Vagalatiya 5 - BIBELE Mahungu Lamanene

Hlayisani ku ntshunxeka ka n'wina!

¹ Hi ntshunxiwile hileswi Kriste a hi ntshunxeke. Hikokwalaho, yimani mi tiya, mi nga ha tlheli mi tiveka ehansi ka mpingu wa vuhlonga.

² Maswivo, mina Pawulo ndzi mi byela leswi: Loko mi pfumela ku yimbisiwa, swi vula leswaku Kriste a nga mi pfuni nchumu niswitsanana.

³ Ndzi lava ku engeta ndzi tiyisa kambe, eka un'wana ni un'wana la pfumelaka ku yimbisiwa, leswaku ú fanela ku endla hinkwaswo leswi Nawu wu lerisaka swona.

⁴ Mi tihambanisile na Kriste, n'wina hinkwenu lava rhandzaka ku endliwa lava lulameke emahlweni ka Xikwembu hi mhaka ya ku hlayisa Nawu; mi wele kule ni tintswalo ta Xikwembu.

⁵ Loko a ri hina, hi ni ku tshemba leswaku Xikwembu xi ta hi endla lava lulameke emahlweni ka xona, kutani hi swona leswi hi swi langutelaka, hi matimba ya Moya lowu tirhaka eka hina, hi ku pfumela loku hi nga na kona.

⁶ Hikuva eka Kriste Yesu, ku yimba kumbe ku va munhu wo ka a nga yimbanga, a swi vuli nchumu, kambe lexi nga xona i ku pfumela loku tirhaka hi rirhandzu.

⁷ A mi ri karhi mi tsutsuma swinene! I mani la nga mi sivela ku yingisa ntiyiso?

⁸ Ku xisiwa loku a ku humi eka Xikwembu lexi xi mi vitaneke.

⁹ “Comelanyana lexintsanana xi kukumuxa mbila hinkwayo”, hilaha swi vuriwaka hakona.

¹⁰ Mina ndzi ni ku tshemba leswaku, leswi hi nga va Hosi hinkwerhu, a mi nga vi ni mianakanyo yo hambana ni ya mina, ni leswaku yoloyi a mi pfilunganyisaka, ú ta kuma ku avanyisiwa ka yena, hambi a nga va mani na mani.

¹¹ Kambe loko mina ndza ha dyondzisa hi ta ku yimba, vamakwerhu, xana ndza ha xanisiwa hikwalaho ka yini? Hikuva, loko swi ri tano, ku dyondzisa ka mina hi ta xihambano a ku nga ta khunguvanyisa munhu.

¹² A swi ta va swona loko vanhu lava va mi pfilunganyisaka, va nga yimi kwalaho, kambe va titshena xikan'we.

¹³ Loko a ri n'wina vamakwerhu, mi vitaniwile leswaku mi va lava ntshunxekeke; kambe mi nga teki ku ntshunxeka ka n'wina, mi ku hundzula mpfumelelo wo endla leswi ntumbuluko wa n'wina wa laha misaveni wu swi navelaka; ematshan'wini ya sweswo, tirhelanani hi rirhandzu.

¹⁴ Hikuva Nawu hinkwawo wu katsakanyiwa hi ku lerisa loku nge: “Rhandza munhu-kuloni kukota loko u tirhandza.”

¹⁵ Kambe loko mi lumana ni ku kakatlulana, tivoneleni leswaku mi nga hetani hi rixaka.

Mihandzu ya Moya ni mintirho ya ntumbuluko wa nyama

¹⁶ Leswi ndzi swi vulaka hi leswi: Fambani hi Moya, kutani mi nga ka mi nga korwisi ku navela ka ntumbuluko wa n'wina wa nyama;

¹⁷ hikuva ku navela ka nyama ku lwa ni Moya; naswona ku navela ka Moya ku lwa ni nyama. Swilo leswi swimbirhi swa lwetana, kutani ma hluleka ku endla leswi mi lavaka ku swi endla.

¹⁸ Kambe loko mi fambisiwa hi Moya, a mi le hansi ka Nawu.

¹⁹ Mintirho ya ntumbuluko wa nyama yi le rivaleni: I ku oswa, ni mikhuva ya thyaka, ni manyala,

²⁰ ni ku phahla swikwembu swa hava, ni xiloyiloyi, ni rivengo, ni timholovo, ni vukwele, ni ku kariha, ni ku tirhandza, ni ku avana, ni ku lwetana,

²¹ ni mavondzo, ni vudakwa, ni makampfu, ni swo kota sweswo. Ndza mi tsundzuxa, hilaha ndzi tshamaka ndzi mi tsundzuxa hakona, leswaku lava endlaka leswo tano, va nga ka va nga vi na ku averiwa eku fumeni ka Xikwembu.

²² Kasi mihandzu ya Moya i rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka,

²³ ni musa, ni ku tikhoma. Ku hava nawu lowu lwaka ni leswo tano.

²⁴ Lava nga va ka Kriste Yesu va vambile nyama ni swa yona, swi fa; a va ha swi hisekeli, a va ha swi naveli.

²⁵ Leswi Moya wu hi nyikeke vutomi, a hi hanyeni hi ku letela ka wona.

²⁶ Hi nga tshuki hi titiva ngopfu; a hi chaveni ku pfukana ni ku vondzokana.