Tinhlayo 21 - BIBELE Mahungu Lamanene

Ta Vaisraele loko va hlula Vakanana

¹ Mukanana un'wana loyi a a ri HOSI ya le Aradi, a a tshama edzongeni ra tiko ra Kanana. Loko a twa leswaku Vaisraele va karhi va ta hi ndlela ya Atarimi, a hloma matlhari ni vanhu va yena, va ya lwa ni Vaisraele, va khoma van'wana va vona, va famba na vona.

² Hiloko Vaisraele va tiboha hi ku hlambanya emahlweni ka HOSI Xikwembu, va ku: “Loko u nga nyiketa vanhu lava emavokweni ya hina, miti ya vona hi ta yi herisela makumu.”

³ HOSI Xikwembu xi yingisa xikombelo xa Vaisraele, kutani xi nyiketa Vakanana emavokweni ya vona; hiloko va va herisela makumu, vona ni miti ya vona; kutani ndhawu leyi yi thyiwa vito ra Horma (hileswaku “la heriseriweke makumu”).

Ta nyoka ya koporo

⁴ Loko Vaisraele va suka entshaveni ya Hori, va kongoma tlhelo ra Lwandle-ro-Tshwuka, leswaku va ta ka va nga hundzi hi le tikweni ra Edomu. Loko va ri endleleni, va sungula ku hela timbilu.

⁵ Kutani va vulavula va sandza HOSI Xikwembu na Muxe, va ku: “Xana mi hi humesele yini etikweni ra Egipta leswaku hi ta fela laha mananga, laha ku nga hava swakudya, hambi ma ri mati manene xana? Hi karhele hi swakudyanyana leswi swo nyenyetsa!”

⁶ Kutani HOSI Xikwembu xi rhumela Vaisraele tinyoka ta vuxungu, ti va lumetela, lavo tala va vona va fa.

⁷ Hiloko Vaisraele va tsutsumela eka Muxe, va fika va ku ka yena: “Hi dyohile, hikuva hi sandzile HOSI Xikwembu, hi tlhela hi sandza na wena; sweswi hi kombela leswaku u hi khongelela eka HOSI Xikwembu leswaku xi hi susela tinyoka leti.” Kutani Muxe a va khongelela.

⁸ Kutani HOSI Xikwembu xi ku ka Muxe: “Vumba xifaniso xa nyoka leyi nga ni vuxungu, u xi hayeka emhandzeni; un'wana ni un'wana loyi a nga ta lumiwa hi nyoka kutani a languta leyi u yi vumbeke, ú ta hanya.”

⁹ Muxe a vumba nyoka hi koporo, kutani a yi hayeka emhandzeni. Loko munhu un'wana a tshuka a lumiwile hi nyoka, a a languta leyi ya koporo, kutani a hanya.

Ta Vaisraele loko va ri erivaleni ra tiko ra Mowabu

¹⁰ Vaisraele va suka va famba, va ya gova le Oboto.

¹¹ Va suka le Oboto, va ya gova emarhumbini ya le Abarimi, emananga lama langutaneke ni tiko ra Mowabu hi tlhelo ra le vuxeni.

¹² Va suka kona, va ya gova exinkobyaneni xa Zarede.

¹³ Va suka kona, va khupuka va ya gova entsungeni wa nambu wa Arinoni, emananga lama sukelaka endzilekaneni wa tiko ra Vaamori (nambu wa Arinoni hi wona ndzilekana exikarhi ka tiko ra Vamowabu ni tiko ra Vaamori).

¹⁴ Hikwalaho ka swona, eka Buku ya Tinyimpi ta HOSI Xikwembu, ku vulavuriwa hi “... muti wa Vhahebe lowu nge tikweni ra Sufa ni swinkobyana swa wona, ni nambu wa Arinoni,

¹⁵ ni maganga ya swikobyana swa wona, leswi rhelelaka swi ya fika le Ara, swi kongoma endzilekaneni wa tiko ra Mowabu.”

¹⁶ Loko va suka kwalaho, va yile va ya fika eBere (hileswaku “exihlobyeni”), laha HOSI Xikwembu xi nga lerisa Muxe xi ku: “Hlengeleta Vaisraele leswaku ndzi ta va nyika mati.”

¹⁷ Kutani Vaisraele va yimbelela risimu leri nge: “We xihlovo, hi humesele mati! Xi phateni n'wina vanhu,

¹⁸ xihlovo xo ceriwa hi tihosi, lexi handziweke hi tinganakana, hi tinhonga ta tona ta vuhosi ni mixongotelo ya tona!” Kutani loko va suka emananga, va fambile va ya fika eMatana.

¹⁹ Va sukile kona va ya fika eNahaliele, va hundzela emahlweni va ya fika eBamoto.

²⁰ Loko va suka eBamoto, va yile va ya fika enkoveni lowu nga tlhelo ra tiko ra Mowabu, ehansi ka nhlohlorhi ya Pisga, ntshava leyi langutaneke ni mananga.

Ta Vaisraele loko va hlula Sihoni

²¹ Kutani Vaisraele va rhuma vanhu eka Sihoni hosi ya Vaamori, va fika va ku ka yona:

²² “Hi pfumelele ku tsemakanya hi kwala tikweni ra wena; loko ku ri emasin'wini ni le mitangeni, a hi nga ngheni; hambi ma ri mati manene exihlobyeni, a hi nga nwi; hi ta famba ntsena hi gondzo lerikulu ku kondza hi huma etikweni ra wena.”

²³ Kambe Sihoni a nga pfumelanga leswaku Vaisraele va tsemakanya hi le tikweni ra yena. A hlengeleta vavanuna hinkwavo, kutani va huma va ya tlherisa Vaisraele emananga, va ya va kuma emutini wa Yahasi, va lwa na vona kona.

²⁴ Kutani Vaisraele va dlaya Sihoni ni vanhu va yena, va va tekela tiko ra vona, ku suka eArinoni ku ya fika enambyeni wa Yaboko, endzilekaneni wa tiko ra Vaamori. Ndzilekana wa kona a wu ri ni makhokholo.

²⁵ Kutani Vaisraele va phangha miti ya Vaamori hinkwayo, va titshamela eka yona; va phangha ni muti wa Hexiboni ni swimitana leswi nga kusuhi na wona.

²⁶ Hexiboni a wu ri ntsindza wa Sihoni hosi ya Vaamori. Sihoni hi yena loyi a nga hlasela hosi leyi a yi fuma Vamowabu, kutani a yi hlula, a yi tekela tiko ra yona, ku ya fika enambyeni wa Arinoni.

²⁷ Hikwalaho ka swona, vaphati va swiphato va ri: “Tanani emutini wa Hexiboni, hi wu aka hi vuntshwa; a hi pfuxeni muti lowu a wu ri wa hosi Sihoni!

²⁸ “Mavuthu ma humile eHexiboni ku kotisa ndzilo, ma humile emutini wa Sihoni ku fana ni malangavi, ma ya herisa muti wa Ara etikweni ra Mowabu, ni tihosi ta le magangeni ya Arinoni.

²⁹ N'wina Vamowabu mi le khombyeni, Kemoxi xikwembu xa n'wina xi mi tshikile mi lova; vana va n'wina va xinuna xi va tshikile va tsutsuma, ni vana va n'wina va xisati xi va tshikile va khomiwa hi Sihoni hosi ya Vaamori.

³⁰ “Hi va tlhavile hi miseve, hi va dlayeterile ku suka eHexiboni ku ya fika eDiboni; kutani hi herisile hinkwaswo, ndzilo wa kona wu ya fika eMedeba.”

Ta ku hluriwa ka Ogo

³¹ Kutani Vaisraele va fika va tshama etikweni ra Vaamori.

³² Muxe a rhuma tinhlori ti ya valanga muti wa Yazere; va wu teka swin'we ni swimitana leswi nga kusuhi na wona, va tlhela va hlongola Vaamori lava a va tshama kona.

³³ Kutani Vaisraele va suka kona, va tlhandluka hi ndlela leyi kongomaka eBaxani; hiloko Ogo hosi ya le Baxani ni mavuthu ya yena hinkwawo, va huma ku ya lwa ni Vaisraele le Edreyi.

³⁴ Kambe HOSI Xikwembu xi ku ka Muxe: “Mi nga n'wi chavi, hikuva mina HOSI ndzi n'wi nyiketile emavokweni ya n'wina, yena ni vanhu va yena hinkwavo, ni tiko ra yena. Mi ta n'wi endla leswi mi endleke Sihoni hosi ya Vaamori, loyi a a tshama eHexiboni.”

³⁵ Kutani va n'wi dlaya ni vana va yena ni vanhu va tiko ra yena hinkwavo, ku nga sali ni un'we wa mhamba; kutani va teka tiko ra yena.