Varhoma 11 - BIBELE Mahungu Lamanene

Masalela ya Vaisraele

¹ Sweswi ndzi vutisa ndzi ri: Xana Xikwembu xi cukumetile tiko ra xona ke? Niswitsanana! Hikuva na mina ndzi Muisraele, wa rixaka ra Abrahama, wa nyimba ya Benjamini.

² Xikwembu a xi cukumetanga tiko ra xona leri xi ri tiveke ka ha ri ku sunguleni. Xana a mi tivi leswi Tsalwa ri vulaka swona ehenhla ka Eliya xana? Ú vilerile emahlweni ka Xikwembu hikwalaho ka Vaisraele, a ku:

³ “Hosi, va dlele vaprofeta va wena, va mbundzumuxile tialitari ta wena; ku lo sala mina ntsena, kutani va lava ku ndzi dlaya!”

⁴ Kambe Xikwembu xi n'wi hlamurile yini xana? Xi te: “Ndzi tihlayisele vavanuna va 7 000, lava nga nkhinsamelangiki Baali.”

⁵ Swa ha ri tano ni namuntlha: Ku ni masalela ya vanhu lava Xikwembu xi va hlawuleke hi tintswalo.

⁶ Kwalaho ke, loko ku ri hi tintswalo, a swi humi emintirhweni; hikuva loko ku ri hi mintirho, tintswalo a ta ha ri tintswalo.

⁷ Xana hi nga vula yini? Leswi Vaisraele a va swi lava, a va swi kumanga, kambe lava hlawuriweke hi Xikwembu va swi kumile. Lavan'wana va nonon'hwisiwile,

⁸ hilaha ku tsariweke hakona, va ku: “Xikwembu xi va nyikile moya wo tlanyala, ni mahlo lama nga kotiki ku vona, ni tindleve leti nga kotiki ku twa, ku fikela siku ra namuntlha.”

⁹ Davhida na yena ú te: “A swi ta va swona loko minkhuvo ya vona yi va hundzukela ntlhamu ni rindzi, yi va khugula ni ku va rihiseta!

¹⁰ Mahlo ya vona a ma hundzuke munyama, leswaku ma nga ha koti ku vona, ni minhlana ya vona, a yi tshame yi govekile!”

Ku ponisiwa ka vamatiko

¹¹ Ndzi engeta ndzi vutisa ndzi ku: Xana Vaisraele va khugukele ku wela makumu xana? Niswitsanana! Kambe hi nandzu wa ku wa ka vona, ku ponisiwa ku fikela vamatiko, leswaku Vaisraele va ta va ni mavondzo.

¹² Kutani leswi nandzu wa ku wa ka vona wu endleke leswaku minkateko yi tala emisaveni, ni leswi ku tsandzeka ka vona ku endleke leswaku minkateko yi talela vamatiko, ngopfu-ngopfu ku vuya ka Vaisraele hi ntalo, ku ta tisa minkateko leyikulu!

¹³ Kutani sweswi ndzi vulavula na n'wina vamatiko, ndzi ri: Leswi ndzi nga muapostola wa vamatiko, ndzi tinyungubyisa hi ntirho wa mina

¹⁴ leswaku kumbexana ndzi nga endla va rixaka ra ka hina va va ni mavondzo, ndzi ta ponisa van'wana va vona.

¹⁵ Hikuva loko ku cukumetiwa ka vona ku endlile leswaku misava yi vuyelelana ni Xikwembu, ku amukeriwa ka vona hi Xikwembu ku ta vula yini, loko ku nga ri ku hanya ka lava a va file, xana?

¹⁶ Loko leswo rhanga swa mbila swi humeseriwile Xikwembu, mbila hinkwayo i ya xona; ni loko rimitsu ri nyikiwile Xikwembu, marhavi na wona i ya xona.

¹⁷ Kambe leswi marhavi man'wana ma phatluriweke, ni leswi wena mutlhwari wa le nhoveni u tlhomiweke ematshan'wini ya wona, u tlhela u phameriwa mafurha ya rimitsu ra mutlhwari wa le kaya,

¹⁸ u nga tshuki u tikukumuxa, u sandza marhavi lama phatluriweke; wo tikukumuxa ntsena, a hi wena la rhwalaka rimitsu, kambe i rimitsu leri ri ku rhwalaka.

¹⁹ Kumbexana u ta ku: “Marhavi ma phaturiwile, leswaku mina ndzi tlhomiwa ematshan'wini ya wona.”

²⁰ Hiswona; ma phatluriwile hikwalaho ka ku kala ku pfumela; kutani wena u yima u tiyile hikwalaho ka ku pfumela. U nga tshuki u tikurisa ha swona, kambe chava!

²¹ Hikuva loko Xikwembu xi nga tsetselelanga marhavi ya xiviri, na wena a xi nga ku tsetseleri.

²² Hikokwalaho, xiyaxiya vunene bya Xikwembu, ni nkhavi wa xona; nkhavi ehenhla ka lava weke, ni vunene ehenhla ka wena, loko u tiyisela evuneneni bya xona; kambe loko u nga tiyiseli, na wena u ta tsemiwa.

²³ Kambe na vona Vaisraele, loko va nga ha ali ku pfumela, va ta tlhela va tlhomiwa emutlhwarini hikuva Xikwembu xa swi kota ku tlhela xi va tlhoma.

²⁴ Leswi wena u phatluriweke emutlhwarini wa nhova lowu u nga tumbuluka u ri wa wona, kutani u tlhomiwa, hi mukhuva lowu nga riki wa ntumbuluko, emutlhwarini lowu rimeriwaka wa laha kaya, ngopfu-ngopfu marhavi lama phatluriweke ya murhi wa laha kaya, ma ta hatla ma milelana, loko ma tlhomiwa emutlhwarini lowu nga wa wona.

Ku vuyisiwa ka Vaisraele

²⁵ Kutani vamakwerhu, ku endlela leswaku mi nga ti tshuka mi titiva ngopfu, ndzi lava leswaku mi tiva xihundla lexi: Hileswaku, hi tlhelo rin'wana, Vaisraele va nonon'hwisiwile, vamatiko va kondza va nghena eka Xikwembu hi ntalo.

²⁶ Hi mukhuva wolowo tiko hinkwaro ra Israele ri ta ponisiwa, hilaha ku tsariweke hakona va ku: “Muponisi ú ta huma eSiyoni, a endla leswaku Yakobo a tshika tindlela ta yena to fularhela Xikwembu.

²⁷ Kutani hi wona ntwanano lowu ndzi nga ta wu endla na vona, loko ndzi susa swidyoho swa vona.”

²⁸ Leswi Vaisraele va nga ala Mahungu Lamanene, i valala va Xikwembu, ku pfuna n'wina vamatiko; kambe leswi va nga hlawuriwa hi xona, i varhandziwa va xona hikwalaho ka vakokwa wa vona;

²⁹ hikuva tinyiko ta Xikwembu ni ku vitana ka xona a swi hundzuki.

³⁰ Na n'wina vamatiko, a mi nga yingisi Xikwembu khale, kambe sweswi, hikwalaho ka Vaisraele lava nga yingisangiki, mi tsetseleriwile.

³¹ Hi mukhuva wolowo, hikwalaho ka tintswalo leti mi ti kumeke, na vona Vaisraele sweswi a va yingisi Xikwembu, kambe swi endlela leswaku va ta kuma ku tsetseleriwa na vona, sweswi.

³² Hikuva Xikwembu xi endlile leswaku vanhu hinkwavo va tsandzeka ku yingisa, leswaku xi ta kota ku va tsetselela hinkwavo.

³³ Vukosi bya Xikwembu, ni vutlhari bya xona, ni vutivi bya xona, a hi ku enta ka swona! Makungu ya xona ma nga pimisiwa ku yini, ni tindlela ta xona ti nga twisisiwa ku yini xana?

³⁴ Hikuva: “I mani la tiveke mianakanyo ya Hosi xana? Mutsundzuxi wa yena ú vile mani ke?

³⁵ I mani la nga rhanga a n'wi nyika xa nchumu, lexi a nga ta lava ku tlheriseriwa xona ke?”

³⁶ Hikuva swilo hinkwaswo swi huma ka yena, swi kona hikwalaho ka yena, swi kongoma yena. Eka yena a ku ve ku dzuneka hilaha ku nga heriki! Amen!