Tinhlayo 19 - BIBELE Mahungu Lamanene

Ta nkuma wa thokazi ro tshwuka

¹ Kutani HOSI Xikwembu xi ku ka Muxe na Aroni:

² “Nawu hi lowu, wu humesiwa hi mina HOSI. Byelani Vaisraele va mi tisela thokazi leri tengeke, ri tlhela ri va leri nga solekiki, naswona leri nga si tshamaka ri paniwa.

³ Thokazi leri, mi ta ri yisela muprista Eliyazara, kutani ri ta humeseriwa ehandle ka mixaxa, ri ya tlhaveriwa kona, muprista Eliyazara a ri karhi a swi vona.

⁴ Muprista Eliyazara ú ta peta ritiho ra yena engatini ya thokazi ka 7, a ri karhi a yi n'watseka a yi kongomisa etlhelweni ra nyangwa ya Ntsonga lowo Hlawuleka.

⁵ Kutani thokazi ri ta hisiwa emahlweni ka Eliyazara: Dzovo, ni nyama, ni ngati, ni swanyi, swi ta hisiwa hinkwaswo.

⁶ Muprista ú ta teka tihunyi ta murhi wa kedari ni rhavi ra ximudyana xa hisopa ni ngoti ya muhlovo wo tshwuka, a swi hoxa endzilweni lowu hisaka thokazi.

⁷ Kutani muprista ú ta hlantswa swiambalo swa yena, a hlamba ni miri, ku ri kona a nga ta tlhelela emixaxeni; kambe siku rero ú ta va a nga tenganga ku kondza dyambu ri pela.

⁸ Loyi a hisaka thokazi, na yena ú ta hlantswa swiambalo swa yena, a hlamba ni miri; siku rero ú ta va a nga tenganga, dyambu ri kondza ri pela.

⁹ Kutani wanuna loyi a tengeke ú ta olela nkuma wa thokazi, a ya wu fumba kusuhi ni mixaxa, endhawini leyi baseke. Nkuma lowu wu ta hlayisiwa leswaku ntshungu wa Vaisraele wu ta wu tirhisa eka mati yo basisa leswi nyameke, hikuva thokazi leri i mhamba yo susa swidyoho.

¹⁰ Munhu loyi a olelaka nkuma na yena ú ta hlantswa swiambalo swa yena; siku rero ú ta va a nga tenganga, dyambu ri kondza ri pela. Nawu lowu wu ta boha Vaisraele hilaha ku nga heriki, wu boha ni vanhu lava luveleke exikarhi ka vona.

Ta lava tinyamiseke hi ku khumba mintsumbu

¹¹ “Un'wana ni un'wana loyi a khumbeke munhu wo fa, ú ta va a nga tenganga ku ringana masiku ya 7.

¹² Kutani eka siku ra vunharhu, ú ta hlamba miri, a tlhela a hlamba hi siku ra vu-7, ku va kona a nga ta va a tengile; loko a nga endli sweswo, ú ta tshama a nga tenganga.

¹³ Un'wana ni un'wana loyi a khumbaka munhu la feke, kutani a nga tibasisi, ú nyamisa Ntsonga wa mina HOSI; munhu wo tano, ú fanele ku hlongoriwa a suka erixakeni ra Israele. Munhu wa kona ú ta tshama a nga tenganga, hikuva ú ta va a nga xuviwanga hi mati yo basisa leswi nyameke.

¹⁴ “Loko munhu a fela entsongeni, nawu wa kona hi lowu: Un'wana ni un'wana loyi a nga ta nghena entsongeni wolowo, kumbe loyi a a ri kona loko swi humelela, ú ta va a nga tenganga, ku ringana masiku ya 7.

¹⁵ Swibya hinkwaswo leswi nga ta va swi nga funengetiwanga swinene, swi ta va swi nga tenganga na swona.

¹⁶ Loko munhu a famba-famba ehandle, kutani a tshuka a khumbile ntsumbu wa munhu un'wana loyi a nga dlayiwa hi fumu kumbe loyi a nga lo tifela, ni loko a khumbile hambi ri ri rhambu ra munhu kumbe sirha, munhu yoloyi ú ta va a nga tenganga, ku ringana masiku ya 7.

¹⁷ Ku basisa leswi nga tengangiki, va ta teka nkuma wa thokazi ra mhamba yo susa swidyoho, va wu chela exibyeni, va chela ni mati ya nambu.

¹⁸ Kutani munhu loyi a tengeke ú ta lava rhavi ra ximudyana xa hisopa, a ri peta ematini lawa, a xuva ntsonga ni swingolongondzwana, a xuva ni vanhu lava a va ri kwala ndzeni ka ntsonga. Loko munhu a khumbile rhambu ra munhu wo fa, kumbe ntsumbu wa loyi a dlayiweke kumbe loyi a ngo lo tifela, ni loko a khumbile sirha, na yena ú ta xuviwa hi ndlela yoleyo.

¹⁹ Hi siku ra vunharhu, munhu loyi a tengeke ú ta xuva swilo leswi nga tengangiki, a tlhela a swi xuva hi siku ra vu-7; naswona, hi siku roleri ra vu-7 loko a hetile ku swi basisa, na yena ú ta tibasisa hi ku hlantswa swiambalo swa yena, a hlamba ni miri; kutani hi madyambu ya siku rero ú ta va a tengile.

²⁰ “Munhu loyi a nga tengangiki, loko a nga tibasisi, ú ta hlongoriwa a suka exikarhi ka ntshungu wa Vaisraele, hikuva ú ta nyamisa xivandla xa mina lexo hlawuleka. Munhu wo tano ú ta va a nga tenganga, hikuva a nga xuviwanga hi mati yo basisa leswi nyameke.

²¹ Vaisraele va ta boheka ku landza nawu lowu, hilaha ku nga heriki. Munhu loyi a xuvaka hi mati yo basisa leswi nyameke, ú fanele ku hlantswa swiambalo swa yena; naswona munhu loyi a khumbaka mati lawa yo basisa leswi nyameke, ú ta va a nga tenganga, dyambu ri kondza ri pela.

²² Xin'wana ni xin'wana lexi khumbiwaka hi munhu loyi a nga tengangiki, na xona xi ta va xi nga tenganga; naswona un'wana ni un'wana la nga ta khumba xilo xexo, na yena ú ta va a nga tenganga, dyambu ri kondza ri pela.”