Varhoma 14 - BIBELE Mahungu Lamanene

U nga avanyisi makwenu!

¹ Loyi a tsaneke eku pfumeleni, n'wi amukeleni, kambe mi nga phikisani na yena loko mi hambana hi mianakanyo.

² Un'wana la nga ni matimba eku pfumeleni, ú dya xin'wana ni xin'wana; un'wana la tsaneke eku pfumeleni ú dya matsavu ntsena.

³ Loyi a dyaka xin'wana ni xin'wana, a nga tshuki a sola loyi a nga dyiki; ni loyi a nga dyiki xin'wana ni xin'wana, a nga tshuki a avanyisa loyi a dyaka, hikuva i Xikwembu lexi xi n'wi amukeleke.

⁴ Xana u mani wena ku avanyisa nandza wa munhu un'wana? Hambi a yima kumbe ku wa, sweswo swi tiviwa hi n'wini wa yena; kambe ú ta yima, hikuva Hosi ya swi kota ku n'wi pfuxa a yima.

⁵ Un'wana ú pimanisa leswaku siku rin'wana ri tlula lerin'wana; kasi un'wana ú pimanisa leswaku masiku hinkwawo ma fana. Un'wana ni un'wana ú fanele ku tipimanisela swinene hi yexe emiehleketweni ya yena.

⁶ Loyi a hlawulekisaka siku, ú ri hlawulekisela Hosi; ni loyi a dyaka xin'wana ni xin'wana, ú endlela Hosi, hikuva ú nkhensa Xikwembu ha swona. Na yena loyi a nga dyiki xin'wana ni xin'wana, ú endlela Hosi, kutani ú nkhensa Xikwembu.

⁷ Hikuva ku hava na un'we wa hina la tihanyelaka, naswona ku hava munhu la tifelaka; loko hi hanya, hi hanyela Hosi;

⁸ loko hi fa, hi fela Hosi; hikokwalaho, hambi hi hanya, hambi hi fa, hi va Hosi.

⁹ Hikuva Kriste ú file, a tlhela a pfuka a hanya, leswaku a ta va Hosi ya lava feke ni ya lava hanyaka.

¹⁰ Xana wena u avanyisela yini makwenu xana? Naswona u solela yini makwenu? Kasi hinkwerhu hi ta humelela emahlweni ka xiluvelo xa Xikwembu ku avanyisiwa.

¹¹ Hikuva eMatsalweni, Hosi yi ri: “Mina ndza hanya, hikokwalaho vanhu hinkwavo va ta ndzi nkhinsamela, hinkwavo va ta ku, ndzi Xikwembu.”

¹² Hi mukhuva wolowo, un'wana ni un'wana wa hina ú ta tihlamulela hi yexe emahlweni ka Xikwembu.

U nga khunguvanyisi makwenu!

¹³ Loko swi ri tano, a hi tshikeni ku avanyisana. Ematshan'wini ya swona, tiboheni leswaku mi nga veki endleleni ya makwenu xo n'wi khunguvanyisa kumbe ku n'wi wisa.

¹⁴ Ndza swi tiva ni ku kholwa swinene, hikwalaho ka Hosi Yesu, leswaku ku hava xilo ni xin'we lexi, hi xoxe, xi nyameke; kambe xilo xi nyamile ntsena eka yena loyi a anakanyaka leswaku xi nyamile.

¹⁵ Loko makwenu a twa ku vaviseka hi mhaka ya leswi wena u swi dyaka, a wa ha fambi hi rirhandzu. U nga tshuki u lovisa la nga feriwa hi Kriste hi mhaka ya leswi wena u swi dyaka.

¹⁶ Mi nga pfumeli leswaku leswi nga swinene eka n'wina swi soriwa.

¹⁷ Hikuva Mfumo wa Xikwembu a hi ku dya, a hi ku nwa; kambe i ku lulama, ni ku rhula, ni ku tsaka, hi matimba ya Moya lowo Kwetsima.

¹⁸ Loyi a tirhelaka Kriste hi mukhuva wolowo, ú tsakisa Xikwembu, naswona ú nkhensiwa hi vanhu.

¹⁹ Loko swi ri tano ke, a hi laveni leswi hi pfunaka ku hanya hi ku rhula, ni ku akisana.

²⁰ U nga hahluli ntirho wa Xikwembu hikwalaho ka swakudya. Swilo hinkwaswo swi tengile; kambe i ku hoxa loko munhu, hi ku dya ka yena, a khunguvanyisa van'wana.

²¹ Swi sasekile loko u nga dyi nyama kumbe u nga nwi vhinyo, ni loko u titsona xilo xihi ni xihi lexi nga vangelaka makwenu ku khunguvanyeka.

²² Leswi u swi kholwaka wena embilwini ya wena, a yi ve mhaka ya wena ni Xikwembu. Ku katekile munhu loyi a nga titwiki ku hoxa eswilweni leswi a vonaka leswaku swi tengile.

²³ Kambe loyi a kanakanaka, wa avanyisiwa loko a dya, hikuva a nga endli hi ku kholwa; kutani xin'wana ni xin'wana lexi nga endliwiki hi ku kholwa, i xidyoho.