Yohane 10 - BIBELE Mahungu Lamanene

Xifaniso xa tshanga ra tinyimpfu

¹ “Ndzi tiyisisile ndzi ri ka n'wina: Loyi a nga ngheniki hi nyangwa etshangeni ra tinyimpfu, kambe a khandziya hi kun'wana, i khamba, tlhelo i xigevenga.

² Kambe murisi wa tinyimpfu ú nghena hi nyangwa.

³ Mulanguteri wa nyangwa wa n'wi pfulela, kutani tinyimpfu ti twa rito ra yena; ú vitana tinyimpfu leti nga ta yena hi mavito ya tona, a ti humesela handle.

⁴ Loko a humesile leti nga ta yena hinkwato, a ti rhangela emahlweni, kutani tinyimpfu ta n'wi landzelela, hikuva ti tiva rito ra yena.

⁵ Ti nga ka ti nga landzi munhu loyi ti nga n'wi tiviki; ti ta n'wi balekela, hikuva a ti tivi rito ra vambe.”

⁶ Yesu ú va byerile xifaniso lexi, kambe vona a va twisisanga leswi a a va byela swona.

Yesu i murisi lonene

⁷ Yesu a engeta a ku ka vona: “Ndzi tiyisisile ndzi ri ka n'wina: Hi mina nyangwa ya tinyimpfu.

⁸ Hinkwavo lava teke ndzi nga si fika, i makhamba, tlhelo i swigevenga, kambe tinyimpfu a ti va yingisanga.

⁹ Hi mina nyangwa. Loko munhu a nghena ha mina, ú ta ponisiwa; ú ta nghena a huma, a kuma madyelo.

¹⁰ Muyivi ú tela ntsena ku yiva, ni ku tlhava, ni ku lovisa; mina ndzi tile leswaku tinyimpfu ti va ni vutomi, ti byi kuma hi ntalo.

¹¹ “Hi mina murisi lonene. Murisi lonene ú nyiketa vutomi bya yena a fela tinyimpfu.

¹² La tirhelaka mali, a nga riki murisi kumbe n'wini wa tinyimpfu, ú siya tinyimpfu a tsutsuma loko a vona xinkankanka xi ta; kutani xinkankanka xi ti vutla ni ku ti hangalasa.

¹³ Mhaka hileswaku i mutirheli wa mali ntsena, a nga vuli nchumu hi tinyimpfu.

¹⁴ Hi mina murisi lonene; ndzi tiva leti nga ta mina, ni leti nga ta mina ta ndzi tiva,

¹⁵ hilaha Tatana a ndzi tivaka hakona, ni hilaha na mina ndzi tivaka Tatana hakona; kutani ndzi nyiketa vutomi bya mina ndzi fela tinyimpfu.

¹⁶ Naswona ndzi ni tinyimpfu tin'wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun'we, ti va ni murisi un'we.

¹⁷ Tatana wa ndzi rhandza, hikuva ndzi nyiketa vutomi bya mina, leswaku ndzi ta tlhela ndzi byi kuma.

¹⁸ A ku na munhu la ndzi tekelaka byona, kambe ndza byi nyiketa hi ku rhandza ka mina; ndzi ni matimba ya ku byi nyiketa, ni matimba ya ku tlhela ndzi byi kuma. Hi swona leswi Tata wa mina a ndzi leriseke ku endla swona.”

¹⁹ Ku hambana ku tlhela ku va kona exikarhi ka Vayuda hikwalaho ka marito walawo.

²⁰ Lavo tala exikarhi ka vona a va ku: “Ú ni demona, ú hlangane nhloko! Mi n'wi yingisela yini xana?”

²¹ Kambe van'wana a va ku: “Marito lawa a hi ya munhu la nga ni demona. Xana demona ri nga pfula mahlo ya lavo-fe-mahlo xana?”

Ta Yesu loko a nyenyiwa hi Vayuda

²² Enkarhini wolowo, a ku ri ni nkhuvo wa ku hlawulekisa Tempele eYerusalema. A byi ri vuxika,

²³ kutani Yesu a a famba-famba eTempeleni, erikupakupeni ra Solomoni.

²⁴ Kavaloko Vayuda va n'wi rhendzela, va ku ka yena: “U ta hi kanakanisa ku fikela rini xana? Loko u ri yena Mesiya, hi byele xikan'we u nga rhendzeleki.”

²⁵ Yesu a va hlamula, a ku: “Ndzi mi byerile, kambe a mi pfumeri. Mintirho leyi ndzi yi endlaka hi vito ra Tata wa mina, yi veka vumbhoni ehenhla ka mina.

²⁶ Kambe a mi pfumeri, hikuva a mi tinyimpfu ta mina.

²⁷ Tinyimpfu ta mina ti yingisa rito ra mina; ndza ti tiva, kutani ta ndzi landzelela.

²⁸ Ndzi ti nyika vutomi lebyi nga heriki; ti nga ka ti nga lovi ni siku ni rin'we, naswona a ku na munhu la nga ta ti vutla evokweni ra mina.

²⁹ Tata wa mina la ndzi nyikeke tona, ú nkulukumba ku tlula hinkwaswo; kutani a ku na munhu la kotaka ku vutla nchumu evokweni ra Tatana.

³⁰ Mina na Tatana hi un'we.”

³¹ Vayuda va tlhela va teka maribye va lava ku n'wi khandla.

³² Yesu a ku ka vona: “Ndzi mi kombile mintirho leyo tala yo saseka, leyi humaka eka Tatana; xana, eka yona, hi wihi ntirho lowu mi ndzi khandlelaka wona xana?”

³³ Vayuda va n'wi hlamula va ku: “A hi ku khandleli ntirho lowunene, kambe hileswi u sandzaka Xikwembu, ni leswi u tiendlaka Xikwembu, kasi wena u munhu ntsena.”

³⁴ Yesu a va hlamula, a ku: “Xana a ku tsariwanga eNawini wa n'wina leswaku Xikwembu xi te: ‘Mi swikwembu’ xana?

³⁵ Xi va vurile ‘swikwembu’, vona lava Rito ra Xikwembu ri fikeke eka vona; kutani Tsalwa ri nga ka ri nga herisiwi.

³⁶ Kutani ke, hikwalaho ka yini mi ku: ‘U sandza Xikwembu’, hi mhaka ya leswi ndzi nga te: ‘Ndzi N'wana wa Xikwembu’ xana? Kasi hi mina loyi Tatana a nga n'wi hlawula ni ku n'wi rhuma emisaveni.

³⁷ Loko ndzi nga endli mintirho ya Tata wa mina, mi nga ndzi pfumeli!

³⁸ Kambe loko ndzi endla yona, hambi mi nga ndzi pfumeli, pfumelani yona mintirho, mi ta tiva ni ku twisisa leswaku Tatana ú le ka mina, na mina ndzi le ka Tatana.”

³⁹ Hiloko va ringeta kambe ku n'wi khoma, kambe a chupuka emavokweni ya vona.

⁴⁰ Kutani a tlhela a pela nambu wa Yordani, a ya laha Yohane a a khuvulela kona eku sunguleni, kutani a tshama kona.

⁴¹ Lavo tala va ta ka yena va ku: “Yohane a nga endlanga ni xikombiso ni xin'we, kambe hinkwaswo leswi Yohane a nga swi vula henhla ka munhu loyi, swi tiyile.”

⁴² Kutani lavo tala va pfumela ka yena exivandleni xexo.