Tinhlayo 1 - BIBELE Mahungu Lamanene

Ta ku hlayiwa ka Vaisraele emananga ya Sinayi

¹ Hi lembe ra vumbirhi ra loko Vaisraele va humile etikweni ra Egipta, hi siku ro sungula ra n'hweti ya vumbirhi, HOSI Xikwembu xi vulavula na Muxe eka Ntsonga lowo Hlawuleka, emananga ya Sinayi, xi ku:

² “Hlayani ntsengo wa Vaisraele hinkwavo, hi tinyimba ta vona ni mindyangu ya vona, mi tsala mavito ya vavanuna ha rin'we rin'we.

³ Vaisraele hinkwavo lava ringaneke ku hloma matlhari, va malembe ya 20 ni ku tlula, wena na Aroni mi fanele ku va hlaya hi ku ya hi mavuthu ya vona.

⁴ Eka nyimba yin'wana ni yin'wana, ku ta huma wanuna un'we la nga nhloko endyangwini wa yena, a ta mi pfuna.

⁵ Mavito ya vavanuna lava va nga ta mi pfuna hi lawa: “Eka nyimba ya ka Rhuveni i Elizuri n'wana Xedewuru;

⁶ eka nyimba ya ka Simiyoni i Xelumiele n'wana Suri-Xadayi;

⁷ eka nyimba ya ka Yuda i Nahaxoni n'wana Aminadaba;

⁸ eka nyimba ya ka Isakara i Netanele n'wana Sawara;

⁹ eka nyimba ya ka Zebuloni i Eliyabu n'wana Heloni;

¹⁰ eka nyimba ya ka Efrayimi n'wana Yosefa i Elixama n'wana Amihudi; eka nyimba ya ka Manase n'wana Yosefa i Gamaliele n'wana Pedasuru;

¹¹ eka nyimba ya ka Benjamini i Abidana n'wana Gidiyoni;

¹² eka nyimba ya ka Dani i Ahiezere n'wana Amixadayi;

¹³ eka nyimba ya ka Asere i Pagiele n'wana Okirani;

¹⁴ eka nyimba ya ka Gadi i Eliyasafa n'wana Duwele;

¹⁵ eka nyimba ya ka Neftali i Ahira n'wana Enana.”

¹⁶ Lava hi vona lava hlawuriweke exikarhi ka ntshungu, va ri varhangeri va tinyimba ta ka vona ni tinhloko ta mindyangu ya Vaisraele.

¹⁷ Muxe na Aroni va amukela vavanuna lava mavito ya vona ma vuriweke.

¹⁸ Kutani hi siku ro sungula ra n'hweti ya vumbirhi, va hlengeleta Vaisraele hinkwavo, kutani vanhu lava nga ni malembe ya 20 ni ku tlula, va tsarisa mavito ya vona ha un'we-un'we hi ku landza tinyimba ta vona ni mindyangu ya vona,

¹⁹ hilaha HOSI Xikwembu xi leriseke Muxe hakona. Hi ndlela leyi, Muxe a hlaya ntsengo wa Vaisraele, emananga ya Sinayi.

²⁰ A ku ri ni vanhu va ka Rhuveni mativula ya Israele hi nyimba ya vona, ni mindyangu ya vona, ni miti ya vona; loko vavanuna va hlayiwa ha un'we-un'we hi mavito, va ri lava ringaneke ku hloma matlhari, va malembe ya 20 ni ku tlula,

²¹ ntsengo wa vona wu kumeka wu ri 46 500, va ri va nyimba ya ka Rhuveni;

²² naswona a ku ri ni vanhu va ka Simiyoni, hi nyimba ya vona, ni mindyangu ya vona, ni miti ya vona, loko vavanuna lava tsariseke mavito va hlayiwa hi un'we un'we, va ri lava ringaneke ku hloma matlhari, va malembe ya 20 ni ku tlula,

²³ ntsengo wa vona wu kumeka wu ri 59 300, va ri va nyimba ya ka Simiyoni;

²⁴ ni vanhu va ka Gadi, hi nyimba ya vona, ni mindyangu ya vona, ni miti ya vona, loko va hlayiwa hi mavito va ri lava ringaneke ku hloma matlhari, va malembe ya 20 ni ku tlula,

²⁵ ntsengo wa vona wu kumeka wu ri 45 650, va ri va nyimba ya ka Gadi;

²⁶ ni vanhu va ka Yuda, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

²⁷ ntsengo wa vona wu kumeka wu ri 74 600, va ri va nyimba ya ka Yuda;

²⁸ ni vanhu va ka Isakara, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

²⁹ ntsengo wa vona wu kumeka wu ri 54 400, va ri va nyimba ya ka Isakara;

³⁰ ni vanhu va ka Zebuloni, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

³¹ ntsengo wa vona wu kumeka wu ri 57 400, va ri va nyimba ya ka Zebuloni;

³² ni vanhu va ka Efrayimi n'wana Yosefa, hi nyimba ya vona, ni mindyangu ya vona, ni miti ya vona, loko va hlayiwa hi mavito ya vona, va ri lava ringaneke ku hloma matlhari, va malembe ya 20 ni ku tlula,

³³ ntsengo wa vona wu kumeka wu ri 40 500, va ri va nyimba ya ka Efrayimi;

³⁴ ni vanhu va ka Manase, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

³⁵ ntsengo wa vona wu kumeka wu ri 32 200, va ri va nyimba ya ka Manase;

³⁶ ni vanhu va ka Benjamini, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

³⁷ ntsengo wa vona wu kumeka wu ri 35 400, va ri va nyimba ya ka Benjamini;

³⁸ ni vanhu va ka Dani, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

³⁹ ntsengo wa vona wu kumeka wu ri 62 700, va ri va nyimba ya ka Dani;

⁴⁰ ni vanhu va ka Asere, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

⁴¹ ntsengo wa vona wu kumeka wu ri 41 500, va ri va nyimba ya ka Asere;

⁴² ni vanhu va ka Neftali, hi nyimba ya vona, ni mindyangu ya vona, ni miti ya vona, loko va hlayiwa hi mavito, va ri lava ringaneke ku hloma matlhari, va malembe ya 20 ni ku tlula,

⁴³ ntsengo wa vona wu kumeka wu ri 53 400, va ri va nyimba ya ka Neftali.

⁴⁴ Lava hi vona lava hlayiweke hi Muxe na Aroni, va pfuniwa hi varhangeri va Vaisraele, un'wana ni un'wana a yimela nyimba ya ka vona, naswona a ri nhloko endyangwini wa yena.

⁴⁵ Kutani ntsengo wa Vaisraele hinkwavo lava hlayiweke, hi mindyangu ya vona, lava ringaneke ku hloma matlhari, va malembe ya 20 ni ku tlula,

⁴⁶ wu kumeka wu ri 603 550, loko va helerile.

⁴⁷ Kambe vanhu va nyimba ya ka Levhi a va katsiwanga loko ku hlayiwa tinyimba letin'wana,

⁴⁸ hikuva HOSI Xikwembu xi byerile Muxe, xi ku:

⁴⁹ “Lava u nga ta ka u nga va hlayi, i va nyimba ya ka Levhi ntsena; vona u nga tshuki u hlaya ntsengo wa vona u wu katsa ni wa Vaisraele lavan'wana;

⁵⁰ kambe va veke ku va vahlayisi va Ntsonga wa Ntwanano, ni swingolongondzwana swa wona hinkwaswo, ni swilo hinkwaswo leswi nga swa wona. Va ta rhwala Ntsonga ni swingolongondzwana swa wona hinkwaswo, naswona va ta tirha eka wona, va dzima ni mixaxa ya vona yi wu rhendzela.

⁵¹ Loko Ntsonga wu fanele ku simuriwa, Valevhi hi vona va nga ta wu ntlhantlha; loko wu lava ku dzimiwa, hi vona va nga ta wu yimisa. Munhu loyi a nga riki Mulevhi, loko a tshuka a tshinela kusuhi na wona, ú ta dlayiwa.

⁵² Vaisraele lavan'wana va ta gova hi ku ya hi mavuthu ya vona; un'wana ni un'wana ú ta va enxaxeni wa yena, laha ku nga ni vandla ra ka vona.

⁵³ Kambe Valevhi vona va ta gova va rhendzela Ntsonga wa Ntwanano, leswaku vukari bya mina byi nga tshuki byi pfurha ehenhla ka ntshungu wa Vaisraele; naswona Valevhi hi vona va nga ta hlayisa Ntsonga wa Ntwanano.”

⁵⁴ Kutani Vaisraele va endlisa sweswo; va endla hinkwaswo hilaha HOSI Xikwembu xi leriseke Muxe hakona.