Tinhlayo 15 - BIBELE Mahungu Lamanene

Milawu hi tlhelo ra magandzelo

¹ HOSI Xikwembu xi ku ka Muxe

² “Byela Vaisraele leswaku ndzi ri: Loko mi fika etikweni leri mi yaka mi ya tshama eka rona, leri ndzi mi nyikaka rona,

³ kutani mi lava ku ndzi humesela magandzelo, hi tihomu kumbe tinyimpfu ni timbuti, mi ta endlisa leswi: Gandzelo leri hisiwaka kumbe leri dyiwaka leri munhu a tiboheke hi ku hlambanya leswaku ú ta ri humesa, kumbe leri a ngo ri humesa hi ku titwa, kumbe leri humesiwaka eminkhubyeni ya lembe, ri fanele ku va leri ku nun'hwela ka rona ku nga ta ndzi tsakisa mina HOSI.

⁴ Munhu loyi a ndzi humeselaka gandzelo ra kona, ú ta ri humesa ni xintewana xin'we xa mapa lamanene lama pfanganyisiweke ni xikhudza xin'we xa mafurha.

⁵ Loko a tlhava xinyimpfana, a humesa gandzelo leri hisiwaka kumbe leri dyiwaka, ú ta chela ni jomela rin'we ra vhinyo ya magandzelo.

⁶ Loko ku tlhaviwa khuna, mi fanele ku va ni swintewana swimbirhi swa mapa lamanene lama pfanganyisiweke ni xikhudza xin'we na hafu xa mafurha.

⁷ Kasi vhinyo ya gandzelo leri yi ta va jomela ni hafu, kutani ku nun'hwela ka gandzelo ra kona ku ta ndzi tsakisa mina HOSI.

⁸ Loko mi tlhava nkuzi mi humesa gandzelo leri hisiwaka kumbe leri dyiwaka, leri mi nga tiboha hi ku hlambanya leswaku mi ta ri humesa, kumbe loko mi ndzi humesela gandzelo ra xinakulobye mina HOSI,

⁹ munhu loyi a humesaka gandzelo ra kona, ú ta ri humesa ni xitshatshana xin'we xa mapa lamanene lama pfanganyisiweke ni xinghotsana xin'we xa mafurha.

¹⁰ Ú ta tlhela a chela ni xikhuwana xin'we xa vhinyo; kutani ku nun'hwela ka gandzelo ra kona ku ta ndzi tsakisa mina HOSI.

¹¹ “Hi swona leswi swi nga ta humesiwa loko ku tlhaviwa nkuzi, kumbe khuna, kumbe swinyimpfana swa xinuna kumbe swimbutana swa xinuna.

¹² Mimpimo leyi va nga ta tirhisa yona yi fanele ku fambelana ni ntsengo wa swifuwo leswi va nga ta tlhava swona.

¹³ Vanhu hinkwavo va rixaka ra Israele va fanele ku landza maendlele lawa loko va lava ku ndzi hisela gandzelo leri ku nun'hwela ka rona ku nga ta ndzi tsakisa mina HOSI.

¹⁴ Loko ku ri ni munhu wa le handle loyi a luveleke exikarhi ka n'wina kumbe loyi a tshameke na n'wina nkarhi wo leha swinene, kutani a lava ku hisa gandzelo leri ku nun'hwela ka rona ku nga ta ndzi tsakisa mina HOSI, ú fanele ku endlisa leswi n'wina mi endlisaka swona.

¹⁵ Eka n'wina ni ka loyi a luveleke erixakeni ra n'wina, ku ta tirha nawu wun'we hilaha ku nga heriki, lowu nga ta boha ni hinkwavo lava nga ta velekiwa. Emahlweni ka mina, n'wina ni valuveri ma fana.

¹⁶ Eka n'wina ni le ka vanhu va le handle lava luveleke exikarhi ka n'wina, ku ta tirha nawu wun'we ni xiboho xin'we.”

¹⁷ Kutani HOSI Xikwembu xi ku ka Muxe:

¹⁸ “Byela Vaisraele leswaku ndzi ri: Loko mi ta va mi fikile etikweni leri ndzi mi yisaka eka rona,

¹⁹ mi fanele ku ndzi humesela nyiko mina HOSI, loko mi luma nguva.

²⁰ Eka swakudya leswi mi nga ta sungula hi swona ku kandza, mi ta ndzi humesela ximbhundzwa xin'we; ximbhundzwa lexi, mi ta ndzi humesela xona ku fana ni loko mi ndzi humesela leswi mi swi huleke exivuyeni.

²¹ Mi ta ndzi humesela leswi mi sunguleke ha swona ku kandza, n'wina ni vatukulu va n'wina hilaha ku nga heriki.

²² “Kambe swi nga endleka leswaku mi tshuka mi dyoha hi ku siya swin'wana leswi mina HOSI ndzi swi leriseke Muxe,

²³ swi nga swileriso leswi ndzi mi byeleke swona hi nomo wa yena, ku sukela siku leri ndzi vekeke milawu leyi yi mi bohaka, n'wina ni vatukulu va n'wina hinkwavo.

²⁴ Loko mi tshuka mi endla xihoxo kambe mi nga swi vonanga leswaku mi le ku endleni ka xihoxo, ntshungu hinkwawo wu ta humesa xinkuzana xa gandzelo leri hisiwaka; ku nun'hwela ka rona ku ta ndzi tsakisa mina HOSI, loko ri va ni mapa ni swakunwa swa rona, hi nawu wa kona; mi fanele ku humesa ni xiphongho xa mhamba yo susa swidyoho.

²⁵ Muprista ú ta mi basisa hinkwenu, kutani mi ta rivaleriwa, hikuva a mi endlanga ha vomu, naswona mi ta va mi ndzi humeserile gandzelo leri hisiwaka ni mhamba yo susa swidyoho.

²⁶ N'wina hinkwenu ni vanhu va le handle lava luveleke exikarhi ka n'wina mi ta rivaleriwa; hinkwenu mi ta va mi endlile xihoxo xexo.

²⁷ “Loko munhu a endlile xihoxo ku nga ri ha vomu, ú fanele ku humesa ximbutana xa thokazi xa lembe rin'we, xi va xa mhamba yo susa swidyoho.

²⁸ Muprista ú ta basisa munhu loyi emahlweni ka mina HOSI, kutani ú ta rivaleriwa hikuva ú ta va a nga hoxanga ha vomu.

²⁹ Eka munhu un'wana ni un'wana loyi a tshukaka a endlile xihoxo, kambe ku nga ri ha vomu, va ta tirhisa nawu wun'we, hambi i munhu wa rixaka ra Israele, kumbe wa le handle loyi a luveleke erixakeni ra Israele.

³⁰ Kambe munhu un'wana ni un'wana wa rixaka ra Israele kumbe loyi a luveleke, loyi a ndzi dyohelaka ha vomu, ú fanele ku hlongoriwa a famba, hikuva ú ndzi rhuketerile mina HOSI.

³¹ Munhu wo tano ú fanele ku hlongoriwa a nyamalala, hikuva ú ta va a sandzile leswi ndzi swi vuleke mina HOSI, a tlhela a tlula ni nawu wa mina; kutani ú ta va a dlawela nandzu wa yena.”

Ta munhu loyi a tluleke nawu wa Savata

³² Siku rin'wana, loko Vaisraele va ha ri emananga, munhu un'wana a kumiwa a ri karhi a rhotela swihlahlana hi siku ra Savata.

³³ Kutani vanhu lava va n'wi kumeke a ri karhi a rhotela swihlahlana, va n'wi yisa eka Muxe na Aroni, emahlweni ka ntshungu hinkwawo.

³⁴ Kutani va veka munhu loyi leswaku a rindziwa, hikuva a va nga si byeriwa hi ku hetiseka leswi a a fanela ku endliwa swona.

³⁵ Hiloko HOSI Xikwembu xi ta ku ka Muxe: “Munhu yoloye ú fanele ku dlayiwa; ntshungu hinkwawo a wu ye wu ya n'wi khandla hi maribye ehandle ka mixaxa.”

³⁶ Kutani ntshungu hinkwawo wu humesela munhu loyi ehandle ka mixaxa, wu ya n'wi khandla hi maribye a fa, hilaha HOSI Xikwembu xi leriseke Muxe hakona.

Milawu hi tlhelo ra makhaxa eswiambalweni

³⁷ HOSI Xikwembu xi ku ka Muxe:

³⁸ “Vulavula ni Vaisraele, u va byela leswaku mina ndzi ri: ‘Mi hamba mi endla makhaxa, mi ma bohelela hi ngoti ya muhlovo wa rihlaza ra tilo etinhleni ta swiambalo swa n'wina.

³⁹ Makhaxa lawa ma ta va xitsundzuxo eka n'wina; loko mi ma vona, mi ta tsundzuka leswaku mi fanele ku landza milawu hinkwayo ya mina HOSI, mi tshika leswi timbilu ta n'wina ti mi byelaka swona ni leswi kokaka mahlo ya n'wina, ma nga manyala lawa mi toloveleke ku ma endla.

⁴⁰ Hi ndlela leyi, mi ta tsundzuka milawu ya mina hinkwayo, mi tlhela mi yi landza, kutani mi ta va mi hlawulekile eka mina Xikwembu xa n'wina.

⁴¹ Hi mina HOSI Xikwembu xa n'wina lexi xi mi humeseke etikweni ra Egipta, leswaku ndzi ta va Xikwembu xa n'wina: Hi mina HOSI Xikwembu xa n'wina.’ ”