuli ndzi katsa n'wina hinkwenu; ndzi tiva lava ndzi va hlawuleke; kambe Tsalwa ri fanele ku hetiseka, leri nge: ‘Loyi a dyaka vuswa bya mina, ú ndzi hundzukele, a ndzi khadlanya.’

¹⁹ Ndzi pfa ndzi mi byela sweswi mhaka leyi, yi nga si humelela, leswaku siku yi humelelaka, mi ta pfumela leswaku ‘Mina ndzi yena’.

²⁰ Ndzi tiyisisile ndzi ri ka n'wina: La amukelaka un'wana ni un'wana loyi ndzi n'wi rhumaka, ú amukela mina; ni loyi a ndzi amukelaka, ú amukela Loyi a ndzi rhumeke.”

Yesu a tivisa ta ku xengiwa ka yena

²¹ Loko Yesu a vurile timhaka teto, a karhateka emoyeni, kutani a boxa, a ku: “Ndzi tiyisisile, ndzi ri ka n'wina: Un'wana wa n'wina ú ta ndzi xenga.”

²² Vadyondzisiwa va langutana, va kanakana, hikuva a va nga tivi leswaku ú vula mani.

²³ Un'wana wa vadyondzisiwa, loyi Yesu a a n'wi rhandza, a a tshamile hi tlhelo ra xinene ra Yesu.

²⁴ Hiloko Simoni Petro a n'wi tshunyeta hi tihlo ku vutisa leswaku ú vula mani.

²⁵ Mudyondzisiwa loyi a voyamela eka Yesu, a hlevetela a ku: “Hosi, i mani xana?”

²⁶ Yesu a hlamula, a ku: “Hi loyi ndzi nga ta n'wi nyika vuswa loko ndzi phemile ndzi peta enkambaneni.” Kutani a peta xiphemu xa vuswa, a teka a xi nyika Yudasi n'wana Simoni Iskariyota.

²⁷ Loko Yudasi a xi dyile, a ngheniwa hi Sathana. Hiloko Yesu a ku ka yena: “Lexi u xi endlaka, hatlisa u xi endla.”

²⁸ A ku vanga na un'we wa lava tshameke eswakudyeni, la nga tiva leswaku Yesu a a vulela yini swilo leswi eka yena.

²⁹ Van'wana a va anakanya leswaku, leswi Yudasi a a ri mutameri wa nkwama wa mali, Yesu a a n'wi byela ku ya xava swa nkhuvo leswi pfumalekaka, kumbe ku ya nyika xa nchumu eka swisiwana.

³⁰ Hikokwalaho, loko Yudasi a tekile xiphemu xa vuswa, a hatlisa a huma, hikuva a byi ri vusiku.

Ta nawu lowuntshwa

³¹ Loko Yudasi a humile, Yesu a ku: “Sweswi N'wana-wa-Munhu ú dzunisiwile, na xona Xikwembu xi dzunisiwile eka yena.

³² Leswi xi dzunisiweke eka yena, na xona xi ta n'wi dzunisa emahlweni ka xona; xi ta hatla xi swi endla.

³³ Vana vanga, ndza ha ta va na n'wina nkarhinyana; mi ta ndzi lava, kambe hilaha ndzi byeleke Vayuda hakona loko ndzi te: ‘Laha ndzi yaka kona mi nga ka mi nga ti’, na n'wina sweswi ndza mi byela mhaka leyi.

³⁴ Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n'wina.

³⁵ Hinkwavo va ta tiva leswaku mi vadyondzisiwa va mina, loko mi rhandzana.”

Yesu a tivisa ku landzula ka Petro

³⁶ Simoni Petro a ku ka yena: “Hosi, xana u ya kwihi?” Yesu a n'wi hlamula, a ku: “Laha ndzi yaka kona, u nga ka u nga ndzi landzi sweswi; kambe endzhaku u ta ndzi landza.”

³⁷ Petro a ku ka yena: “Hosi, xana ndzi nga tsandzeka ku ku landza sweswi hikwalaho ka yini ke? Ndzi nga nyiketa vutomi bya mina hikwalaho ka wena!”

³⁸ Yesu a n'wi hlamula, a ku: “Xana u nga nyiketa vutomi bya wena hikwalaho ka mina xana? Ndzi tiyisisile ndzi ri ka wena: Nkuku wu nga si ringa, u ta va u ndzi landzurile kanharhu.”