Tinhlayo 26 - BIBELE Mahungu Lamanene

Ta Vaisraele loko va hlayiwa ra vumbirhi

¹ Loko ntungu wu herile, HOSI Xikwembu xi byela Muxe na muprista Eliyazara n'wana Aroni, xi ku:

² “Hlayani ntsengo wa Vaisraele hinkwavo hi mindyangu ya vona; mi hlaya hinkwavo lava ringaneke ku hloma matlhari, va malembe ya 20 ni ku tlula.”

³ Kutani Muxe na muprista Eliyazara va vulavula ni Vaisraele erivaleni ra tiko ra Mowabu, kusuhi ni nambu wa Yordani, ku langutana ni muti wa Yeriko,

⁴ va va byela leswaku va hlaya vavanuna va malembe ya 20 ni ku tlula, hilaha HOSI Xikwembu xi leriseke Muxe hakona. Vaisraele lava humeke etikweni ra Egipta hi lava:

⁵ Mindyangu ya vana va Rhuveni, yena mativula ya Yakobo, hi leyi: Wa ka Hanoko, ni wa ka Palu,

⁶ ni wa ka Hesironi, ni wa ka Karimi.

⁷ Hi yona mindyangu ya va ka Rhuveni; ntsengo wa vona a wu ri 43 730.

⁸ N'wana Palu a a ri Eliyabu;

⁹ vana va Eliyabu a va ri Nemuwele na Datani na Abirama. (Datani na Abirama hi vona lava va rhambeke ntshungu wa Vaisraele, enkarhini lowu va pfukeke Muxe na Aroni; naswona, loko vanghana va Kora va sandza HOSI Xikwembu, na vona a va ri kona.

¹⁰ Hi vona lava misava yi nga pfuleka yi va mita, yi mita na Kora, a fa siku rin'we ni vanghana va yena, va nga vavanuna va 250 lava hisiweke hi ndzilo, kutani vanhu lava va hundzuka xihlambanyiso;

¹¹ loko va ri vana va Kora vona a va fanga.)

¹² Mindyangu ya vana va Simiyoni hi leyi: Wa ka Newuwele, ni wa ka Yamini, ni wa ka Yakini,

¹³ ni wa ka Zera, ni wa ka Xawulu.

¹⁴ Va ka Simiyoni ni mindyangu ya vona a va ri 22 200.

¹⁵ Mindyangu ya vana va Gadi hi leyi: Wa ka Sefoni, ni wa ka Hagi, ni wa ka Xuni,

¹⁶ ni wa ka Ozini, ni wa ka Eri,

¹⁷ ni wa ka Arodi, ni wa ka Areli.

¹⁸ Hi yona mindyangu ya va ka Gadi; ntsengo wa vona a wu ri 40 500.

¹⁹ Exikarhi ka vana va Yuda, ku lovile vambirhi, Ere na Onani, loko va ha ri etikweni ra Kanana.

²⁰ Mindyangu ya vana va Yuda lavan'wana hi leyi: Wa ka Xela, ni wa ka Perese, ni wa ka Zera.

²¹ Mindyangu ya vana va Perese hi leyi: Wa ka Hesironi, ni wa ka Hamula.

²² Hi yona mindyangu ya va ka Yuda; ntsengo wa vona a wu ri 76 500.

²³ Mindyangu ya vana va Isakara hi leyi: Wa ka Tola, ni wa ka Puvha,

²⁴ ni wa ka Yaxubu, ni wa ka Ximroni.

²⁵ Hi yona mindyangu ya va ka Isakara; ntsengo wa vona a wu ri 64 300.

²⁶ Mindyangu ya vana va Zebuloni hi leyi: Wa ka Seredi, ni wa ka Elone, ni wa ka Yahaliele.

²⁷ Hi yona mindyangu ya va ka Zebuloni; ntsengo wa vona a wu ri 60 500.

²⁸ Mindyangu ya vana va Yosefa hi leyi: Wa ka Manase ni wa ka Efrayimi.

²⁹ Mindyangu ya va ka Manase hi leyi: Wa ka Makiri, ni wa ka Giliyadi n'wana Makiri.

³⁰ Mindyangu ya vana va Giliyadi hi leyi: Wa ka Iyezere, ni wa ka Heleke,

³¹ ni wa ka Asiriele, ni wa ka Xikeme,

³² ni wa ka Xemida, ni wa ka Hefere.

³³ Selofihada n'wana Hefere a a nga ri na vana va xinuna, kambe a a ri ni va xisati ntsena, mavito ya vona ma nga lawa: Mahela, na Nowa, na Hogila, na Milika, na Tirisa.

³⁴ Hi yona mindyangu ya va ka Manase; ntsengo wa vona a wu ri 52 700.

³⁵ Mindyangu ya vana va Efrayimi hi leyi: Wa ka Xutela, ni wa ka Bekere, ni wa ka Tahani.

³⁶ Eka Xutela a ku ri ni ndyangu wa n'wana wa yena Erani.

³⁷ Hi yona mindyangu ya va ka Efrayimi; ntsengo wa vona a wu ri 32 500. Lava hi vona vana va Yosefa ni vatukulu va yena.

³⁸ Mindyangu ya vana va Benjamini hi leyi: Wa ka Bela, ni wa ka Axibele, ni wa ka Ahirama,

³⁹ ni wa ka Xefufama, ni wa ka Hufamu.

⁴⁰ Bela a a ri ni vana vambirhi, Aridi na Naamani, lava a va ri ni mindyangu ya vona.

⁴¹ Hi yona mindyangu ya va ka Benjamini; ntsengo wa vona a wu ri 45 600.

⁴² Eka Dani a ku ri ni ndyangu wa n'wana wa yena Xuhamu.

⁴³ Ntsengo wa va ka Xuhamu hinkwavo a wu ri 64 400.

⁴⁴ Mindyangu ya vana va Asere hi leyi: Wa ka Imina, ni wa ka Ixivha, ni wa ka Beriya.

⁴⁵ Mindyangu ya vana va Beriya hi leyi: Wa ka Hebere, ni wa ka Malikiele.

⁴⁶ Vito ra n'wana wa Asere wa xisati a va ku i Sera.

⁴⁷ Hi yona mindyangu ya va ka Asere; ntsengo wa vona a wu ri 53 400.

⁴⁸ Mindyangu ya vana va Neftali hi leyi: Wa ka Yahasele, ni wa ka Guni,

⁴⁹ ni wa ka Yesere, ni wa ka Xileme.

⁵⁰ Hi yona mindyangu ya va ka Neftali; ntsengo wa vona a wu ri 45 400.

⁵¹ Ntsengo wa Vaisraele hinkwavo lava hlayiweke a wu ri 601 730.

Maavanyisele ya tiko ra Kanana

⁵² HOSI Xikwembu xi ku ka Muxe:

⁵³ “Vanhu lava va ta averiwa tiko leri ri nga ta va ndzhaka ya vona hi ku landza ntsengo wa mavito ya vona.

⁵⁴ Nyimba leyi nga ni vanhu vo tala, u ta yi nyika xiphemu lexikulu ku va ndzhaka ya yona, kasi nyimba leyi nga ni vanhu vatsongo u ta yi nyika xiphemu xitsongo. Nyimba yin'wana ni yin'wana yi ta kuma ndzhaka ya yona hi ku landza ntsengo wa vanhu va yona.

⁵⁵ Loko va averiwa tiko, ku ta tirhisiwa vuhlolotwana; va ta nyikiwa ndzhaka ya vona hi ku landza tinyimba ta ka vona.

⁵⁶ Ndzhaka leyi ya vona va ta averiwa yona hi vuhlolotwana, hi ku landza vukulu bya tinyimba.”

Ta Valevhi loko va hlayiwa ra vumbirhi

⁵⁷ Mindyangu ya va ka Levhi hi leyi: Wa ka Gerixoni, ni wa ka Kohata, ni wa ka Merari.

⁵⁸ Mindyangu yin'wana ya va ka Levhi hi leyi: Wa ka Libini, ni wa ka Hebroni, ni wa ka Maheli, ni wa ka Muxi, ni wa ka Kora. Kohata i tata wa Amirama.

⁵⁹ Vito ra nsati wa Amirama a va ku i Yokebedi, N'wa-Levhi, loyi a velekiweke le Egipta. Amirama na Yokebedi hi vona vatswari va Aroni na Muxe na makwavo wa vona Meriyamu.

⁶⁰ Aroni ú velekile Nadabu na Abihu na Eliyazara na Itamara.

⁶¹ Kambe Nadabu na Abihu va file endzhaku ka loko va humeserile HOSI Xikwembu gandzelo hi ndzilo lowu nga riki wona.

⁶² Ntsengo wa Valevhi wu kumeke wu ri 23 000, loko ku hlayiwa va xinuna va n'hweti yin'we ni ku tlula; ntsengo wa vona a wu katsiwanga ni wa Vaisraele lavan'wana, hikuva a va averiwanga leswi nga ta va ndzhaka ya vona.

⁶³ Lava hi vona Vaisraele lava nga hlayiwa hi Muxe na muprista Eliyazara erivaleni ra tiko ra Mowabu, kusuhi ni nambu wa Yordani, ku langutana ni muti wa Yeriko.

⁶⁴ Exikarhi ka vona a ku vanga ni munhu ni un'we loyi a a ri kona loko Muxe na muprista Aroni va hlaya Vaisraele emananga ya Sinayi,

⁶⁵ hikuva HOSI Xikwembu a xi vurile leswaku hinkwavo ka vona va ta fela emananga. Kutani a ku ponanga ni un'we wa vona, ehandle ka Kalebe n'wana Yefune, na Yoxuwa n'wana Nuni ntsena.