Tinhlayo 31 - BIBELE Mahungu Lamanene

Ta Vaisraele loko va rihisela eka Vamidiyani

¹ HOSI Xikwembu xi ku ka Muxe:

² “Hlasela Vamidiyani u rihisela leswi va endleke Vaisraele swona; kutani loko u hetile, u ta fa u landza vatata wa wena.”

³ Kutani Muxe a ku ka ntshungu: “Hlawulani vavanuna exikarhi ka n'wina leswaku va hloma matlhari, va huma va ya hlasela Vamidiyani, va rihisela leswi va swi endleke eka HOSI Xikwembu.

⁴ Eka nyimba yin'wana ni yin'wana, mi ta humesa vavanuna va 1 000, va ya enyimpini.”

⁵ Kutani, exikarhi ka magidigidi ya Vaisraele, nyimba yin'wana ni yin'wana yi humesa vavanuna va 1 000; hinkwavo lava hlomeke matlhari a va ri 12 000.

⁶ Kutani Muxe a va rhuma va ya enyimpini, va famba swin'we na Finiyasi n'wana muprista Eliyazara, loyi a a ta ya hlayisa swibya leswi humaka exivandleni lexo hlawuleka ni timhalamhala leti ti nga ta biwa enyimpini.

⁷ Va endla hilaha HOSI Xikwembu xi leriseke Muxe hakona. Va hlasela Vamidiyani, va dlayetela vavanuna hinkwavo;

⁸ va dlaya ni tihosi ta ntlhanu ta Vamidiyani, ti nga leti: Evhi, na Rekemu, na Suru, na Huru, na Reba, va dlaya na Balaama n'wana Beyori.

⁹ Vaisraele va khoma vavasati va Vamidiyani va famba na vona ni vana va vona; va phangha ni mintlhambi hinkwayo ya swifuwo swa vona, ni rifuwo ra vona hinkwaro,

¹⁰ va hisa miti hinkwayo ya Vamidiyani ni mixaxa ya vona hinkwayo.

¹¹ Kutani va teka vanhu hinkwavo lava va va khomeke, ni swifuwo hinkwaswo leswi va swi phangheke,

¹² va ya na swona eka Muxe, ni muprista Eliyazara, ni ntshungu hinkwawo wa Vaisraele, erivaleni ra Mowabu, laha va goveke kona kusuhi ni nambu wa Yordani ku langutana na Yeriko.

Ta Muxe loko a hlanganisa masocha

¹³ Muxe na muprista Eliyazara ni varhangeri hinkwavo va ntshungu va ya hlanganisa mavuthu ehandle ka mixaxa.

¹⁴ Muxe a hlundzukela vafambisi va nyimpi, va nga varhangeri va mavuthu lama nga ni masocha ya 1 000, ni varhangeri va mavuthu lama nga ni masocha ya 100, lama vuyeke hi le nyimpini.

¹⁵ Muxe a ku ka vona: “Xana mi tshikile vavasati hinkwavo va hanya xana?

¹⁶ Xana ma rivala leswaku emhakeni ya le Peyori, vavasati lava hi vona va kuceteriweke hi Balaama, kutani va mi dyohisa, mi nga ha tshembeki eka HOSI Xikwembu, ntungu wu nghena exikarhi ka n'wina hinkwenu, xana?

¹⁷ Kutani sweswi, exikarhi ka swihlangi swa Vamidiyani, dlayetelani swa xinuna hinkwaswo, mi dlaya ni vavasati hinkwavo lava nga tshama va tivana ni wanuna.

¹⁸ Kambe vanhwanyana hinkwavo lava nga si tivanaka ni wanuna, mi va tshika va hanya, mi tihlayisela vona.

¹⁹ N'wina ni lava mi va khomeke, mi ta gova masiku ya 7 ehandle ka mixaxa; un'wana ni un'wana wa n'wina loyi a dlayeke munhu kumbe loyi a nga khumba ntsumbu, ú fanele ku tibasisa hi siku ra vunharhu ni ra vu-7.

²⁰ Mi fanele ku basisa swiambalo hinkwaswo, ni swilo hinkwaswo leswi endliweke hi madzovo, ni leswi lukiweke hi voya bya timbuti, ni hinkwaswo leswi vatliweke hi timhandze.”

²¹ Muprista Eliyazara a byela vavanuna lava a va yile enyimpini, a ku ka vona: “Nawu lowu HOSI Xikwembu xi wu leriseke Muxe hi lowu:

²² Nsuku, ni silivhere, ni koporo, ni nsimbhi, ni thini, ni ntsopfu,

²³ ni hinkwaswo leswi nga chaviki ndzilo, mi ta swi basisa hi ku swi hisa, kambe leswi chavaka ndzilo mi ta swi basisa hi ku swi hlantswa hi mati yo basisa leswi nyameke.

²⁴ Hi siku ra vu-7, mi fanele ku hlantswa swiambalo swa n'wina; endzhaku ka sweswo mi ta va mi tengile, kutani mi ta nghena emixaxeni.”

Ta ku phakiwa ka leswi phanghiweke

²⁵ HOSI Xikwembu xi ku ka Muxe:

²⁶ “Wena na muprista Eliyazara ni varhangeri va tinyimba ta Vaisraele, hlayani ntsengo va vanhu lava khomiweke ni swifuwo leswi phanghiweke.

²⁷ Kutani mi swi avanyisa hi le xikarhi, swin'wana swi va swa masocha lawa a ma yile enyimpini, swin'wana swi va swa ntshungu.

²⁸ Eka leswi nyikiweke masocha, u ta ndzi humesela nhlengo mina HOSI. Exikarhi ka vanhu va 500, mi ta humesa un'we, ni le ka tihomu ni timbhongolo ni tinyimpfu, mi ta endlisa sweswo.

²⁹ Kutani swilo leswi u ta swi nyika muprista Eliyazara, wu va nhlengo lowu humeseriwaka mina HOSI.

³⁰ Eka leswi nyikiweke ntshungu wa Vaisraele, u ta pambula munhu un'we exikarhi ka vanhu va 50, u endlisa sweswo ni le ka tihomu, ni timbhongolo, ni tinyimpfu, u nyika Valevhi, va nga vona vahlayisi va Ntsonga wa mina HOSI.”

³¹ Kutani Muxe na muprista Eliyazara va endla hilaha HOSI Xikwembu xi leriseke Muxe hakona.

³² Endzhaku ka loko masocha ma pamburile swa wona eka leswi phanghiweke, leswi saleke hi leswi: Tinyimpfu ta 675 000,

³³ ni tihomu ta 72 000,

³⁴ ni timbhongolo ta 61 000,

³⁵ ni vanhwanyana va 32 000 lava nga si tivanaka ni wanuna.

³⁶ Eka leswi nyikiweke masocha, a ku ri ni tinyimpfu ta 337 500;

³⁷ eka tona, nhlengo wa HOSI Xikwembu a ti ri tinyimpfu ta 675;

³⁸ tihomu a ti ri 36 000; kutani eka tona, nhlengo wa HOSI Xikwembu a ti ri tihomu ta 72;

³⁹ timbhongolo a ti ri 30 500; eka tona, nhlengo wa HOSI Xikwembu a ti ri timbhongolo ta 61;

⁴⁰ vanhu a va ri 16 000; eka vona, nhlengo wa HOSI Xikwembu a va ri vanhu va 32.

⁴¹ Muxe a nyika muprista Eliyazara leswi humeseriweke HOSI Xikwembu, hilaha xi n'wi leriseke hakona.

⁴² Swilo leswi Muxe a swi nyikeke ntshungu wa Vaisraele, a swi ringana ni leswi a swi nyikeke masocha.

⁴³ Eka swona, a ku ri ni tinyimpfu ta 337 500,

⁴⁴ ni tihomu ta 36 000,

⁴⁵ ni timbhongolo ta 30 500,

⁴⁶ ni vanhu va 16 000.

⁴⁷ Eka swa Vaisraele Muxe a teka munhu un'we exikarhi ka vanhu va 50, ni xifuwo xin'we exikarhi ka swifuwo swa 50, a nyika Valevhi, va nga vona vahlayisi va Ntsonga wa HOSI Xikwembu. Muxe ú endlile hilaha HOSI Xikwembu xi n'wi leriseke hakona.

⁴⁸ Kutani vafambisi va masocha lawa a ma yile enyimpini, va nga varhangeri va mavuthu lama nga ni masocha ya 1 000, ni lama nga ni masocha ya 100, va ya eka Muxe,

⁴⁹ va fika va ku ka yena: “Hina malandza ya wena hi hlayile masocha lawa hi ma rhangelaka, kutani hi kumile leswaku ma kona hinkwawo.

⁵⁰ Hina hi ta hi ta humesela HOSI Xikwembu nhlengo hi swilo swa nsuku leswi un'wana ni un'wana wa hina a nga pambula swona, swi nga leswi: Masindza ya le mavokweni, ni swingwavila swa le tintihweni ni swa le tindleveni, ni vuhlalu; swilo leswi hinkwaswo hi ta hi ta swi humesela HOSI Xikwembu, wu va nhlengo wo kutsula vutomi bya hina.”

⁵¹ Kutani Muxe na muprista Eliyazara va amukela swilo leswi hinkwaswo swo bomba ha swona swa nsuku.

⁵² Nsuku hinkwawo lowu humesiweke hi varhangeri va mavuthu lama nga ni masocha ya 1 000 ni ya 100, a wu tika 200 kg.

⁵³ (Socha rin'wana ni rin'wana a ri tiphangherile swa rona.)

⁵⁴ Muxe na muprista Eliyazara va teka nsuku lowu humaka eka varhangeri lava va mavuthu, kutani va wu yisa eka Ntsonga lowo Hlawuleka, leswaku HOSI Xikwembu xi ta tsundzuka Vaisraele.