Tito 3 - BIBELE Mahungu Lamanene

Mahanyelo ya Xikriste

¹ Tsundzuxa lava u va dyondzisaka ku tiveka ehansi ka tihosi ni tindhuna, hi ku ti yingisa, va tshama va tilunghisela ku tirha mintirho hinkwayo leyinene;

² va nga tshuki va onha van'wana emavito, kambe va va lavo rhula, va va ni vuxaka, masiku hinkwawo va va ni musa eka vanhu hinkwavo.

³ Na hina khale a hi ri swiphukuphuku, hi humile endleleni, hi ala ku yingisa; a hi ri mahlonga ya ku navela, ni ya ku titsakisa ka tinxaka-xaka; a hi ri lava hanyaka hi nsele ni mavondzo; a hi vengiwa, na hina hi vengana.

⁴ Kambe siku musa wa Xikwembu Muponisi wa hina, ni rirhandzu ra xona, swi humeleleke,

⁵ xi hi ponisile. A ku nga ri hi mhaka ya mintirho leyo lulama leyi hina hi hexe hi yi endleke, kambe xi hi ponisile hi tintswalo ta xona, hi ku hlantswiwa loku endlaka leswaku Moya lowo Kwetsima wu hi nyika ku tswariwa ra vumbirhi, ni vutomi lebyintshwa.

⁶ Xikwembu xi cherile Moya lowu hi ntalo ehenhla ka hina ha Yesu Kriste Muponisi wa hina,

⁷ leswaku, hi tintswalo ta xona, hi ta endliwa lava lulameke emahlweni ka xona, ni ku amukela ndzhaka ya vutomi lebyi nga heriki, lebyi hi byi langutelaka.

⁸ Mhaka leyi yi tiyile. Kutani ndzi lava leswaku u tiyisa timhaka leti swinene, leswaku lava pfumeleke eka Xikwembu, va lava tindlela ta ku tinyiketa, va tirha mintirho leyinene. Hi swona leswi nga swinene, leswi pfunaka vanhu.

⁹ Fularhela ta ku phikisana hi leswi nga pfuniki nchumu kumbe hi swivongo, u tshika ni timholovo, ni ku kanetana hi ta Nawu; swilo leswi a swi pfuni nchumu, i swa hava.

¹⁰ Munhu loyi a vangaka ku hambana, n'wi tshinye kan'we, kumbe kambirhi, kutani u nga ha vi na mhaka na yena,

¹¹ hikuva wa swi tiva leswaku munhu lowo tano ú onhakile, kutani swidyoho swa yena swi komba leswaku ú humile endleleni.

Switsundzuxo leswo hetelela

¹² Loko ndzi rhumela Artema kumbe Tixiko ku ta kwaleyo, ringeta hi matimba ku ta ka mina le Nikopoli, hikuva ndzi tilunghisele ku ya tshama kona vuxika hinkwabyo.

¹³ Endla hi matimba ku longela Zena n'wamilawu, na Apolosi, leswaku va khoma riendzo ra vona, va nga pfumali nchumu.

¹⁴ Varikwerhu a va dyondze ku chivirikela mintirho leyinene, va ta pfuna lomu ku pfumariwaka ngopfu; va nga tshuki va hanya vutomi lebyi nga pfuniki nchumu.

¹⁵ Hinkwavo lava ndzi nga na vona la, va ku rungula. Rungula vanghana va hina eku pfumeleni. Tintswalo ta Xikwembu a ti ve na n'wina hinkwenu!