Vaavanyisi 10 - BIBELE Mahungu Lamanene

Ta Tola

¹ Endzhaku ka Abimeleke, ku humelela Tola n'wana Puwa wa Dodo, wanuna wa ka Isakara, ku ta va mulamuleri wa Vaisraele. A a tshama emutini wa Xamiri, emagangeni ya Efrayimi.

² Ú rhangerile Vaisraele ku ringana malembe ya 23. Loko a lova, ú lahliwile eXamiri.

Ta Yayiro

³ Endzhaku ka Tola, ku humelela Yayiro wa Mugiliyadi, a va murhangeri wa Vaisraele ku ringana malembe ya 22.

⁴ Yayiro a a ri ni vana va 30 lava a va famba hi timbhongolo ta 30. Vana lava a va ri ni miti ya 30 etikweni ra Giliyadi, leyi ni namuntlha ya ha tiviwaka hi vito ra Havhota-Yayiro (hileswaku swimitana swa Yayiro).

⁵ Loko Yayiro a lova, ú lahliwile eKamona.

Vaamoni va xanisa Vaisraele

⁶ Vaisraele va tlhela va endla leswo biha emahlweni ka HOSI Xikwembu: Va tirhela swifaniso swa Baali ni swa Astarte, swi nga swikwembu swa Vasiriya, ni Vasidoni, ni Vamowabu, ni Vaamoni, ni Vafilista. Vaisraele va tshika HOSI Xikwembu, va nga ha xi tirheli.

⁷ Kutani HOSI Xikwembu xi karihela Vaisraele, xi va nyiketa emavokweni ya Vafilista ni Vaamoni,

⁸ lava va hluleke Vaisraele lembe rero, va sungula ku va xanisa. Vaisraele hinkwavo lava a va tshama entsungeni wa nambu wa Yordani, etikweni ra Vaamori leri nga eGiliyadi, va xanisiwile ku ringana malembe ya 18.

⁹ Vaamoni va tsemakanya ni nambu wa Yordani, va ya lwa ni va ka Yuda, ni va ka Benjamini, ni va ka Efrayimi, kutani Vaisraele va va eku xanisekeni lokukulu.

¹⁰ Kutani Vaisraele va sungula ku huwelela eka HOSI Xikwembu, va ku: “Hi ku dyoherile, we Xikwembu, hikuva hi ku tshikile, hi ya tirhela swifaniso swa Baali.”

¹¹ HOSI Xikwembu xi ku ka Vaisraele: “Xana a ndzi mi ponisanga emavokweni ya Vaegipta, ni Vaamori, ni Vaamoni, ni Vafilista xana?

¹² Hambi va ri Vasidoni, ni Vaamaleke, ni Vamawoni : Loko va mi xanisa, mi huwelerile eka mina, kutani ndzi mi kutsula emavokweni ya vona.

¹³ Hambiswiritano, mi ndzi tshikile, mi ya tirhela swikwembu swin'wana; hikokwalaho, ndzi nga ka ndzi nga ha mi ponisi.

¹⁴ Mo ya mi ya rila eka swikwembu leswi mi tihlawuleleke swona; byelani swona swi mi lamulela eku xanisekeni ka n'wina!”

¹⁵ Vaisraele va ku ka HOSI Xikwembu: “Hi dyohile! Wena hi endle leswi u vonaka swi ri swona, kambe namuntlha hi kombela leswaku u hi ponisa.”

¹⁶ Hiloko Vaisraele va cukumeta swikwembu swa vamatiko leswi a swi ri exikarhi ka vona, kutani va tirhela HOSI Xikwembu. Hiloko HOSI Xikwembu xi vavisekela Vaisraele hikwalaho ka maxangu ya vona.

¹⁷ Vaamoni va tilulamisela ku ya lwa nyimpi, kutani va huma va ya dzima mixaxa eGiliyadi. Vaisraele na vona va hlengeletana, va ya dzima ya vona mixaxa eMispa.

¹⁸ Kutani vanhu va Giliyadi va vutisana ni vafambisi va vona, va ku: “Xana i mani loyi a nga ta rhangela vuthu leri ri nga ta lwa ni Vaamoni xana? Munhu wa kona ú ta va murhangeri wa vaaki va Giliyadi hinkwavo.”