Tinhlayo 10 - BIBELE Mahungu Lamanene

Ta timhalamhala ta silivhere

¹ HOSI Xikwembu xi ku ka Muxe:

² “Endla timhalamhala timbirhi hi silivhere leyi furiweke, leti nga ta tirhisiwa ku vitana nhlengeletano, ni ku tivisa loko mixaxa yi fanele ku suka.

³ Loko timhalamhala leti ti biwa hatimbirhi ka tona, ntshungu hinkwawo wu ta hlangana na wena enyangweni ya Ntsonga lowo Hlawuleka.

⁴ Kambe loko ku biwa yin'we, ku ta ta ntsena varhangeri, vona lava nga tinhloko ta tinyimba ta Vaisraele, va ta hlangana na wena.

⁵ Kasi loko mhalamhala yi mbvungunya kunene, vanhu va mixaxa leyi nga etlhelo ra le vuxeni va ta suka.

⁶ Kutani loko yi mbvungunya ra vumbirhi, vanhu va mixaxa leyi nga etlhelo ra le dzongeni va ta suka. Minkarhi hinkwayo, loko mixaxa yi fanele ku suka, mhalamhala yi ta mbvungunyisiwa.

⁷ Loko ntshungu wu fanele ku hlengeletana endhawini yin'we, mi ta ba mhalamhala, kambe mi nga yi mbvungunyisi.

⁸ Vana va Aroni, va nga vaprista, hi vona lava nga ta ba timhalamhala. “Nawu wa mi boha ku va ni timhalamhala, n'wina ni vatukulu va n'wina hilaha ku nga heriki.

⁹ Loko mi tshuka mi hloma matlhari ku ya lwa ni valala va n'wina lava va mi pfukaka etikweni ra n'wina, mi fanele ku mbvungunyisa timhalamhala, leswaku mina HOSI Xikwembu xa n'wina ndzi ta mi anakanya, ndzi mi lamulela emavokweni ya valala va n'wina.

¹⁰ Timhalamhala leti, mi ta ti ba ni le masikwini lawa mi tsakeke, ni le minkhubyeni ya n'wina ya lembe, ni le ku sunguleni ka tin'hweti, mi ti ba mi ri karhi mi humesa magandzelo lama hisiwaka ni magandzelo ya xinakulobye; timhalamhala leti hi tona leti nga ta endla leswaku mina Xikwembu ndzi mi anakanya. Hi mina HOSI Xikwembu xa n'wina.”

Ta ku suka ka Vaisraele emananga ya Sinayi

¹¹ Eka lembe ra vumbirhi, hi siku ra vu-20 ra n'hweti ya vumbirhi, papa ri suka ehenhla ka Ntsonga lowu nga ni Areka ya Ntwanano.

¹² Kutani na vona Vaisraele va suka emananga ya Sinayi, va famba mimpfhuka leyi va pimeriweke ku famba yona hi siku. Papa ri yile ri ya yima emananga ya Parani.

¹³ Loko Vaisraele va suka eSinayi, a ku ri kona va sungulaka ku suka ni ku landza leswi HOSI Xikwembu xi swi leriseke hi nomo wa Muxe.

¹⁴ Va mixaxa ya vandla leri vuriwaka “ra ka Yuda”, hi vona va nga rhanga ku suka, hi ku ya hi mavuthu ya vona. Murhangeri wa mavuthu ya va ka Yuda a a ri Nahaxoni n'wana Aminadaba;

¹⁵ murhangeri wa mavuthu ya va ka Isakara a a ri Netanele n'wana Suwara,

¹⁶ kasi murhangeri wa mavuthu ya va ka Zebuloni a a ri Eliyabu n'wana Heloni.

¹⁷ Loko Ntsonga wu simuriwile, va ka Gerixoni ni va ka Merari, va nga vona varhwari va wona, va suka na wona va famba.

¹⁸ Va mixaxa ya vandla leri vuriwaka “ra ka Rhuveni”, va suka hi ku ya hi mavuthu ya vona. Murhangeri wa mavuthu ya va ka Rhuveni a a ri Elizuri n'wana Xedewuru;

¹⁹ murhangeri wa mavuthu ya va ka Simiyoni a a ri Xelumiele n'wana Suri-Xadayi,

²⁰ kasi murhangeri wa mavuthu ya va ka Gadi a a ri Eliyasafa n'wana Duwele.

²¹ Kutani va ka Kohata va suka va rhwele swilo leswo hlawuleka; loko va fika emixaxeni, va kuma Ntsonga wu dzimiwile.

²² Va mixaxa ya vandla leri vuriwaka “ra ka Efrayimi”, na vona va suka hi ku ya hi mavuthu ya vona. Murhangeri wa mavuthu ya va ka Efrayimi a a ri Elixama n'wana Amihudi;

²³ murhangeri wa mavuthu ya va ka Manase a a ri Gamaliele n'wana Pedasuru,

²⁴ kasi murhangeri wa mavuthu ya va ka Benjamini a a ri Abidana n'wana Gidiyoni.

²⁵ Kutani ku suka va mixaxa ya vandla leri vuriwaka “ra ka Dani”, va nga vona vaseleteri va minkondzo, va suka hi ku ya hi mavuthu ya vona. Murhangeri wa mavuthu ya va ka Dani a a ri Ahiezere n'wana Amixadayi;

²⁶ murhangeri wa mavuthu ya va ka Asere a a ri Pagiele n'wana Okirani,

²⁷ kasi murhangeri wa mavuthu ya va ka Neftali a a ri Ahira n'wana Enana.

²⁸ Leyi hi yona ndlela leyi Vaisraele a va fanele ku suka ha yona, hi ku ya hi mavuthu ya vona.

²⁹ Kutani Muxe a byela Hobabu n'wana wa mukon'wana wa yena Rhuwele wa le Midiyani, a ku: “Hi ya endhawini leyi HOSI Xikwembu xi nga tshembisa ku hi nyika yona; tana hi famba swin'we, hi ta ya ku endlela leswinene, hikuva HOSI Xikwembu xi tshembisile Vaisraele ku va endlela leswinene.”

³⁰ Kambe Hobabu a hlamula a ku: “A ndzi nga fambi na n'wina; ndzi ta ya etikweni ra rikwerhu laha va ka hina va nga kona.”

³¹ Kutani Muxe a ku: “Ndzi kombela leswaku u nga tshuki u famba u hi siya hi ri hexe, hikuva wena u tiva tindhawu ta le mananga, kutani u ta hi pfuna hi ku languta lomu hi nga ta dzima mixaxa kona.

³² Loko wo famba na hina, hinkwaswo leswinene leswi HOSI Xikwembu xi nga ta hi nyika swona, hi ta avelana na wena.”

³³ Ku suka entshaveni ya HOSI Xikwembu, Vaisraele va famba riendzo ra masiku manharhu, Areka ya Ntwanano yi rhangile emahlweni ka vona eriendzweni leri ra masiku manharhu, yi va lavela laha va nga ta fika va wisa kona.

³⁴ Loko va suka emixaxeni, papa ra HOSI Xikwembu a ri va ehenhla ka vona nhlekanhi hinkwawo.

³⁵ Minkarhi hinkwayo loko Areka yi suka, Muxe a a ku: “We HOSI, pfuka u hangalasa valala va wena, u hlongorisa ni lava va ku vengaka!”

³⁶ Kutani loko Areka yi vekiwa ehansi, Muxe a a ku: “We HOSI, vuya exikarhi ka magidigidi ya Vaisraele!”