Vagalatiya 4 - BIBELE Mahungu Lamanene

¹ Leswi ndzi swi vulaka hi leswi: Loko mudyandzhaka a ha ri xihlangi, a nga tluli hlonga, hambileswi a nga yena n'wini wa ndzhaka hinkwayo;

² ú le hansi ka vahlayisi va yena ni valanguteri va ndzhaka ya yena, ku ko ku fika siku leri vekiweke hi tata wa yena.

³ Swi tano na hina: Loko hi nga si kula eMoyeni, a hi ri mahlonga ya mimoya leyi fumaka misava leyi.

⁴ Kambe loko nkarhi wu fikile hi ndlela leyi hetisekeke, Xikwembu xi rhumile N'wana wa xona, la velekiweke hi wansati, a velekiwa a ri hansi ka Nawu,

⁵ leswaku a ta kutsula lava a va ri hansi ka Nawu, ni leswaku hi ta amukela xiyimo xa vana va Xikwembu.

⁶ Ku komba leswaku mi vana va xona, Xikwembu xi cherile Moya wa N'wana wa xona etimbilwini ta hina, wu nga Moya lowu huwelelaka wu ku: “Abba, Tatana!”

⁷ Hikokwalaho wena a wa ha ri hlonga, kambe u n'wana; kutani leswi u nga n'wana, u mudyandzhaka hi ku rhandza ka Xikwembu.

⁸ Khale, loko mi nga si tiva Xikwembu, a mi ri mahlonga ya swilo leswi hi ku tumbuluka swi nga riki swikwembu.

⁹ Kambe leswi namuntlha mi tivaka Xikwembu (kumbe ndzi nga ku, leswi namuntlha Xikwembu xi mi tivaka), xana swi endlisa ku yini leswaku mi tlhelela eka mimoya leyi nga nyawuliki, leyi tsaneke ya misava leyi xana? Hikwalaho ka yini mi lava ku tlhela mi hundzuka mahlonga ya yona ke?

¹⁰ Mi tiva ku fungha masiku man'wana, ni tin'hweti, ni tinguva, ni malembe!

¹¹ Ma ndzi chavisa, onge hi loko leswi ndzi nga tikarhata ndzi mi endlela swona swi nga pfunanga nchumu.

Pawulo ú hisekela Vagalatiya

¹² Ndza mi kombela vamakwerhu, hundzukani lava fanaka na mina, hikuva na mina ndzi hundzukile la fanaka na n'wina. A mi ndzi hoxelanga ha nchumu;

¹³ ma tsundzuka leswaku i ku vabya ka mina loku nga ndzi nyika nkarhi wo mi dyondzisa Evhangeli eku sunguleni.

¹⁴ Hambiswiritano, a mi ndzi solanga kumbe ku ndzi nyenya hi mhaka ya vuvabyi bya mina, lebyi a byi ri ndzingo eka n'wina; kambe mi ndzi amukerile tanihi loko ndzi ri ntsumi ya Xikwembu, tanihi loko mi amukela Kriste Yesu.

¹⁵ Ku lo humelela yini, leswi khale a mi tshama mi tsakile? Hikuva ndzi nga tiyisa leswaku, loko onge ka ha ri khale ka n'wina, a mi ta va mi tixokole na mahlo mi ndzi nyika wona loko swi endleka.

¹⁶ Xana sweswi ndzi hundzukile nala wa n'wina hi ku mi byela ntiyiso ke?

¹⁷ Vanhu lavaya van'wana va chivirikela n'wina, kambe a va na moya lowunene; va lava ntsena ku mi hambanisa na mina, leswaku mi ta chivirikela vona.

¹⁸ A swi bihanga ku chivirikelana masiku hinkwawo, loko moya wu ri lowunene, naswona ku nga ri ntsena hi loko ndzi ri na n'wina.

¹⁹ Vana vanga, ku fana na manana la nga kusuhi na ku veleka n'wana, ndzi twa ku vava nakambe hikwalaho ka n'wina, ku fikela loko xivumbeko xa Kriste xi vonaka exikarhi ka n'wina ...

²⁰ A ndzi ta navela ngopfu ku va exikarhi ka n'wina sweswi, ndzi ta vulavula na n'wina hi ku antswa, hikuva ndzi le ku karhatekeni hi tlhelo ra n'wina.

Pawulo a fanisa hi Agara na Sara

²¹ Ma nga ndzi byela, n'wina lava tsakelaka ku va ehansi ka Nawu: Xana a mi swi twi leswi Nawu wu vulaka swona ke?

²² Hikuva Matsalwa ma vula leswaku Abrahama a a ri ni vana vambirhi va xinuna, un'wana a velekiwile hi nsati wa yena wa hlonga, un'wana hi nsati wa yena wa xitekwa wo ka a nga ri hlonga.

²³ Kambe n'wana wa nsati lowa hlonga, ú velekiwile ku fana ni vanhu hinkwavo; kasi n'wana wa nsati lowa xitekwa ú velekiwile hikwalaho ka xitshembiso.

²⁴ Timhaka leti i ku pimanisa: Vavasati lavambirhi i mintwanano mimbirhi; un'wana, a nga yena Agara, ú huma entshaveni ya Sinayi, vana va yena va velekeriwe vuhlonga;

²⁵ Agara i ntshava ya Sinayi, etikweni ra Arabiya, kutani ú fanisa muti wa sweswi wa Yerusalema, hikuva wu le vuhlongeni swin'we ni vana va wona.

²⁶ Kambe Yerusalema wa le tilweni ú ntshunxekile, kutani hi yena mana wa hina.

²⁷ Hikuva ku tsariwile va ku: “Tsaka wena mhika, la nga kumiki swihlangi, bana nkulungwana lowukulu, wena la nga twiki ku lumiwa ka ku veleka; hikuva wansati loyi a nga tshikiwa, ú ta va ni vana vo tala ku tlula wansati loyi a nga ni nuna.”

²⁸ Sweswi ke, n'wina vamakwerhu, mi vana va xitshembiso ku fana na Isaka.

²⁹ Naswona, ku fana na leswi, enkarhini wolowo, n'wana wo velekiwa kukota vanhu hinkwavo a nga xanisa n'wana wo velekiwa hi matimba ya Moya, nisweswi swa ha ri tano.

³⁰ Kambe Matsalwa ma ri yini ke? Ma ri: “Hlongola nsati lowa hlonga ni n'wana wa yena, hikuva n'wana wa hlonga a nga na ku averiwa ndzhaka swin'we ni n'wana wa nsati wa xitekwa la nga riki hlonga.”

³¹ Hikokwalaho, vamakwerhu, hina a hi vana va hlonga, kambe hi vana va nsati wa xitekwa la nga riki hlonga.