Yeremiya 45 - BIBELE Mahungu Lamanene

Xikwembu xi khongotela Baruku

¹ Hi lembe ra vumune ra ku fuma ka Yoyakimi n'wana Yosiyasi hosi ya Yuda, Baruku n'wana Neriya, a heta ku tsala ebukwini marito hinkwawo lama humaka enon'weni wa muprofeta Yeremiya. Kutani Yeremiya a vulavula na Baruku, a ku:

² “We Baruku, HOSI Xikwembu xa Israele xi ni rito eka wena,

³ hikuva wena wa vilela u ku: ‘Ndzi le khombyeni! HOSI Xikwembu xi tlhandlekerile maxangu ehenhla ka ku vaviseka ka mina. Eku konyeni ka mina, ndzi hela ntamu, ndzi pfumala ni ku wisa!’

⁴ Kambe HOSI Xikwembu xi ndzi lerisile ku ku tivisa marito ya xona lama nge: ‘Yingisa! Ndzi faya leswi ndzi swi akeke; leswi ndzi swi byaleke, ndza swi tsuvula; ndzi endlisa sweswo emisaveni hinkwayo.

⁵ Kutani xana u navela ku kuma swilo leswikulu ku tlula van'wana xana? Tshika ku navela koloko, hikuva mina HOSI ndzi le ku tiseni ka makhombo ehenhla ka vanhu hinkwavo. Kambe wena, hinkwako laha u nga ta ya kona, u ta ponisa vutomi bya wena.’ ”