Varhoma 13 - BIBELE Mahungu Lamanene

Ta ku yingisa vuhosi

¹ Munhu un'wana ni un'wana a a tiveke ehansi ka tihosi, hikuva a ku na vuhosi lebyi nga humiki eka Xikwembu; kutani tihosi leti nga kona, ti vekiwile hi Xikwembu.

² Hikwalaho loyi a solaka vuhosi, ú sola ku lerisa ka Xikwembu; kutani lava solaka, va tivangela ku avanyisiwa.

³ Tihosi i valala ku nga ri eka lava endlaka leswinene, kambe eka lava endlaka leswo biha. Xana u lava ku hanya u nga chavi emahlweni ka hosi xana? Endla leswinene, yi ta ku nkhensa;

⁴ hikuva hosi i nandza wa Xikwembu ku ku pfuna. Kambe loko u endla leswo biha, u fanele ku chava, hikuva hosi a yi lo halahala ku tamela banga; yi rhumiwile hi Xikwembu ku va murihiseti la baka mudyohi.

⁵ Hikwalaho swa fanela leswaku munhu a tiveka ehansi ka vuhosi, ku nga ri ntsena hikwalaho ka ku chava ku biwa, kambe ku ri hikwalaho ka ripfalo.

⁶ Nakambe hi swona leswi endlaka leswaku mi humesa ndzuvo; hikuva tihosi i vatirhi va Xikwembu, lava tinyiketaka ku tirha ntirho wolowo.

⁷ Humeselani hinkwavo tifanelo ta vona; loyi a fanelaka ku amukela ndzuvo, n'wi nyikeni; loyi a fanelaka ku luviwa, n'wi luveni; loyi a fanelaka ku chaviwa, n'wi chaveni; loyi a fanelaka ku xiximiwa, n'wi xiximeni.

Rirhandzu ra vuxaka

⁸ Mi nga tshuki mi va ni nandzu eka munhu na un'we, loko wu nga ri wa ku rhandzana; hikuva, la rhandzaka van'wana, ú hetisisile Nawu.

⁹ Hakunene milawu leyi nge: “U nga tshuki u oswa, u nga tshuki u dlaya, u nga tshuki u yiva, u nga tshuki u navela swa van'wana”, hambi yi ri milawu yin'wana hinkwayo, yi katsakanyiwa hi rito leri nge: “Rhandza munhu-kuloni kukota loko u tirhandza.”

¹⁰ La nga ni rirhandzu, a nga endleli munhu-kulobye swo biha. Hikokwalaho, rirhandzu ri hetisisa Nawu.

Siku ra ku vuya ka Kriste ri kusuhi

¹¹ Endlani leswi, hikuva mi tiva leswaku i nkarhi wihi sweswi: Hi wona nkarhi wa n'wina wa ku pfuka evurhongweni; hikuva namuntlha, ku ponisiwa ku kusuhi ku tlula siku hi pfumeleke.

¹² Vusiku byi hundzile, dyambu ri lava ku huma. Hikokwalaho, a hi cukumeteni mintirho ya munyama, kutani hi hakarha matlhari ya ku vonakala.

¹³ A hi fambeni hi mukhuva lowu fanelaka, kukotisa vanhu lava fambaka ni nhlekanhi, ku nga ri hi makampfu ni ku pyopyiwa, ku nga ri hi swa manyala ni vuoswi, ku nga ri hi timholovo ni mavondzo;

¹⁴ kambe mi ambala Hosi Yesu Kriste, kutani mi nga tsetseleri swa ntumbuluko wa n'wina wa laha misaveni, hi ku wu kolwisa eku naveleni ka wona.