Tinhlayo 35 - BIBELE Mahungu Lamanene

Ta miti ya Valevhi

¹ Loko va ri erivaleni ra tiko ra Mowabu, kusuhi ni nambu wa Yordani, ku langutana na Yeriko, HOSI Xikwembu xi ku ka Muxe:

² “Byela Vaisraele leswaku ndzi ri: Etindhawini leti ti nga ta va ndzhaka ya n'wina, mi fanele ku nyika Valevhi miti leyi va nga ta tshama eka yona, mi va tsemela ni madyelo ya swifuwo ku rhendzeleka ni miti ya kona.

³ Miti leyi Valevhi va nga ta tshama eka yona, yi ta va ya vona, ni madyelo ya kona ma ta va ya mintlhambi ya vona ya tihomu, ni ya swifuwo leswin'wana hinkwaswo.

⁴ Madyelo ya swifuwo lama nga ta nyikiwa Valevhi, ma fanele ku sukela erirhangwini ra muti, ma famba mpfhuka wo ringana 500 m matlhelo hinkwawo ya muti.

⁵ Kutani madyelo lawa ma nga ta rhendzela miti ya Valevhi, ma ta va ni matlhelo lama ringananaka, ma va 1 km; Valevhi va ta dyisela kona swifuwo swa vona.

⁶ Mi fanele ku nyika Valevhi miti ya 6 leyi vadlayi va nga ta pfumeleriwa ku ya tumbela eka yona, mi tlhela mi va nyika yin'wana miti ya 42.

⁷ Miti hinkwayo leyi mi nga ta yi nyika Valevhi yi ta va 48, yi va ni madyelo ya yona.

⁸ Miti leyi nga ta nyikiwa Valevhi eka ndzhaka ya nyimba yin'wana ni yin'wana, yi fanele ku fambelana ni ntalo wa vanhu va nyimba yoleyo; eka nyimba leyi nga ni vanhu lavo tala, Valevhi va ta nyikiwa miti leyo tala, kasi eka nyimba leyi nga ni vanhu vatsongo, Valevhi va ta nyikiwa miti yitsongo.”

Ta miti yo tumbela eka yona

⁹ Kutani HOSI Xikwembu xi ku ka Muxe:

¹⁰ “Byela Vaisraele leswaku ndzi ri: Loko mi tsemakanya nambu wa Yordani mi nghena etikweni ra Kanana,

¹¹ mi fanele ku hlawula miti yin'wana leswaku yi va miti leyi lava dlayaka vanhu, kambe ku nga ri ha vomu, va nga ta tsutsuma va ya tumbela eka yona.

¹² Miti leyi, vadlayi va ta ya tumbela eka yona loko va chava ku dlayiwa hi varihiseli; hikowalaho munhu loyi a dlayeke un'wana, a nga ka a nga fi a nga si avanyisiwa hi ntshungu.

¹³ Kutani miti leyi ya 6 leyi mi nga ta yi nyika Valevhi, yi ta va miti ya n'wina yo ya tumbela eka yona.

¹⁴ Mi ta nyika Valevhi miti minharhu entsungeni lowu wa Yordani, ni minharhu etikweni ra Kanana, leswaku yi va miti yo tumbela eka yona.

¹⁵ Miti leyi ya 6 yi ta va vutumbelo bya n'wina ni vaendzi va n'wina ni lava luveleke exikarhi ka n'wina; munhu un'wana ni un'wana loyi a dlayaka un'wana, kambe ku nga ri ha vomu, ú ta tsutsuma a ya tumbela emitini ya kona.

¹⁶ “Loko munhu a ba un'wana hi nsimbhi a n'wi dlaya, munhu loyi i mudlayi, kutani ú fanele ku dlayiwa na yena;

¹⁷ loko a n'wi hoxa hi ribye leri ringaneke ku dlaya munhu, kutani ri n'wi ba a fa, munhu loyi wa ha vuriwa mudlayi, kutani na yena ú fanele ku dlayiwa;

¹⁸ ni loko a n'wi ba hi mhandze leyi ringaneke ku dlaya munhu, kutani a n'wi dlaya, munhu loyi wa ha ri mudlayi, kutani na yena ú fanele ku dlayiwa.

¹⁹ Murihiseli ú fanele ku dlaya mudlayi hi yexe, siku a n'wi kumaka.

²⁰ Loko munhu a tlumba un'wana hi mhaka ya rivengo, kumbe loko a n'wi tumbelela a n'wi hoxa hi xin'wana a n'wi dlaya,

²¹ kumbe loko a ba nala wa yena hi xibakele a n'wi dlaya, munhu loyi ú ta va ri mudlayi, kutani ú fanele ku dlayiwa na yena. Murihiseli ú ta dlaya mudlayi loyi siku a n'wi kumaka.

²² “Kambe munhu a nga tshuka a tlumba loyi a nga riki nala wa yena, kumbe a nga tshuka a n'wi hoxa hi xin'wana a n'wi dlaya, a nga tiyimeselanga swona.

²³ Kumbe a nga hoxa ribye leri ringaneke ku dlaya munhu, a nga swi vonanga leswaku ku ni munhu, kutani ribye ri ba munhu loyi a fa, kasi a a nga ri nala wa yena, naswona mudlayi a a nga tiyimiselanga ku n'wi vavisa.

²⁴ Loko swi va tano, ntshungu wu fanele ku avanyisa mhaka ya mudlayi ni murihiseli hi ku landza milawu leyi:

²⁵ Eku avanyiseni ka wona, ntshungu wu ta sirhelela mudlayi eka murihiseli, kutani wu tlherisela mudlayi emutini wo tumbela eka wona, laha a a tsutsumele kona, leswaku a ya tshama kona, ku kondza loko ku lova Muprista lonkulu loyi a vekiweke entirhweni hi ku cheriwa mafurha layo hlawuleka enhlokweni.

²⁶ Kambe loko mudlayi o tshuka a humile exivandleni xa muti lowu a tsutsumeke a ya tumbela eka wona,

²⁷ a ya hlangana ni murihiseli ehandle ka xivandla xa muti lowu, kutani murihiseli a dlaya mudlayi, murihiseli a a nga vi na nandzu wa ku va a dlayile munhu.

²⁸ Mudlayi ú fanele ku tshama emutini lowu a nga ya a ya tumbela eka wona, Muprista lonkulu a kondza a lova. Loko Muprista lonkulu a lovile, mudlayi a nga ha timukela.

²⁹ “Timhaka leti ti ta va milawu leyi nga ta boha n'wina ni vatukulu va n'wina, hinkwako lomu mi nga ta va mi ri kona.

³⁰ Mudlayi un'wana ni un'wana ú ta dlayiwa ntsena loko ku ri ni timbhoni; ku nga tshuki ku va ni munhu ni un'we loyi a dlayiwaka hikwalaho ka vumbhoni bya munhu un'we ntsena.

³¹ Tlhandlakambirhi, mi nga tshuki mi amukela mali leyi mudlayi a nga tshukaka a mi nyikile ku kutsula vutomi bya yena; mudlayi ú fanele ku dlayiwa.

³² Naswona mi nga tshuki mi amukela mali ya loyi a tsutsumeleke emutini wo tumbela eka wona, leswaku mi n'wi tshika a muka, Muprista a nga si lova.

³³ Mi nga tshuki mi nyamisa tiko leri mi tshamaka eka rona, hikuva ngati yi nyamisa tiko, naswona ku hava mhamba leyi yi nga basisaka tiko ehandle ka ku halata ngati ya mudlayi loyi a halateke ngati ya munhu un'wana.

³⁴ Kutani mi nga tshuki mi nyamisa tiko leri mi tshamaka eka rona, hikuva mina HOSI ndzi tshama eka rona exikarhi ka n'wina Vaisraele.”