Tinhlayo 33 - BIBELE Mahungu Lamanene

Tindhawu leti Vaisraele va goveke ka tona eriendzweni ra vona

¹ Leti i tindhawu leti Vaisraele va fambeke va gova eka tona, loko va humile etikweni ra Egipta ni mavandla ya vona, va rhangeriwile hi Muxe na Aroni.

² Hi ku lerisiwa hi HOSI Xikwembu, Muxe a a tsala mavito ya tindhawu leti a va suka eka tona, loko va ya gova kun'wana.

³ Vaisraele va sukile eRamsese hi siku ra vu-15 ra n'hweti yo sungula, ri nga leri tlhandlamaka siku ra Nkhuvo wa Paseka; va humile etikweni ra Egipta va ntshunxekile swinene, Vaegipta hinkwavo va ri karhi va va vona.

⁴ Loko Vaisraele va karhi va huma, Vaegipta a va ri eku lahleni ka vana va mativula lava HOSI Xikwembu xi va heriseke exikarhi ka vona, loko xi ri karhi xi avanyisa swikwembu swa vona.

⁵ Loko Vaisraele va suka eRamsese, va yile va ya gova eSukoti.

⁶ Kutani va suka eSukoti, va ya gova le Etamu, laha mananga ma sungulaka kona.

⁷ Va suka le Etamu, va tlhelela ndzhaku va kongoma muti wa Pi-Hahiroto lowu nga evuxeni bya Baala-Sefoni, kutani va ya gova kusuhi na Migidolo.

⁸ Va suka ePi-Hahiroto, kutani va tsemakanya Lwandle-ro-Tshwuka, va ya nghena emananga ya Etamu, va famba masiku manharhu emananga lawa, va kondza va ya gova eMara.

⁹ Va suka eMara, va ya fika le Elimi, laha a ku ri ni swihlovo swa 12 ni mirhi ya 70 ya mincindzu, va gova kona.

¹⁰ Va suka le Elimi, va ya gova kusuhi ni Lwandle-ro-Tshwuka.

¹¹ Va suka eLwandle-ro-Tshwuka, va ya gova emananga ya Sina.

¹² Va suka emananga ya Sina, va ya gova eDofika.

¹³ Va suka eDofika, va ya gova le Aluxi.

¹⁴ Va suka le Aluxi, va ya gova eRefidimi, laha vanhu va nga pfumala mati yo nwa.

¹⁵ Va suka eRefidimi, va ya gova emananga ya Sinayi.

¹⁶ Va suka emananga ya Sinayi, va ya gova eKibroti-Hatavha.

¹⁷ Va suka eKibroti-Hatavha va ya gova eHaseroti.

¹⁸ Va suka eHaseroti, va ya gova eRitima.

¹⁹ Va suka eRitima, va ya gova eRimoni-Perese;

²⁰ Va suka eRimoni-Perese, va ya gova eLibina.

²¹ Va suka eLibina, va ya gova eRisa.

²² Va suka eRisa, va ya gova eKehelata.

²³ Va suka eKehelata, va ya gova entshaveni ya Xefere.

²⁴ Va suka entshaveni ya Xefere, va ya gova eHarada.

²⁵ Va suka eHarada, va ya gova eMakeloto.

²⁶ Va suka eMakeloto, va ya gova eTahata.

²⁷ Va suka eTahata, va ya gova eTera.

²⁸ Va suka eTera, va ya gova eMiteka.

²⁹ Va suka eMiteka, va ya gova eHaximona.

³⁰ Va suka eHaximona, va ya gova eMaseroto.

³¹ Va suka eMaseroto, va ya gova eBene-Yakani.

³² Va suka eBene-Yakani, va ya gova eHori-Hagidigada.

³³ Va suka eHori-Hagidigada, va ya gova eYotibata.

³⁴ Va suka eYotibata, va ya gova le Abrona.

³⁵ Va suka le Abrona, va ya gova le Esiyoni-Gebere.

³⁶ Va suka le Esiyoni-Gebere, va ya gova eKadexe, emananga ya Sini.

³⁷ Va suka eKadexe, va ya gova entshaveni ya Hori, endzilekaneni wa tiko ra Edomu.

³⁸ Hi siku ro sungula ra n'hweti ya vunharhu eka lembe ra vu-40 endzhaku ka loko Vaisraele va humile etikweni ra Egipta, muprista Aroni a tlhandlukela entshaveni ya Hori, hilaha HOSI Xikwembu xi leriseke hakona, a fika a fela kona.

³⁹ Loko Aroni a fa kwale ntshaveni ya Hori, a a ri ni malembe ya 123.

⁴⁰ Mukanana un'wana loyi a a ri hosi ya le Aradi, loyi a a tshama hi tlhelo ra le dzongeni ra tiko ra Kanana, ú swi twile leswaku Vaisraele va karhi va ta.

⁴¹ Vaisraele va suka entshaveni ya Hori, va ya gova eSalimona.

⁴² Va suka eSalimona, va ya gova ePunono.

⁴³ Va suka ePunono, va ya gova le Oboto.

⁴⁴ Va suka le Oboto, va ya gova le Iye-Abarimi, etikweni ra Mowabu.

⁴⁵ Kutani va suka le Iyimi, va ya gova eDiboni-Gadi.

⁴⁶ Va suka eDiboni-Gadi, va ya gova le Alimoni-Diblatayimi.

⁴⁷ Va suka le Alimoni-Diblatayimi, va ya gova entshaveni ya Abarimi, kusuhi na Nebo.

⁴⁸ Va suka entshaveni ya Abarimi, va ya gova erivaleni ra tiko ra Mowabu, kusuhi ni nambu wa Yordani, ku langutana ni muti wa Yeriko.

⁴⁹ Va govile kusuhi ni nambu wa Yordani ku sukela eBeta-Yeximoto, ku ya fika le Avele-Xitimi kwale rivaleni ra tiko ra Mowabu.

Swileriso hi tlhelo ra ku nghena ka Vaisraele eKanana

⁵⁰ Loko va ri erivaleni ra tiko ra Mowabu, kusuhi ni nambu wa Yordani ku langutana na Yeriko, HOSI Xikwembu xi ku ka Muxe:

⁵¹ “Byela Vaisraele leswaku ndzi ri: ‘Loko mi ta va mi tsemakanyile nambu wa Yordani mi nghena etikweni ra Kanana,

⁵² mi fanele ku hlongola vaaki hinkwavo va tiko leri, mi fayetela ni maribye hinkwawo ya vukhongeri bya vona bya hava, mi hindzimuxela ni swifaniso hinkwaswo swa swikwembu leswi va swi vumbeke, mi herisa ni switsunga swa vona hinkwaswo leswo hlawuleka;

⁵³ mi ta teka tiko ra vona mi tshama eka rona, hikuva tiko leri ndzi mi nyikile rona leswaku ri va ra n'wina.

⁵⁴ Mi ta avelana tiko hi ku tirhisa vuhlolotwana. Mi ta nyikiwa ndzhaka ya n'wina hi ku ya hi ntalo wa vanhu va nyimba yin'wana ni yin'wana: Nyimba leyi nga ni vanhu lavo tala, yi ta nyikiwa ndhawu leyikulu, kasi nyimba leyi nga ni vanhu vatsongo yi ta nyikiwa ndhawu leyitsongo. Munhu un'wana ni un'wana ú ta kuma leswi vuhlolotwana byi nga ta komba swona, swi va swa yena.

⁵⁵ Loko mo ka mi nga hlongoli hinkwavo vaaki va tiko leri, lava mi nga ta va siya va ta fana ni swilavi ematihlweni ya n'wina ni switlhavi emirini wa n'wina, va mi karhata etikweni reri mi nga ta tshama eka rona,

⁵⁶ kutani leswi a ndzi ehleketile ku swi endla eka vona, ndzi ta swi endla eka n'wina.’ ”