Yeremiya 51 - BIBELE Mahungu Lamanene

Xikwembu xi ya emahlweni xi avanyisa tiko ra Vakalediya

¹ HOSI Xikwembu xi vurisa sweswo xi ri: “Vonani! Ndzi ta hungisa moya lowu herisaka, wu ta ba muti wa Babilona ni vaaki va tiko ra Kalediya.

² Ndzi ta rhumela valala ku hlunguhla va le Babilona, va va cukumeta kule ni tiko ra vona, ri sala ri nga ha ri na munhu. Loko siku leri ra khombo ri fika, va ta hlaseriwa hi matlhelo hinkwawo.”

³ Va le Babilona lava kongaka vurha, mi nga va nyiki nkarhi wo copa miseve, kumbe nkarhi wo ambala swisirhelelo. Tinhenha ta vona mi nga ti tsetseleli, mi herisa mavuthu ya vona hinkwawo.

⁴ Vanhu va tiko ra Kalediya a va boxiwe timbanga, va dlawa emagondzweni ya miti ya vona,

⁵ hikuva tiko ra kona ri dyoherile Muhlawuleki wa Israele. Kasi Vaisraele ni va ka Yuda vona a va tshikiwanga hi HOSI ya matimba hinkwawo, Xikwembu xa vona.

⁶ Humani emutini wa Babilona, tiponiseni hinkwenu! Mi nga tshuki mi dlayiwa swin'we ni va le Babilona, hikuva lowu hi wona nkarhi wa HOSI wo tirihisela, yi rihiseta leswi endliweke emutini lowu.

⁷ Muti wa Babilona a wu fana ni xinwelo xa nsuku evokweni ra HOSI Xikwembu: Misava hinkwayo yi nwele kona yi kondza yi pyopyiwa; matiko ma nwile vhinyo ya kona, kutani yi ma hlanganisile tinhloko.

⁸ Rilelani muti wa Babilona, hikuva ku nga ri khale wu ta fayiwa wu wa. Tekani murhi mi tota timbanga ta wona, kumbexana wu ta hola.

⁹ Valuveri va ri: “Hi ringetile ku horisa Babilona, kambe hi tsandzekile. A hi humeni hi famba, un'wana ni un'wana a kongoma etikweni ra rikwavo, hikuva HOSI Xikwembu xi bile muti lowu hi nkhavi lowo vava, lowukulu ngopfu.

¹⁰ HOSI Xikwembu xa hina xi hi lamulerile, a hi yeni hi ya tivisa van'wana eSiyoni leswi xi hi endleleke swona!”

¹¹ HOSI Xikwembu xi rhamba tihosi ta Vameda, xi ti tiyisa, hikuva xi ni makungu ya ku tirihisela hi ku herisa muti wa Babilona, xi rihiseta eka lava hiseke Tempele ya xona. Hikokwalaho ku twala xileriso lexi nge: “Lotani miseve, mi khoma ni switlhangu!

¹² Tlakusani mujeko mi komba rirhangu ra Babilona; engetelani varindzi, valanguteri a va hiteke; tumbelelani valala!” Hakunene HOSI Xikwembu xi bohile makungu khale ehenhla ka lava tshamaka eBabilona, kutani sweswi xi le ku hetiseni ka leswi xi swi vuleke.

¹³ We Babilona, wena u tshameke eribuweni ra nambu lowukulu, u fuwile ngopfu! Kambe vutomi bya wena bya hela, byi tsemiwa kukotisa ngoti.

¹⁴ HOSI ya matimba hinkwawo yi hlambanyile yi ku: “Valala lava ndzi nga ta ku rhumela vona, hakunene va ta ringana ni tinjiya hi ku tala, va ta ba huwa va giya, hileswi va ku hluleke.”

Risimu ro dzunisa Xikwembu

¹⁵ HOSI Xikwembu hi xona xi tumbuluxeke misava hi ntamu wa xona, xi veka masungulo ya yona hi vutlhari, xi vamba ni matilo ha byona.

¹⁶ Loko muvumbi a vulavula, mati ya le henhla ma hakasiwa, mapapa ma tlakuka ma huma evugimamusi; loko a hatimisa rihati, mpfula ya na, moya wu huma laha yena a wu hlayiseke kona.

¹⁷ Hinkwavo lava va swi vonaka, va hlamala va nga swi twisisi; lava tivaka ku n'okisa nsuku va vumba swikwembu, va ta khomisiwa tingana ha swona, hikuva swifaniso leswi a hi swa ntiyiso, ni ku hefemula a swi hefemuli.

¹⁸ A swi tirhi nchumu, vanhu va swi hlekula; siku Xikwembu xi swi baka, swi ta hela swi nyamalala.

¹⁹ Xikwembu xa va ka Yakobo a xi fani ni swikwembu leswi, hikuva hi xona xi vumbeke swilo hinkwaswo, kutani xi ni vanhu lava nga va xona hi xiviri; vito ra xona i HOSI ya matimba hinkwawo.

Matimba ya muti wa Babilona ma ta hela

²⁰ HOSI Xikwembu xi ri: “Wena Babilona, a wu ri nyundzu ni tlhari evokweni ra mina; ndzi ku tirhisile ku hangalasa vamatiko ni ku herisa mimfumo.

²¹ Ndzi ku tirhisile ku dlaya tihanci ni vagadi va tona, ndzi ku tirhisile ku fayetela makalichi ya nyimpi, u dlaya ni vachayeri va kona.

²² Ndzi ku tirhisile ku hlasela va xinuna ni va xisati, lavakulu ni lavatsongo, u hlasela majaha ni vanhwana!

²³ Ndzi ku tirhisile ku hangalasa varisi ni mintlhambi ya vona, varimi ni tihavi ta vona, tihosi ni tindhuna ta tona.”

²⁴ HOSI Xikwembu xi ri: “Ndzi ta ba va le Babilona, ni vanhu hinkwavo va tiko ra Kalediya, mi ri karhi mi swi vona hi mahlo, n'wina va le Siyoni. Va ta riha leswo biha hinkwaswo leswi va swi endleke emutini wa n'wina.

²⁵ We Babilona, yingisa! Mina HOSI ndzi ri u muonhi lonkulu, hi wena u onheke misava hinkwayo, kambe ndzi ta ku khoma entshaveni ya wena ndzi ku cukumeta, u vumbulukela emakocokocweni, kutani ndzi ku hundzula ntshava leyi tshweke.

²⁶ Vanhu a va nga ha kumi maribye ya tinhla eka wena, hambi ma ri maribye ya masungulo, va ta ma pfumala. U ta tshama u ri rhumbi minkarhi hinkwayo, ku vula mina HOSI.”

²⁷ N'wina valala va Babilona, tlakusani mijeko, mi ba mhalamhala mi vitana vamatiko; va rhambeni va ya hlasela Babilona, mi rhamba ni matiko lawa: Ararata, na Mini, na Axikenazi. Hlawulani mufambisi wa mavuthu, mi tisa ni tihanci, ti tala kukota tinjiya leti hahaka.

²⁸ Rhambani vamatiko va ya hlasela Babilona, mi vitana tihosi ta Vameda ni tindhuna ta tona, ni vayimeri va tona ematikweni hinkwawo lawa ti ma fumaka.

²⁹ Misava ya rhurhumela, yi le maxangwini, hikuva makungu ya HOSI Xikwembu ehenhla ka Babilona ma tiyile swinene: Tiko ra Babilona, xi ta ri hundzula mananga, ku nga ha tshami munhu eka rona.

³⁰ Masocha ya Babilona ma cukumete matlhari, ma ya tumbela emakhokholweni ya wona. Ma herile ntamu, ma fana ni vavasati; timbanti ta Babilona ti tshoviwile, tindlu ta kona ta karhi ta tshwa.

³¹ Lava tisaka mahungu va tsutsuma, va ya kotlana na van'wana le ntsindza, hinkwavo va tivisa hosi ya Babilona leswaku muti wa yona wu tekiwile ematlhelweni hinkwawo.

³² Valala va tekile ni mahlaluko, va hisa nhlanga enambyeni, kutani tinhenha ti tsemeka nhlana hi ku chava.

³³ HOSI ya matimba hinkwawo, Xikwembu xa Israele, xi ri: “Muti wa Babilona i xivuya xo hulela eka xona, nkarhi wo xi rhidela wu fikile, ku lo sala nkarhinyana ntsena ku nga si tisiwa mavele!”

Xikwembu xi ta rihiseta eka valala va Yerusalema

³⁴ Muti wa Yerusalema wu ri: “Nebukadnetsara hosi ya Babilona ú ndzi dyile a ndzi phorha; ú ndzi endlile xibya xo ka xi nga ri na nchumu. Ú ndzi mitile onge a ri xihontlovila, a tata khwiri ra yena hi vanhu va mina, lava saleke a va cukumeta kule na yena.

³⁵ Muti wa Babilona a wu biwe, hikuva wu hi xanisile ngopfu, hina hinkwerhu hi akeke eSiyoni. Vanhu va tiko ra Kalediya a va dlayiwe, hikwalaho ka ngati ya hina leyi va yi halateke, ku vula mina Yerusalema.”

³⁶ HOSI Xikwembu xi hlamula xi ku: “Yingisani! Ndzi ta mi lwela, ndzi rihiseta leswi va le Babilona va mi endleke swona: Ndzi ta phyisa milambu ya vona ni swihlovo swa vona.

³⁷ Babilona ú ta hundzuka rhumbi ni bako ra timhungubye; vahundzi va ndlela va ta hlakahla tinhloko va chava, hikuva a ku nga ha tshami munhu kona.

³⁸ “Va le Babilona va bonga hinkwavo ku fana ni tinghala, va mpfhumpfha kukota swinghalana.

³⁹ Loko va ha nyanyukile, ndzi ta va lulamisela nkhuvo lowukulu, ndzi va pyopyisa va kondza va nga ha titivi, kutani va ta etlela vurhongo lebyikulu; va nga ka va nga ha xalamuki, ku vula mina HOSI.

⁴⁰ Ndzi ta va byisa, va ya dlayiwa kukota swinyimpfana, va tlhaviwa tanihi swiphongho ni makhuna.”

Marito yo hetelela ehenhla ka Babilona

⁴¹ Langutani, muti wa Babilona wa tekiwa, wa khomiwa muti lowu wo dzuneka emisaveni hinkwayo; vonani, muti wa kona wu hundzukile xilo xo chavisa ematikweni hinkwawo!

⁴² Valala va tile kukota mati ya lwandle va wu funengeta, va ba huwa va wu khubumeta tanihi magandlati.

⁴³ Swimitana swa Babilona i marhumbi layo chavisa, tiko ra kona ri omile, ri hundzuke mananga; vaaki, ku hava, vanhu a va ha hundzi hi kona.

⁴⁴ HOSI Xikwembu xi ri: “Ndzi ta avanyisa Bele, xikwembu xa va le Babilona, ndzi xi sindzisa ku hlanta leswi xi swi miteke, kutani vamatiko va ta tshika ku tshirimukela eka xona! Hambi ri ri rirhangu ra Babilona ri ta wa!

⁴⁵ N'wina vanhu va mina, humani eBabilona, tiponiseni mi baleka vukari bya mina lebyi pfurhaka.

⁴⁶ Mi nga ha tsemeki nhlana, mi nga chavi, loko mi twa leswi humelelaka etikweni ra Babilona, hikuva lembe leri, mi twa swin'wana, haxawu mi ta twa swin'wana kambe: Emisaveni ku ta va ni tinyimpi, hosi yin'wana yi ta pfukela hosi yin'wana!

⁴⁷ “Hikokwalaho yingisani! Ku nga ri khale, ndzi ta ba swikwembu swa hava swa le Babilona; tiko ra kona hinkwaro ri ta khomisiwa tingana, lava dlayiweke emutini va ta tshikiwa, va ku, n'wálálálá!

⁴⁸ Matilo ni misava ni hinkwaswo leswi nga ka swona swi ta tsaka swi ba minkulungwana hi mhaka ya Babilona, hikuva lava fanelaka ku herisa muti lowu va ta ta va huma en'walungwini. Ndzi vula sweswo mina HOSI.”

⁴⁹ Yeremiya u ri: “Va le Babilona va dlayile vanhu lavo tala emisaveni hinkwayo, sweswi hi vona va fanelaka ku fa, hikuva va dlayile Vaisraele.

⁵⁰ N'wina Vaisraele lava mi poneke ku dlayiwa, hatlisani mi suka eBabilona, mi nga ha tshami; mi nga rivali ku khongela HOSI Xikwembu hambiloko ma ha ri kule, na wona muti wa Yerusalema mi nga wu rivali.

⁵¹ N'wina a mi ku: ‘Hi ni tingana, hikuva hi tsongahatiwile ngopfu, hi tifihla swikandza, hikuva valala va hi khomise tingana: Vamatiko lava va nghenile eTempeleni, yi nga yindlu leyo hlawuleka ya HOSI Xikwembu.’

⁵² Kambe HOSI Xikwembu xi ri ka n'wina: ‘Vonani, ku nga ri khale ndzi ta ba swikwembu swa hava swa le Babilona; vanhu lava boxiweke timbanga, va ta konya etikweni ra kona hinkwaro.

⁵³ Hambi vanhu va le Babilona va nga tikurisa va dliva ni tilo, hambi va nga tiyisa makhokholo ya vona etintshaveni, ndzi ta va rhumela vahlaseri va va herisa, ku vula mina HOSI.’ ”

⁵⁴ Twanani huwa leyi humaka eBabilona, i xirilo lexikulu xa lava herisiwaka etikweni ra Vakalediya.

⁵⁵ HOSI Xikwembu xi le ku ri hlaseleni; vanhu va rona va huwelela, va ba huwa ku fana ni magandlati ya lwandle, kambe Xikwembu xi ta va pfala milomo.

⁵⁶ Vahlaseri va fikile eBabilona, va le ku lweni! Tinhenha ta Babilona ta khomiwa, ni vurha bya tona bya tshoveleriwa, hikuva HOSI Xikwembu i Xikwembu lexi baka lavo biha, xi ta rihiseta hakunene.

⁵⁷ HOSI Xikwembu xi ri: “Ndzi ta pyopyisa tindhuna ni tintlhari, varhangeri ni vafambisi va mavuthu ni tinhenha! Ndzi ta va etlerisa vurhongo lebyikulu, kutani a va nga ha xalamuki, ku vula mina Mufumi, HOSI ya matimba hinkwawo.

⁵⁸ Rirhangu lero anama ra muti wa Babilona ri ta mbundzumuxeriwa makumu, ni tinyangwa ta wona leti tlakukeke, ti ta tshwa ti hela. Vamatiko va ta va va tirhele mahala, va tikarhatela ntsena leswi tshweke! Ndzi vula sweswo, mina HOSI ya matimba hinkwawo.”

Ta Yeremiya loko a rhumela mahungu le Babilona

^59-60 Timhaka leti hinkwato ta muti wa Babilona ni ta makhombo hinkwawo lawa a ma ri kusuhi ni ku humelela kona, muprofeta Yeremiya ú ri tsarile ebukwini. Kutani loko Sedekiyasi hosi ya Yuda a yisiwa evukhumbini le Babilona, hi lembe ra vumune ra ku fuma ka yena etikweni ra Yuda, a a ri na Seraya n'wana Neriya wa Maaseya, mulanguteri wa swa le ntsindza. Kutani Yeremiya a ya vulavula na Seraya,

⁶¹ a ku ka yena: “Buku hi leyi! Loko u fika eBabilona, u fanele ku hlayela vanhu marito ya yona hinkwawo.

⁶² Kutani u ta khongela u ku: ‘We HOSI Xikwembu, hi wena u vuleke leswaku u lava ku herisa ndhawu leyi. Hikokwalaho a ku nga ha tshami munhu eka yona, hambi swi ri swifuwo a swi nga ha kumeki eka yona; yi ta va yi hundzuke rhumbi hilaha ku nga heriki!’

⁶³ Loko u hetile ku hlaya buku, u ta bohelela ribye eka yona, u yi hoxa enambyeni wa Yufrata,

⁶⁴ kutani u ta ku: ‘Muti wa Babilona wu ta mbombomerisa sweswo, a wu nga ha tlheli wu vonaka, hikuva HOSI Xikwembu xi ta va xi wu vangerile maxangu, [kutani vamatiko va ta va va tikarhetele mahala!’ ”] Marito ya Yeremiya ma hela kwala.