Vaavanyisi 12 - BIBELE Mahungu Lamanene

Nyimpi ya va le Giliyadi ni va ka Efrayimi

¹ Vavanuna va ka Efrayimi va tilulamisela ku ya lwa nyimpi, kutani va tsemakanya nambu wa Yordani va ya eSafoni, va fika va ku ka Yefta: “Xana a wu endlela yini ku ka u nga hi vitani hi famba na wena, loko u huma u ya lwa ni Vaamoni, xana? Hikokwalaho hi ta lumeka yindlu ya wena, u tshwela endzeni ka yona!”

² Yefta a va hlamula a ku: “Mina ni vanhu va mina hi holovisanile ngopfu ni Vaamoni; kambe loko ndzi mi rhumele rito leswaku mi ta mi ta hi lamulela, a mi tanga.

³ Kuteloko ndzi vona leswaku n'wina a mi lavi ku ndzi lamulela, ndzi humile ndzi ya lwa ni Vaamoni, ndzi nga chavi ku fa, kutani HOSI Xikwembu xi va nyiketa emavokweni ya mina; xana i ncini lexi namuntlha xi mi tisaka mi ta ndzi lwisa, xana?”

⁴ Kutani Yefta a hlengeleta vavanuna hinkwavo va Giliyadi, va lwa ni va ka Efrayimi, va va hlula. (Va ka Efrayimi a va rhuketerile va le Giliyadi, va ku: “N'wina va le Giliyadi mi lo baleka eka Efrayimi ni le ka Manase!”)

⁵ Kutani va le Giliyadi va teka mahlaluko ya Yordani, va sivela va ka Efrayimi ku hundza. Loko munhu un'wana wa ka Efrayimi loyi a balekelaka nyimpi a fika a ku: “Ndzi kombela ku hundza”, vavanuna va le Giliyadi a va n'wi vutisa va ku: “U wa ka Efrayimi xana?” Loko a hlamula a ku: “E-e”,

⁶ a va ku ka yena: “Vula u ku ‘Xibolete’.” Kambe vanhu va ka Efrayimi a va tsandzeka ku vula kahle rito leri, hikuva a va ku “Sibolete”; kutani va le Giliyadi a va va khoma va va dlayela kwale mahlalukweni ya Yordani. Enkarhini wolowo, ku dlayiwile vanhu va ka Efrayimi vo ringana 42 000.

⁷ Yefta lowa Mugiliyadi ú vile murhangeri wa Vaisraele ku ringana malembe ya 6. Loko a lova, ú lahliwile emutini wa yena le Giliyadi.

Ta Ibisani

⁸ Endzhaku ka Yefta, ku humelela Ibisani wa le Betlehema, a va murhangeri wa Israele.

⁹ Ibisani a a ri ni vana va vafana va 30 ni vanhwanyana va 30. Ú pfumelerile vana va yena va vanhwanyana ku ya tekiwa ematikweni man'wana. Lava va vafana va 30 na vona ú va pfumelerile ku ya teka vanhwanyana va 30 ematikweni ya le handle, va va vasati va vona. Ibisani ú vile murhangeri wa Vaisraele ku ringana malembe ya 7.

¹⁰ Loko Ibisani a lova, ú lahliwile eBetlehema.

Ta Elone

¹¹ Endzhaku ka Ibisani, ku humelela Elone wa Muzebuloni, a va murhangeri wa Vaisraele ku ringana malembe ya 10.

¹² Loko Elone a lova, ú lahliwile le Ayaloni etikweni ra va ka Zebuloni.

Ta Abidoni

¹³ Endzhaku ka Elone, ku humelela Abidoni n'wana Hilele wa Mupiratoni, a va murhangeri wa Vaisraele.

¹⁴ Abidoni a a ri ni vana va 40 ni vatukulu va 30, lava a va famba hi timbhongolo ta 70. Ú vile murhangeri wa Vaisraele ku ringana malembe ya 8.

¹⁵ Loko Abidoni n'wana Hilele wa Mupiratoni a lova, ú lahliwile ePiratoni etikweni ra va ka Efrayimi, emagangeni ya Vaamaleke.