Timhaka 4 - BIBELE Mahungu Lamanene

Ta Petro na Yohane loko va tengisiwa ehubyeni

¹ Loko Petro na Yohane va ha vulavula ni vanhu, ku fika vaprista, va ri ni ndhuna ya Tempele ni Vasaduki;

² a va vilela hikuva vaapostola a va dyondzisa vanhu ni ku vula ta ku pfuka ka vafi hikwalaho ka ku pfuka ka Yesu eku feni.

³ Hiloko va va khoma, kutani leswi a ri perile, va va pfalela ekhotsweni ri ko ri xa.

⁴ Hambiswiritano, lavo tala exikarhi ka lava va tweke Rito, va pfumela. Nhlayo ya vavanuna enkarhini wolowo a yi lava ku fika eka 5 000.

⁵ Loko ri xa, tihosi ta Vayuda ni vakulukumba ni vatsari va hlengeletana eYerusalema;

⁶ a va ri na Anasi Muprista lonkulu, na Kayafasi, na Yohane, na Aleksandro, ni hinkwavo va rixaka ra vaprista lavakulu.

⁷ Kuteloko va yimisile vaapostola ehubyeni, va va vutisa va ku: “Mi endlile swilo leswi hi matimba wahi kumbe hi vito ra mani xana, n'wina vanhu ndzin'wina?”

⁸ Kavaloko Petro a tala hi Moya lowo Kwetsima, a ku ka vona: “Tihosi, na n'wina vakulukumba va tiko!

⁹ Leswi hi vutisiwaka namuntlha hi mhaka leyinene leyi endliweke eka munhu lowa xilema loyi, ni ku vutisiwa hi lexi xi nga n'wi hanyisa,

¹⁰ swi tiveni n'wina hinkwenu, ni tiko hinkwaro ra Israele a ri swi tive: Munhu loyi a yimeke emahlweni ka n'wina a ololokile, ú hanyisiwile hi vito ra Yesu Kriste wa Nazareta, yena loyi mi nga n'wi vamba exihambanweni, loyi Xikwembu xi n'wi pfuxeke eku feni.

¹¹ Hi yena la nga “ ‘ribye leri n'wina vaaki mi nga ri nyenya, leri kambe ri endliweke ribye lerikulu ra yinhla.’

¹² “Kutani ku ponisiwa a ku kumeki eka munhu un'wana, hikuva vanhu a va nyikiwanga vito rin'wana laha misaveni, ehandle ka vito ra Yesu, leri hi fanelaka ku ponisiwa ha rona.”

¹³ Loko va vona ku tiya ka Petro na Yohane, va hlamala, hikuva a va va tiva va ri vanhu ntsena, lava ni ku dyondza va nga dyondzangiki; kambe va swi vonile leswaku hileswi a va ri vanakulobye va khale va Yesu.

¹⁴ Kutani loko va vona munhu la hanyisiweke a yimile kwalaho na vona, va pfumala lexi va nga xi kanetaka.

¹⁵ Kuteloko va va lerisile ku huma ehubyeni ya Sanedri, va vutisana, va ku:

¹⁶ “Xana hi ta endla yini hi vanhu lava xana, hikuva swi tiveka hinkwako eYerusalema leswaku hi vona lava endleke mahlori lamakulu lawa; a hi koti ku swi kaneta.

¹⁷ Kambe ku endlela leswaku timhaka leti ti nga yi emahlweni ti hangalaka evanhwini, a hi va layeni hi va chavisa, leswaku va nga ha tshami va vulavula hi vito rero, hambi ku ri ka mani na mani.”

¹⁸ Kuteloko va va vitanile, va va lerisa leswaku va nga ha tshuki va vulavula hi vito ra Yesu, hambi ku ri ku dyondzisa ha rona.

¹⁹ Kambe Petro na Yohane va va hlamula, va ku: “A ku avanyise n'wina: Xana swi lulamile emahlweni ka Xikwembu ku yingisa n'wina ku tlula xona xana?

²⁰ Loko hi ri hina, hi nga ka hi nga koti ku tshika ku vula leswi hi swi voneke ni leswi hi swi tweke.”

²¹ Hiloko va huvo va va ntshunxa, va ri karhi va engeta ku va laya ni ku va chavisa; a va nga voni hilaha va nga va baka hakona, hikuva vanhu hinkwavo a va dzunisa Xikwembu hikwalaho ka leswi humeleleke;

²² naswona munhu loyi mahlori ya ku hanyisiwa ma endliweke eka yena, a a ri wa malembe lama tlulaka 40.

Vakriste va kombela ku tiyisiwa va nga chavi nchumu

²³ Kuteloko Petro na Yohane va ntshunxiwile, va tlhelela eka vanakulobye, kutani va va tivisa hinkwaswo leswi vaprista lavakulu ni vakulukumba va nga va byela swona.

²⁴ Loko vona va swi twile, va huwelela eka Xikwembu hi ku khongela va ri mbilu yin'we, va ku: “N'wini wa hina, wena la endleke tilo ni misava ni lwandle, ni hinkwaswo leswi nga ka swona!

²⁵ U vurile hi Moya lowo Kwetsima, hi nomo wa tata wa hina Davhida nandza wa wena, u ku: “ ‘Xana vamatiko va kariha-karihela yini, ni matiko ma bohela yini makungu ya hava xana?

²⁶ Tihosi ta misava ti pfukile, ni vafumi va matiko va twananile ku lwa na Hosi ni Mesiya wa yona.’

²⁷ “Hikuva kunene Heroda, na Pontiyo Pilato, ni vamatiko, ni tinxaka ta Israele, va hlangene kun'we emutini lowu ku lwa na Yesu nandza wa wena la hlawulekeke, loyi u nga n'wi endla Mesiya;

²⁸ va hlangene ku endla hinkwaswo leswi u swi boheke khale, hi ntamu wa wena ni makungu ya wena, leswaku swi ta humelela.

²⁹ Sweswi ke Hosi, languta ku tshukisa ka vona, u nyika malandza ya wena ku vula rito ra wena va tiyile va nga chavi nchumu;

³⁰ tshambuluta voko ra wena ku horisa, u endla leswaku mahlori ni swihlamariso swi va kona hi vito ra Yesu, nandza wa wena la hlawulekeke.”

³¹ Kuteloko va hetile ku khongela, xivandla lexi va hlengeletaneke ka xona xi tsekatseka, hinkwavo va tala hi Moya lowo Kwetsima, kutani va vula rito ra Xikwembu va tiyile.

Vapfumeri a va avelana hinkwaswo

³² Nhlengeletano ya lava pfumeleke a yi ri mbilu yin'we ni moya wun'we; a ku nga ri na munhu ni un'we loyi a a vula leswaku swilo leswi a nga na swona hambi xi ri xin'we xa swona, i swa yena ntsena; kambe swilo hinkwaswo a va ku, i swa vona hinkwavo.

³³ Vaapostola a va tiyisa hi matimba lamakulu vumbhoni bya ku pfuka ka Hosi Yesu eku feni; kutani hinkwavo a va fundzhiwa ngopfu.

³⁴ A ku nga ri na xisiwana exikarhi ka vona, hikuva hinkwavo lava a va ri ni masimu, kumbe tindlu, a va swi xavisa, kutani va tisa leswi va swi kumeke hi ku xavisa,

³⁵ va swi veka emahlweni ka vaapostola; kutani va pambulela un'wana ni un'wana hi ku ya hi ku pfumala ka yena.

³⁶ Hi mukhuva lowu Yosefa, Mulevhi la tswariweke eKipra, loyi vaapostola a va ku i Barnaba (hileswaku “La tiyisaka van'wana”),

³⁷ a a ri ni nsimu. A yi xavisa, kutani a tisa nxavo wa yona, a wu veka emilengeni ya vaapostola.