Varhoma 16 - BIBELE Mahungu Lamanene

Marungulo

¹ Ndzi mi tivisa Manana Febe, makwerhu eHosini la tirhelaka kereke ya le Kenikreya;

² n'wi amukeleni hi vito ra Hosi, hilaha vahlawuriwa va Xikwembu va fanelaka ku amukeriwa hakona; kutani mi n'wi pfuna hi xin'wana ni xin'wana lexi a nga kombelaka leswaku mi n'wi pfuna ha xona, hikuva ú pfunile lavo tala, na mina ú ndzi pfunile.

³ Ndzi runguleleni Prisila na Akwila, vatirhi-kulorhi entirhweni wa Kriste Yesu,

⁴ lava nyiketeke vutomi bya vona ku ndzi ponisa; a hi mina ntsena loyi a va nkhensaka, kambe na tona tikereke hinkwato ta vamatiko ta va nkhensa.

⁵ Ndzi runguleleni na yona kereke leyi hlanganaka endlwini ya vona. Ndzi runguleleni na Epayineto, murhandziwa wanga, a nga yena wo sungula ku pfumela eka Kriste le Asiya.

⁶ Ndzi runguleleni Mariya la tirheke ngopfu exikarhi ka n'wina.

⁷ Ndzi runguleleni Androniko na Yuniya, va nga Vayuda va ka hina lava a ndzi ri na vona ekhotsweni; va tiveka swinene exikarhi ka vaapostola, naswona va ndzi rhangele ku va va ka Kriste.

⁸ Ndzi runguleleni Ampliyato, murhandziwa wanga eHosini.

⁹ Ndzi runguleleni Urbano, mutirhi-kulorhi entirhweni wa Kriste, na Stako, murhandziwa wanga.

¹⁰ Ndzi runguleleni Apele, munhu la tshembekeke evukristeni. Ndzi runguleleni va ndyangu wa Aristobulo.

¹¹ Ndzi runguleleni Herodiyoni, Muyuda wa ka hina. Ndzi runguleleni lava nga vakriste endyangwini wa Narkiso.

¹² Ndzi runguleleni Trifena na Trifosa, vamanana lava tirhelaka Hosi. Ndzi runguleleni Persida, manana la rhandziwaka, la tirheleke Hosi hi leswo tala.

¹³ Ndzi runguleleni Rhufasi, mukriste la tivekaka swinene, mi rungula ni mana wa yena, loyi a nga manana ni le ka mina.

¹⁴ Ndzi runguleleni Asinkrito na Filego, na Hermesi, na Patroba, na Hermasi, ni vamakwavo eHosini lava nga na vona.

¹⁵ Ndzi runguleleni Filologo, na Yuliya, na Neriya, ni makwavo wa xisati, na Olimpa, ni vahlawuriwa va Xikwembu hinkwavo lava nga na vona.

¹⁶ Xewetanani hi ku ntswontswana ka vukwavo. Tikereke hinkwato ta Kriste ta mi rungula.

¹⁷ Ndza mi khongotela vamakwerhu, ndzi ri: Mi tivonela eka lava pfuxaka ku avana, ni swikhunguvanyiso, lava va mi humesaka etidyondzweni leti mi ti kumeke; hambanani na vona;

¹⁸ hikuva lavo tano a va tirheli Hosi ya hina Kriste, kambe va tirhela ku navela ka vona ntsena; hi ku nandzihisa marito ni ku sasekisa mavulavulele, va hambukisa mianakanyo ya lava nga tiviki nchumu.

¹⁹ Ku yingisa ka n'wina ku twakele eka vanhu hinkwavo; ndzi tsaka hi n'wina emhakeni leyi; kambe ndzi lava leswaku mi va lavo tlhariha hi tlhelo ra leswinene, ni lava nga tiviki nchumu hi tlhelo ra leswo biha.

²⁰ Xikwembu lexi nyikaka ku rhula, xi ta hatla xi pfotlosela Santhana ehansi ka milenge ya n'wina. Tintswalo ta Hosi ya hina Yesu, a ti ve na n'wina!

²¹ Mutirhi-kulorhi Timotiya, wa mi rungula; na vona Vayuda va ka hina va Lukiyo na Yasoni na Sosipatro, va mi rungula.

²² Mina Tertiyo, mutsari wa papila leri, ndza mi rungula hi vito ra Hosi.

²³ Gayo, loyi a nga tshama a rhurhela mina ni kereke hinkwayo, wa mi rungula. Erasto, mutameri wa nkwama wa muti, na Kwarto makwerhu, va mi rungula. [

²⁴ Tintswalo ta Hosi ya hina Yesu Kriste a ti ve na n'wina hinkwenu. Amen!]

Risimu ro dzunisa

²⁵ Eka yena la kotaka ku mi tiyisa, hi ku ya hi Mahungu Lamanene lawa ndzi ma dyondzisaka, ma nga mahungu ya Yesu Kriste, naswona hi ku ya hi xihundla lexi nga hlavuteriwa, xi nga xihundla lexi a xi fihlekile malembe ni malembe,

²⁶ kambe sweswi xi humeseriweke erivaleni hi Matsalwa ya vaprofeta, hi ku landza ku lerisa ka Xikwembu lexi nga heriki, xona xihundla lexi xi nga tivisiwa vamatiko hinkwavo, leswaku vanhu va pfumela, va tlhela va yingisa,

²⁷ eka Xikwembu xi ri xoxe xa vutlhari, a ku ve ku dzuneka ha Yesu Kriste, hi minkarhi ni minkarhi, Amen!