Yeremiya 17 - BIBELE Mahungu Lamanene

Nandzu wa va ka Yuda wu le rivaleni

¹ HOSI Xikwembu xi ri: “Swidyoho swa va ka Yuda swi tsariwile etimbilwini ta vona ni le timhondzweni ta tialitari ta vona, ku fana ni loko marito ma tsariwa eribyeni ra xiphepherhele hi peni yo nonon'hwa ya nsimbhi kumbe ya dayimani.

² Vanhu va ka vona a va tshiki ku anakanya tialitari ni timhandze ta vona ta vukhongeri bya hava, leti dzimiweke eswitsungeni leswo hlawuleka kusuhi ni mirhi leyi tlhumeke.

³ N'wina mi khongelaka le handle etintshaveni, tivani leswaku ndzi ta nyiketa rifuwo ra n'wina ni xuma xa n'wina hinkwaxo eka valala, va swi phangha, hikwalaho ka swidyoho leswi mi swi endlaka, eswitsungeni leswo hlawuleka swa tiko ra n'wina hinkwaro.

⁴ Ndzhaka ya n'wina yi ta susiwa emavokweni ya n'wina, ri nga tiko leri a ndzi mi nyikile rona. Ndzi ta mi hundzula mahlonga ya valala va n'wina, mi yisiwa etikweni leri mi nga ri tiviki, hikuva mi tivangele ndzilo wa vukari bya mina; wu ta pfurha wu nga timeki.”

Ku tshemba munhu swi tlula hi ku tshemba Xikwembu

⁵ HOSI Xikwembu xi vurisa sweswo xi ri: “Ú ni khombo munhu loyi a tshembaka munhu-kulobye, a tiseketela hi xivumbiwa xa nyama ni ngati, loyi miehleketo ya yena yi ndzi fularhelaka!

⁶ Munhu wo tano a nga ka a nga kumi minkateko, kambe ú ta fana ni ximudyana lexi milaka emananga ya makwandzasi, lawa ku nga tshamiki munhu eka wona.

⁷ “Kambe ku katekile munhu loyi a ndzi tshembaka mina HOSI, loyi a tiseketelaka hi mina.

⁸ Ú fana ni murhi lowu milaka kusuhi ni nambu, lowu timitsu ta wona ti kumaka mati; murhi wa kona a wu chavi dyambu, matluka ya wona a ma vuni, enkarhini wa dyandza a wu omi, a wu tshiki ku veka mihandzu.

⁹ “Miehleketo ya munhu ya kanganyisa, yi tshama yi borile! Yi nga tiva hi mani,

¹⁰ loko ku nga ri hi mina HOSI, hikuva ndzi kambisisa miehleketo, ndzi ringeta ni timbilu ta vanhu, kutani ndzi hakela un'wana ni un'wana hi ku ya hi mahanyelo ya yena ni leswi a swi endlaka.”

¹¹ Munhu loyi a kumaka rifuwo hi ndlela yo homboloka, ú fana ni n'hwari leyi fukamelaka matandza lama nga riki ya yona; rifuwo ra kona a ri nga hlweli ku dzudzeka, eku heteleleni ú ta hundzuka xiphukuphuku.

Xikwembu i xihlovo xa vutomi

¹² Xivandla xa Tempele ya hina leyo hlawuleka i xiluvelo lexo saseka lexi vekiweke henhla ku sukela khale.

¹³ We HOSI, wena loyi Vaisraele va ku tshembaka, lava va ku tshikaka va ta nyuma hinkwavo; mavito ya lava va ku fularhelaka, ma ta tsariwa exivandleni xa vafi, hikuva va ku tshikile we HOSI, wena xihlovo xa mati lama khulakaka.

Yeremiya ú kombela ku pfuniwa

¹⁴ Ndzi hanyise we HOSI, ndzi ta hanya, ndzi ponise, kutani ndzi ta pona, hikuva ndzi dzunisa wena ntsena.

¹⁵ Vanhu va ndzi vutisa va ku: “Xana leswi vuriweke hi HOSI Xikwembu, swi kwihi ke? A swi te!”

¹⁶ A hi mina ndzi nga ku sindzisa ku vanga makhombo; hambi nkarhi wa maxangu, a hi mina ndzi va naveleleke wona; wena wa swi tiva, hikuva ndzi vulavurile emahlweni ka wena.

¹⁷ We HOSI, u nga ndzi hlongoli, hikuva enkarhini wa maxangu ndzi tumbela eka wena.

¹⁸ Lava va ndzi xanisaka a va khome hi tingana, kambe mina u nga ndzi nyumisi; chavisa vanhu lava, mina ndzi nga chavisiwi hi nchumu; va tisele nkarhi wa makhombo, u va heta matimba u vuyelela!

Ta ku hlayisa siku ra Savata

¹⁹ Kutani HOSI Xikwembu xi vulavula na mina xi ku: “Famba u ya yima enyangweni leyikulu leyi tihosi ta va ka Yuda ti nghenaka ni ku huma ha yona; u ya ni le tinyangweni letin'wana hinkwato ta Yerusalema.

²⁰ Kutani u va byela u ku: ‘N'wina tihosi ta tiko ra Yuda ni vanhu va n'wina hinkwavo, na n'wina vaaki hinkwavo va Yerusalema lava nghenaka hi tinyangwa leti, yingisani marito ya HOSI Xikwembu, lama nge:

²¹ Tivoneleni, mi nga tshuki mi rhwala nchumu hi siku ra Savata, naswona mi nga nghenisi nchumu etinyangweni ta Yerusalema hi siku rero.

²² Hi siku ra Savata, mi nga tshuki mi huma ni mindzhwalo emitini ya n'wina, hambi ku tirha mi nga tirhi, kambe mi hlayisa siku ra kona ri tshama ri hlawulekile, hilaha ndzi leriseke vatata wa n'wina hakona.

²³ Vona va arile ku rhiya ndleve va yingisa, va tiomisile tinhloko leswaku va nga tshuki va twa kumbe ku amukela switsundzuxo swa mina.

²⁴ “ ‘Kambe mina HOSI ndzi ri, loko mi ndzi yingisa mi nga nghenisi nchumu etinyangweni ta muti lowu hi siku ra Savata, ni loko mi hlayisa siku leri ri tshama ri hlawulekile mi nga tirhi ntirho na wun'we hi siku rero,

²⁵ minkarhi hinkwayo ku ta va ni tihosi leti nga ta tshama exiluvelweni xa Davhida; ti ta nghena emutini hi tinyangwa ta kona ti ri ni tindhuna ta tona ni vanhu va ka Yuda ni vaaki va Yerusalema. Va ta nghena va gadile tihanci va khandziyile ni makalichi ya nyimpi; kutani muti lowu wu ta va ni vanhu hilaha ku nga heriki.

²⁶ Vanhu va ta ta va huma emitini ya Yuda ni le tindhawini leti rhendzeleke Yerusalema; van'wana va ta huma etikweni ra Benjamini, ni le timbaleni, ni le magangeni, ni le dzongeni. Vanhu lava va ta humesa magandzelo lama hisiwaka ya nyama ni ya mapa ni ya mirhi ya risuna, va humesa ni minkhenso endlwini ya mina HOSI.

²⁷ Kambe loko mi ala ku ndzi yingisa, mi nga pfumeli ku hlayisa siku ra Savata leswaku ri tshama ri hlawulekile, ni loko mi rhwala swilo mi swi nghenisa etinyangweni ta Yerusalema hi siku rero, vukari bya mina byi ta pfurha byi nga timeki, byi hisa tindlu leto saseka ta Yerusalema.’ ”