Vaavanyisi 13 - BIBELE Mahungu Lamanene

Ta ku velekiwa ka Samsoni

¹ Vaisraele va tlhela va endla leswo biha emahlweni ka HOSI Xikwembu, kutani xi va nyiketa emavokweni ya Vafilista, va va hansi ka vona ku ringana malembe ya 40.

² Emutini wa Sora, a ku ri ni wanuna un'wana wa nyimba ya ka Dani, loyi a va ku i Manowaka. Nsati wa yena a a ri mhika.

³ Siku rin'wana, ntsumi ya HOSI Xikwembu yi humelela eka wansati loyi, yi ku ka yena: “Vona, u mhika, a wu kumi vana, kambe u ta tika u veleka n'wana wa mufana.

⁴ Kutani u nga tshuki u nwa vhinyo kumbe byalwa, naswona u nga dyi swilo leswi nga tengangiki,

⁵ hikuva u ta tika, u veleka n'wana wa mufana. N'wana loyi a nga tshuki a byewuriwa nhloko, hikuva ú ta va munhu la hlawuleriweke Xikwembu ku sukela siku a velekiwaka. Hi yena la nga ta sungula ku lamulela Vaisraele emavokweni ya Vafilista.”

⁶ Kavaloko wansati a ya eka nuna wa yena, a fika a ku: “Munhu wa Xikwembu a a tile eka mina. Xivumbeko xa yena a xi chavisa swinene, xi fana ni xivumbeko xa ntsumi ya Xikwembu. A ndzi n'wi vutisanga leswaku a a huma kwihi, na vito ra yena a nga ndzi byelanga.

⁷ Kambe ú te ka mina: ‘Vona, u ta tika, u veleka n'wana wa mufana; hikokwalaho, u nga tshuki u nwa vhinyo kumbe byalwa, naswona u nga dyi swilo leswi nga tengangiki, hikuva n'wana loyi ú ta va munhu la hlawuleriweke Xikwembu ku sukela siku a velekiwaka, a kondza a fa.’ ”

⁸ Hiloko Manowaka a kombela eka HOSI Xikwembu, a ku: “We N'wini wanga, ndzi kombela leswaku munhu wa wena loyi a wu n'wi rhumile eka hina, a tlhela a ta nakambe, a ta hi dyondzisa leswi hi nga ta n'wi khomisa swona n'wana loyi a nga ta velekiwa.”

⁹ Xikwembu xi amukela xikombelo xa Manowaka, kutani ntsumi ya xona yi tlhelela eka wansati, yi n'wi kuma a tshamile emasin'wini, kambe Manowaka nuna wa yena a a nga ri kona.

¹⁰ Hiloko wansati a hatla a tsutsuma, a ya fika eka nuna a ku: “Ndzi ku tivisa leswaku munhu loyi a nga ta eka mina siku leriya, u tlhele a vuya.”

¹¹ Kutani Manowaka a suka a landza nsati hi le ndzhaku, a ya fika eka munhu wa kona, a ku ka yena: “Xana hi wena u nga tshama u vulavula ni wansati loyi xana?” Yena a hlamula a ku: “Hi mina.”

¹² Manowaka a n'wi vutisa a ku: “Loko swilo leswi u swi vulaka swi humelela, mufana loyi ú fanele ku hanyisa ku yini, naswona ú fanele ku tirha yini xana?”

¹³ Ntsumi ya HOSI yi ku ka Manowaka: “Nsati wa wena a a titsone hinkwaswo leswi ndzi n'wi byeleke swona.

¹⁴ A nga tshuki a dya leswi humaka eka vhinya, a nga nwi vhinyo kumbe byalwa, naswona a nga dyi swilo leswi nga tengangiki; a a hlayise swilo hinkwaswo leswi ndzi n'wi leriseke swona.”

¹⁵ Manowaka a ku ka ntsumi ya HOSI: “Hi kombela leswaku u yimanyana, ha ha ya ku tlhavela ximbutana.”

¹⁶ Kutani ntsumi ya HOSI yi hlamula Manowaka yi ku: “Hambiloko u nga ndzi yimisa, swakudya swa wena swona a ndzi nga dyi; kambe loko u lava ku humesa gandzelo leri hisiwaka, ri humesele HOSI Xikwembu.” (Manowaka a a nga swi tivi leswaku munhu loyi a a ri ntsumi ya HOSI Xikwembu.)

¹⁷ Kutani Manowaka a ku ka ntsumi ya HOSI: “Vito ra wena hi wena mani xana? Hi lava leswaku, loko leswi u swi vuleke swi humelela, hi ta ku dzunisa.”

¹⁸ Ntsumi ya HOSI yi ku ka yena: “Hikwalaho ka yini u ndzi vutisa vito ra mina? Xana a wu swi tivi leswaku swa yila ku ri vula, xana?”

¹⁹ Kutani Manowaka a teka ximbutana ni mapa ya gandzelo, a ya swi veka ehenhla ka ribye, a humesa gandzelo leri hisiwaka a humesela HOSI Xikwembu lexi endlaka swihlamariso.

²⁰ Kuteloko ndzilo lowu nga alitarini wu pfurhela henhla, ntsumi ya HOSI yi tlhandluka yi ri endzeni ka wona, Manowaka ni nsati wa yena va ri karhi va swi vona, kutani va wela hansi hi mimombo.

²¹ Ntsumi ya HOSI a ya ha tlhelanga yi humelela eka Manowaka ni nsati wa yena. Kavaloko Manowaka a sungula ku twisisa leswaku a yi ri ntsumi ya HOSI Xikwembu.

²² Kutani Manowaka a ku ka nsati wa yena: “Hakunene hi file, hikuva hi vonile Xikwembu!”

²³ Kambe nsati wa yena a n'wi hlamula a ku: “Loko HOSI Xikwembu a xi lava ku hi dlaya, ingi xi nga amukelanga gandzelo ra hina leri hisiwaka ni mapa ya rona, naswona ingi swilo leswi hinkwaswo xi nga hi kombanga kumbe ku hi tivisa swilo swo fana na leswi.”

²⁴ Kutani wansati a kuma n'wana wa mufana, a n'wi thya vito ra Samsoni; n'wana loyi a kula, HOSI Xikwembu xi n'wi katekisa.

²⁵ Loko Samsoni a ri eka Mixaxa-ya-Dani, exikarhi ka muti wa Sora ni wa Exitawulu, a sungula ku ngheniwa hi Moya wa HOSI Xikwembu.