Vaavanyisi 2 - BIBELE Mahungu Lamanene

Ta ntsumi ya Xikwembu emutini wa Bokimi

¹ Ntsumi ya HOSI Xikwembu yi suka emutini wa Giligala, yi tlhandlukela emutini wa Bokimi, yi fika yi byela Vaisraele, yi ku: “Ndzi mi humesile etikweni ra Egipta, ndzi mi tisa etikweni leri ndzi hlambanyeke leswaku ndzi ta ri nyika vatata wa n'wina. Kutani ndzi mi byerile ndzi ku: ‘Ndzi nga ka ndzi nga tshovi ntwanano wa mina na n'wina;

² hikokwalaho na n'wina mi nga tshuki mi endla ntwanano ni lava akeke etikweni leri. Mi fanele ku mbundzumuxa tialitari ta vona.’ Kambe n'wina a mi ndzi yingisanga. Xana i mhaka muni leyi mi yi endleke?

³ Kutani sweswi ndzi mi byela leswaku a ndzi nga va hlongoli va suka emahlweni ka n'wina. Va ta hundzuka ntlhamu eka n'wina, kutani va ta mi phasa hi swikwembu swa vona.”

⁴ Loko ntsumi ya HOSI Xikwembu yi byerile Vaisraele emarito lawa, hinkwavo va sungula ku rila.

⁵ Kutani va thya ndhawu leyi evito ra Bokimi (hileswaku: “Lava rilaka”), kutani va humesela HOSI Xikwembu emagandzelo exivandleni lexi.

Ta ku fa ka Yoxuwa

⁶ Kutani Yoxuwa a byela vanhu leswaku va muka, Muisraele un'wana ni un'wana a famba a ya teka ndhawu leyi a averiweke yona, leswaku yi ta va ndzhaka ya yena.

⁷ Kutani Vaisraele va tirhela HOSI Xikwembu enkarhini wa Yoxuwa ni le nkarhini wa vakulukumba lava hanyeke ku tlula yena, lava voneke mintirho hinkwayo leyikulu leyi HOSI Xikwembu xi yi endleleke Vaisraele.

⁸ Kutani Yoxuwa n'wana Nuni, nandza wa HOSI Xikwembu, a fa a ri ni malembe ya 110.

⁹ Kutani va ya n'wi lahla endhawini leyi nga ndzhaka ya yena, ku nga mutini wa Timinata-Heresi lowu nga magangeni ya Efrayimi, en'walungwini wa ntshava ya Gaaxi.

¹⁰ Loko vanhu hinkwavo va hundzile emisaveni va landza vatata wa vona, ku humelela van'wana lava nga tivangiki HOSI Xikwembu hambi yi ri mintirho ya xona leyi xi yi endleleke Vaisraele.

Ta Vaisraele loko va tshika ku tirhela Xikwembu

¹¹ Vaisraele va endla leswo biha emahlweni ka HOSI Xikwembu. Va tirhela swifaniso swa Baali,

¹² va tshika HOSI, Xikwembu xa vatata wa vona lexi xi va humeseke etikweni ra Egipta, kutani va ya tirhela swikwembu swa vamatiko lava va va rhendzeleke; kutani Vaisraele va hlundzukisa HOSI Xikwembu hi ku humesela swikwembu leswi emagandzelo.

¹³ Va tshika HOSI Xikwembu, va ya tirhela swifaniso swa Baali ni swa Astarte.

¹⁴ Hikokwalaho, HOSI Xikwembu xi karihela Vaisraele, kutani xi va tshika va hlaseriwa hi vaxanisi va vona, xi va nyiketa eka valala va vona lava va va rhendzeleke, va nga ha koti ku va hlula.

¹⁵ Minkarhi hinkwayo loko Vaisraele va huma nyimpi, HOSI Xikwembu a xi va tshika va wela ekhombyeni, hilaha a xi va hlambanyerile hakona, kutani va xaniseka ngopfu.

Ta vaavanyisi loko va lamulela Vaisraele

¹⁶ HOSI Xikwembu xi humesela Vaisraele vaavanyisi, kutani va lamulela Vaisraele emavokweni ya lava a va va hlasela.

¹⁷ Kambe Vaisraele a va yingisanga vaavanyisi lava. Va hatlile va hambuka endleleni leyi vatata wa vona va fambeke ha yona, va endla vunghwavava, va tirhela swikwembu swin'wana, va swi nkhinsamela. Vatata wa vona a va yingisa swileriso swa HOSI Xikwembu, kambe vona a va swi yingisanga.

¹⁸ Minkarhi hinkwayo loko HOSI Xikwembu xi nyika Vaisraele vaavanyisi, a xi yima ni vaavanyisi lava xi va tirhisa ku ponisa Vaisraele emavokweni ya valala va vona, hikuva a xi twela Vaisraele vusiwana eku konyeni ka vona, loko va xanisiwa ni ku tshikeleriwa hi valala va vona.

¹⁹ Kambe loko muavanyisi wa vona a fa, Vaisraele a va tlhelela endzhaku, va hanya hi ndlela yo biha ku tlula ni ya vatata wa vona, va landzelela swikwembu swin'wana, va swi tirhela ni ku swi nkhinsamela. A va tshikanga mahanyelo ya vona ni ku tinonon'hwisa ka vona.

²⁰ Kutani HOSI Xikwembu xi karihela Vaisraele, xi ku: “Leswi vanhu lava va tshoveke ntwanano wa mina lowu ndzi wu endleke ni vatata wa vona, ni leswi va nga yingisangiki rito ra mina,

²¹ vamatiko lava Yoxuwa a va siyeke exikarhi ka Vaisraele loko a fa, a ndzi nga ha va hlongoli.

²² Vamatiko lava, ndzi ta va tirhisa ku kambela Vaisraele, ndzi vona loko va swi lava ku famba endleleni ya mina ku fana ni vatata wa vona, kumbe va nga swi lavi.”

²³ Hikokwalaho, HOSI Xikwembu xi tshika vamatiko va tshama exikarhi ka Vaisraele, xi nga va hlongoli. HOSI Xikwembu a xi va nyiketanga emavokweni ya Yoxuwa.