Tinhlayo 29 - BIBELE Mahungu Lamanene

Magandzelo ya nkhuvo wo khangula lembe

¹ “Hi siku ro sungula ra n'hweti ya vu-7, Vaisraele va fanele ku hlengeletana va gandzela mina HOSI; va nga tshuki va tirha ntirho ni wun'we lowu tikaka. Siku rero ri ta va siku ra vona ro ba timhalamhala.

² Hi siku ra kona, va fanele ku humesa magandzelo lama hisiwaka, lawa ku nun'hwela ka wona ku nga ta ndzi tsakisa mina HOSI. Va ta tlhava xinkuzana xin'we, ni khuna rin'we, ni swinyimpfana swa 7 swa xinuna swa lembe rin'we leswi nga solekiki.

³ Eka magandzelo lawa, nkuzi va fanela ku yi humesa ni xitshatshana xin'we xa mapa lamanene lama pfanganyisiweke ni mafurha; khuna rona, va ta ri humesa ni swintewana swimbirhi swa mapa.

⁴ Kasi swinyimpfana leswa 7, xin'wana ni xin'wana va ta xi humesa ni xintewana xin'we xa mapa ya kona.

⁵ Va ta tlhela va tlhava ni xiphongho, xi va mhamba yo va basisa.

⁶ Magandzelo lama hisiwaka lawa, va ta ma humesa ehandle ka magandzelo ya siku ra ku tshama ka n'weti ni mapa ya wona; naswona ma ta humesiwa ehandle ka magandzelo ya masiku hinkwawo ni mapa ya wona ni vhinyo ya wona, hi ku landza milawu ya wona; kutani ku nun'hwela ka wona ku ta ndzi tsakisa mina HOSI.”

Magandzelo ya siku ra ku basisa lava tinyamiseke

⁷ “Hi siku ra vukhume ra n'hweti leyi ya vu-7, va fanele ku hlengeletana va ndzi gandzela mina HOSI, va titsona swakudya, va nga tirhi ni ntirho ni wun'we,

⁸ kambe hi siku rero, va fanele ku ndzi humesela magandzelo lama hisiwaka lawa ku nun'hwela ka wona ku nga ta ndzi tsakisa: Va ta tlhava xinkuzana xin'we, ni khuna rin'we, ni swinyimpfana swa 7 swa xinuna swa lembe rin'we leswi nga solekiki.

⁹ Va ta humesa ni mapa ya kona lamanene lama pfanganyisiweke ni mafurha; nkuzi va ta yi humesa ni xitshatshana xin'we, khuna rona va ta ri humesa ni swintewana swimbirhi;

¹⁰ kasi swinyimpfana leswa 7, xin'wana ni xin'wana va ta xi humesa ni xintewana xin'we xa mapa lawa.

¹¹ Va ta tlhava ni xiphongho xin'we xo basisa lava tinyamiseke, ehandle ka xiphongho xa mhamba yo susa swidyoho; naswona va ha ta humesa magandzelo ya masiku hinkwawo, ni mapa ya wona ni vhinyo ya wona.

Magandzelo ya Nkhuvo wa Mintsonga

¹² “Hi siku ra vu-15 ra n'hweti yoleyi ya vu-7, va fanele ku hlengeletana va ndzi gandzela mina HOSI; va nga tshuki va tirha ntirho ni wun'we lowu tikaka, kambe va fanele ku sungula nkhuvo lowu wu nga ta teka masiku ya 7, va tlangela mina HOSI.

¹³ Hi siku rero, va ta humesa magandzelo lama hisiwaka lawa ku nun'hwela ka wona ku nga ta ndzi tsakisa mina HOSI. Va ta tlhava swinkuzana swa 13, ni makhuna mambirhi, ni swinyimpfana swa 14 swa xinuna swa lembe rin'we, swifuwo leswi hinkwaswo swi va leswi nga solekiki.

¹⁴ Va ta humesa ni mapa ya kona lamanene lama pfanganyisiweke ni mafurha; yin'wana ni yin'wana ya tinkuzi leta 13, va ta yi humesa ni xitshatshana xin'we; rin'wana ni rin'wana ra makhuna lamambirhi, va ta ri humesa ni swintewana swimbirhi;

¹⁵ kasi swinyimpfana leswa 14, xin'wana ni xin'wana va ta xi humesa ni xintewana xin'we xa mapa lawa.

¹⁶ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

¹⁷ “Hi siku ra vumbirhi, va ta tlhava swinkuzana swa 12, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

¹⁸ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

¹⁹ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

²⁰ “Hi siku ra vunharhu, va ta tlhava tinkuzi ta 11, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

²¹ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

²² Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

²³ “Hi siku ra vumune, va ta tlhava tinkuzi ta khume, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

²⁴ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

²⁵ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

²⁶ “Hi siku ra vuntlhanu, va ta tlhava tinkuzi ta 9, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

²⁷ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

²⁸ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

²⁹ “Hi siku ra vu-6, va ta tlhava tinkuzi ta 8, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

³⁰ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

³¹ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

³² “Hi siku ra vu-7, va ta tlhava tinkuzi ta 7, ni makhuna mambirhi, ni swinyimpfana swa 14 swa xinuna swa lembe rin'we leswi nga solekiki;

³³ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo leyi vekiweke.

³⁴ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

³⁵ “Hi siku ra vu-8, va fanele ku hlengeletana va ndzi gandzela mina HOSI; va nga tshuki va tirha ntirho ni wun'we lowu tikaka,

³⁶ kambe va fanele ku humesa magandzelo lama hisiwaka lawa ku nun'hwela ka wona ku nga ta ndzi tsakisa mina HOSI. Va ta tlhava nkuzi yin'we, ni khuna rin'we, ni swinyimpfana swa 7 swa xinuna swa lembe rin'we leswi nga solekiki;

³⁷ swifuwo leswi swi ta humesiwa ni mapa ya magandzelo ni vhinyo ya wona, hi ku ya hi mimpimo ya kona leyi vekiweke.

³⁸ Va ta tlhava ni xiphongho xin'we xa mhamba yo susa swidyoho, ehandle ka magandzelo lama hisiwaka ya masiku hinkwawo, ni mapa ya wona ni vhinyo ya wona.

³⁹ “Leswi hi swona leswi va fanelaka ku ndzi humesela swona mina HOSI, eminkhubyeni ya vona leyi vekiweke, loko va humesa magandzelo lama hisiwaka ni mapa ya wona ni vhinyo ya wona, ni loko va humesa magandzelo ya xinakulobye; loko ma ri magandzelo ya ku tiboha hi ku hlambanya, ni lawa munhu a ma humesaka hi ku titwa, wona ma le tlhelo.”

⁴⁰ Kutani Muxe a byela Vaisraele hinkwaswo hilaha HOSI Xikwembu xi n'wi leriseke hakona.