Vaheveru 1 - BIBELE Mahungu Lamanene

Xikwembu xi vulavurile hi N'wana

¹ Hi minkarhi leyo tala ni tindlela leto tala, Xikwembu xi vulavurile khale na vatatana, hi milomo ya vaprofeta.

² Kambe emasikwini lawa yo hetelela, xi vulavurile na hina hi N'wana, loyi xi n'wi vekeke ku va mudyandzhaka wa swilo hinkwaswo, loyi naswona xi tumbuluxeke tilo ni misava ha yena.

³ Hi yena loyi ku kwetsima ka Xikwembu ku tikombaka eka yena, kutani ú tekelele leswi Xikwembu xi nga swona hi xiviri xa xona; naswona ú tamele ntumbuluko hinkwawo hi rito ra yena ra matimba. Loko a hlantswile swidyoho swa vanhu, ú tshamile evokweni ra xinene ra Loyi a nga ni vukulu hinkwabyo, ehenhla matilweni,

⁴ a va la tlulaka ngopfu tintsumi hi vukulu, tanihi leswi a kumeke vito leri tlulaka hi vukulu mavito ya tona.

N'wana ú tlula tintsumi

⁵ Xana hi yihi ntsumi leyi Xikwembu xi tshamaka xi ku eka yona: “U n'wananga, namuntlha ndzi ku tswarile”; kumbe ku engeta xi ku: “Ndzi ta va tatana eka yena, yena a va n'wana eka mina” xana?

⁶ Nakambe, loko xi tisa N'wana wa xona wa mativula emisaveni, xi te: “Hinkwato tintsumi ta Xikwembu a ti n'wi nkhinsamele!”

⁷ Hi tlhelo ra tintsumi, xi te: “Xikwembu xi endla tintsumi ta xona emimoya, na malandza ya xona emalangavi ya ndzilo.”

⁸ Kambe hi tlhelo ra N'wana, xi te: “Xiluvelo xa wena, we Xikwembu, i xa minkarhi ni minkarhi, nhonga ya wena ya vuhosi i nhonga ya ku lulama.

⁹ U rhandzile ku lulama, u vengile ku homboloka. Hikokwalaho Xikwembu, Xikwembu xa wena, xi ku cherile mafurha ya ntsako lowukulu ku tlula vanakuloni.”

¹⁰ Naswona xi te: “Wena Hosi, u vekile masungulo ya misava eku sunguleni, ni matilo i ntirho wa mavoko ya wena;

¹¹ swi ta lova, kambe wena u kona hi masiku hinkwawo; swi ta hlakala hinkwaswo ku fana ni xiambalo,

¹² u ta swi petsa ku fana ni xifunengelo, kutani swi ta hundzuka swi va swin'wana; kambe wena wa ha ri leswi u nga swona, ni malembe ya wena a ma nga heli.”

¹³ Xana Xikwembu xi tshama xi byela yihi ntsumi xi ku: “Tshama evokweni ra mina ra xinene, ndzi kondza ndzi veka valala va wena ehansi ka minkondzo ya wena” xana?

¹⁴ Xana tintsumi hinkwato a hi mimoya leyi tirhelaka Xikwembu, leyi rhumiweke ku pfuna vanhu lava fanelaka ku kuma ku ponisiwa xana?