Tinhlayo 34 - BIBELE Mahungu Lamanene

Mindzilekana ya tiko ra Kanana

¹ HOSI Xikwembu xi ku ka Muxe:

² “Byela Vaisraele leswaku ndzi ri: Loko mi nghenile etikweni ra Kanana, ri nga tiko leri mi nga ta nyikiwa rona hinkwaro ka rona, ri va ndzhaka ya n'wina, mindzilekana ya rona yi ta va leyi:

³ Hi tlhelo ra dzonga ri ta sukela emananga ya Sini, ri lulama ni tiko ra Edomu, kutani ndzilekana wa rona hi tlhelo leri ra dzonga wu ta sukela laha Lwandle-ra-ku-fa ri helelaka kona evuxeni.

⁴ Ndzilekana lowu wu ta jika wu ya hundza hi le dzongeni ra xiphandze xa Akrabimi, wu tsemakanya wu kongoma eSini, wu ya fika edzongeni ra Kadexe-Bariniya, wu hundza hi le Hasari-Adara, wu ya fika le Asimoni.

⁵ Kutani wu jika wu lulama ni ndzilekana wa Egipta, wu ya helela eLwandle ra Mediteraniya.

⁶ “Hi tlhelo ra vupeladyambu, ndzilekana wa tiko ra n'wina wu ta lulama ni Lwandle ra Mediteraniya. Lwandle leri hi wona ndzilekana wa n'wina evupeladyambu.

⁷ “Ndzilekana wa tiko ra n'wina en'walungwini, mi ta wu ba wu sukela eLwandle ra Mediteraniya, wu ya fika entshaveni ya Hori;

⁸ ku suka entshaveni ya Hori, mi ta wu ba wu kongoma exiphandzeni xa Hamata, wu hundza wu ya fika eSedada.

⁹ Kutani wu ta famba wu ya fika eZifironi, wu ya helela eHasari-Enana. Lowu wu ta va ndzilekana wa tiko ra n'wina en'walungwini.

¹⁰ “Ndzilekana wa tiko ra n'wina evuxeni, mi ta wu ba wu sukela eHasari-Enana, wu kongoma eXefamu.

¹¹ Kutani ku suka eXefamu, wu ta rhelela wu ya hundza hi le Ribila, evuxeni bya Ayini, wu kongoma switsunga leswi nga evuxeni bya Lwandle ra Galeliya.

¹² Ndzilekana lowu wu ta rhelela wu lulama ni nambu wa Yordani, wu ya helela eLwandle-ra-ku-fa. “Leyi hi yona mindzilekana hinkwayo ya tiko leri ri nga ta va ra n'wina.”

¹³ Muxe a byela Vaisraele a ku: “Leri hi rona tiko leri mi nga ta avelana rona hi vuhlolotwana, ri nga tiko leri HOSI Xikwembu xi leriseke leswaku ri nyikiwa tinyimba ta 9, ni hafu ya nyimba yin'wana.

¹⁴ Loko va ri va mindyangu ya nyimba ya ka Rhuveni, ni va mindyangu ya nyimba ya ka Gadi ni hafu ya nyimba ya ka Manase, ndzhaka ya vona va yi kumile;

¹⁵ va tinyimba leti timbirhi na hafu, va kumile ndzhaka ya vona entsungeni lowu wa nambu wa Yordani, ku langutana ni muti wa Yeriko, hi tlhelo ra le vuxeni.”

Varhangeri entirhweni wa ku ba ndzilekana

¹⁶ HOSI Xikwembu xi ku ka Muxe:

¹⁷ “Vavanuna lava nga ta phakela Vaisraele tiko ra Kanana, i muprista Eliyazara, na Yoxuwa n'wana Nuni.

¹⁸ Enyimbeni yin'wana ni yin'wana, mi ta teka nkulukumba un'we wo pfuneta entirhweni lowu wa ku phakela tiko.

¹⁹ Mavito ya vona hi lawa: Eka nyimba ya Yuda i Kalebe n'wana Yefune.

²⁰ Eka nyimba ya va ka Simiyoni i Xemuwele n'wana Amihudi.

²¹ Eka nyimba ya Benjamini i Elidada n'wana Kisiloni.

²² Eka nyimba ya va ka Dani, nkulukumba wa kona i Buki n'wana Yogili.

²³ Eka nyimba ya va ka Manase n'wana Yosefa, nkulukumba wa kona i Haniele n'wana Efodi.

²⁴ Eka nyimba ya va ka Efrayimi n'wana Yosefa, nkulukumba wa kona i Kemuwele n'wana Xifitani.

²⁵ Eka nyimba ya va ka Zebuloni, nkulukumba wa kona i Elisafani n'wana Parinaka.

²⁶ Eka nyimba ya va ka Isakara, nkulukumba wa kona i Palatiele n'wana Azana.

²⁷ Eka nyimba ya va ka Asere, nkulukumba wa kona i Ahihudu n'wana Xelomi.

²⁸ Eka nyimba ya va ka Neftali, nkulukumba wa kona i Padahele n'wana Amihudi.”

²⁹ Lava hi vona vavanuna lava HOSI Xikwembu xi va leriseke ku phakela Vaisraele tindhawu ta vona etikweni ra Kanana.