Vaavanyisi 14 - BIBELE Mahungu Lamanene

Ta Samsoni loko a tihlawulela nsati

¹ Samsoni a rhelela a ya eTimina, kutani a fika a vona nhwanyana un'wana wa Mufilista.

² Kutani a tlhelela ekaya, a fika a byela tata wa yena ni mana wa yena, a ku: “Ndzi vonile nhwanyana un'wana wa Mufilista eTimina, kutani ndzi kombela leswaku mi ya ndzi tekela yena, a va nsati wa mina.”

³ Kambe tata wa yena ni mana wa yena va ku ka yena: “Xana ko va hava vanhwanyana exikarhi ka maxaka ya ka hina kumbe etikweni ra ka hina hinkwaro, leswi u lavaka ku ya teka nsati exikarhi ka vahedeni lava va Vafilista, xana?” Kambe Samsoni a hlamula tata wakwe, a ku: “Ndzi tekeleni yena, hikuva mina ndzi tsakela yena!”

⁴ Tata wa yena ni mana wa yena a va swi tivanga leswaku a ma ri makungu ya HOSI Xikwembu, hikuva a xi lava ndlela yo ba Vafilista. Enkarhini lowu, Vafilista a va fuma Vaisraele.

⁵ Kutani Samsoni a rhelela ni tata wa yena ni mana wa yena, va ya emutini wa Timina. Kuteloko va fika emasin'wini ya vhinya ya le Timina, ku humelela nghala, yi mpfhumpfhela Samsoni yi ri karhi yi bonga.

⁶ Kutani Moya wa HOSI Xikwembu wu n'wi nghena hi matimba swinene. Hiloko a phatlulela nghala ya kona wonge hi loko a phatlulela ximbutana, a nga khomanga nchumu emavokweni, kambe tata wa yena ni mana wa yena, a nga va byelanga leswi nga humelela.

⁷ Kutani Samsoni a rhelela a ya vulavurisa nhwanyana wa kona, kutani va twanana.

⁸ Loko ku hundzile nkarhinyana, Samsoni a tlhelela eTimina ku ya hlomisa nsati. Kutani loko a ri endleleni, a hambuka a ya kamba nghala leyi a yi dlayeke, a kuma tinyoxi to tala eka yona, ti ri ni vulombe.

⁹ Kutani Samsoni a hakula vulombe bya kona, a famba a khomile a ri karhi a dya, a fika a pambulela tata wa yena ni mana wa yena, va dya. Kambe a nga va byelanga leswaku vulombe lebyi a byi hakuriwile eka nghala leyi a yi dlayeke.

¹⁰ Kutani tata wa Samsoni a rhelela a ya ekaya ka nhwanyana loyi; kutani Samsoni a endla nkhuvo kwale vukon'wanini bya yena, swi nga leswi majaha a ma tolovele ku swi endla.

¹¹ Kuteloko Vafilista va vona Samsoni, va rhumela majaha ya 30 ku ya tshama na yena.

¹² Kutani Samsoni a ku ka vona: “Ndzi pfumeleleni ndzi mi vutisa ntshayito, kutani loko mo kuma nhlamuselo ya kona mi ndzi byela yona ku nga si hela masiku lawa ya 7 ya nkhuvo, ndzi ta mi nyika minceka ya 30 ni swiambalo swo bomba ha swona swa 30.

¹³ Kambe loko mo tsandzeka ku kuma nhlamuselo ya kona, hi n'wina mi nga ta ndzi nyika minceka ya 30 ni swiambalo swo bomba ha swona swa 30.” Kutani vona va ku ka yena: “Tana ni ntshayito wa wena, hi wu twa.”

¹⁴ Kutani Samsoni a ku ka vona: “Tshayii! Eka mudyi ku humile swakudya, eka lowa matimba, ku humile swo tsokombela!” Kutani masiku manharhu ma hela, va nga si kuma nhlamuselo ya ntshayito lowu.

¹⁵ Hi siku ra vumune, va byela nkata Samsoni va ku: “Xavelela nuna wa wena a hi byela nhlamuselo ya ntshayito wa yena; loko swi nga ri tano, wena ni va ka n'wina hi ta mi hisa hi ndzilo. Loko mi hi rhamba, xana a mi lava ku hi vangela vusiwana xana?”

¹⁶ Kutani nkata Samsoni a ya rila eka nuna wa yena a ku: “Ndza swi vona leswaku a wu na mhaka na mina, a wu ndzi rhandzi. U vutisile majaha ya ka hina ntshayito, kambe a wu ndzi byelanga nhlamuselo ya wona!” Kutani Samsoni a n'wi hlamula a ku: “Vona, ndzi vula hambi tatana na manana, a ndzi va byelanga. Xana wena ndzi nga ku byelela yini nhlamuselo ya kona xana?”

¹⁷ Wansati loyi a rila eka Samsoni ku ringana masiku ya 7 ya nkhuvo; kutani hi siku ra vu-7, Samsoni a n'wi hlamusela ntshayito, hikuva a a n'wi sindzisile ngopfu. Hiloko wansati loyi a ya byela majaha ya ka vona.

¹⁸ Hi siku leri ra vu-7, loko dyambu ri nga si pela, majaha ya muti ma ku ka Samsoni: “Ku nga va yini lexi tsokombelaka, loko byi nga ri vulombe xana? Lexi nga ni matimba, ku nga va yini ehandle ka nghala xana?” Samsoni a ku ka vona: “Loko a mi nga rimanga hi thokazi ra mina, ingi mi nga yi kumanga nhlamuselo ya ntshayito wa mina!”

¹⁹ Hiloko Moya wa HOSI Xikwembu wu nghena Samsoni hi matimba swinene, kutani a rhelela a ya emutini wa Exikaloni, a fika a dlaya vavanuna va muti lowu va 30, a phangha swiambalo swa vona swo bomba ha swona, a ya nyika lava kumeke nhlamuselo ya ntshayito wa yena. Kutani Samsoni a suka a muka a hlundzukile swinene.

²⁰ Hiloko va sala va teka nsati wa Samsoni, va n'wi nyika munghana wa yena, loyi a a ri nxangwana ya yena.