Timhaka 27 - BIBELE Mahungu Lamanene

Ta Pawulo loko a ya eRhoma hi ngalava

¹ Kuteloko ku tsemiwile leswaku hi ta ya le Italiya hi ngalava, va nyiketa Pawulo ni vabohiwa van'wana eka ndhuna ya dzana ra masocha leyi a va ku i Yuliyo, ya ntlawa lowu vuriwaka “wa hosi leyikulu”.

² Kuteloko hi nghenile engalaveni yo huma eAdramita, leyi a yi fanela ku kongoma matlhelo ya tiko ra Asiya, hi suka hi ri na Aristarka wa le Tesalonika, etikweni ra Makedoniya.

³ Hi siku leri tlhandlamaka, hi fika eSidoni; kutani Yuliyo a endlela Pawulo tintswalo, a n'wi pfumelela ku ya vona vanakulobye ni ku longeriwa hi vona.

⁴ Kuteloko hi suka kona, hi famba hi nxaxeko wa xihlale xa Kipra, hikuva ngalava a yi siveriwa hi mheho.

⁵ Kuteloko hi perile lwandle ra Kilikiya ni ra Pamfiliya, hi fika eMira, etikweni ra Likiya.

⁶ Kutani ndhuna yi kuma kona ngalava yo huma le Aleksandriya leyi yaka le Italiya, kutani yi hi nghenisa ka yona.

⁷ Hi masiku layo tala hi famba hi ku nonoka, kutani swi hi nonon'hwela swinene ku fika kusuhi na Kinida; leswi mheho a yi hi sivela ku ya emahlweni etlhelweni rero, hi tingawuka xihlale xa Kreta hi le hansi, hi tlhelo ra Salmona.

⁸ Kuteloko hi lulamile ni ribuwu hi ku nonon'hweriwa swinene, hi fika exivandleni xin'wana lexi va nge i “Hlaluko-ro-Saseka”, kusuhi ni muti wa Lasiya.

⁹ Hi heta masiku layo tala kona, ku ko ku fika nkarhi lowu swi chavisaka ku famba elwandle, hikuva siku lerikulu ra ku titsona swakudya a ri hundzile. Kavaloko Pawulo a va tsundzuxa,

¹⁰ a ku: “Vavanuna, ndza swi vona leswaku riendzo leri ra ngalava ri ta va ni mhangu ni ku lahleka lokukulu, ku nga ri ka mindzhwalo ni ka ngalava ntsena, kambe ni ka vutomi bya hina.”

¹¹ Hambiswiritano, ndhuna yi yingisa mufambisi wa ngalava ni n'wini wa yona ku tlula leswi vuriwaka hi Pawulo.

¹² Leswi hlaluko leri a ri nga lulamelanga ku heta vuxika eka rona, lavo tala va hina va anakanya ku suka kona ni ku ringeta ku ya xwa vuxika le Fenikisi, ri nga hlaluko ra Kreta, leri langutanaka ni vupeladyambu bya dzonga ni vupeladyambu bya n'walungu.

Ta xidzedze elwandle

¹³ Kuteloko mheho ya le dzongeni yi sungurile ku hunga khwatsi, va anakanya leswaku makungu ya vona ma ta endlakala, kutani va suka, va lulama ni ribuwu ra Kreta.

¹⁴ Kambe ku nga ri kungani, ku pfuka, exihlaleni, mheho ya xidzedze leyi va nga i Yurakuloni.

¹⁵ Ngalava yi khomiwa hi mheho, yi tsandzeka ku yi hlula, kutani hi yi tshika yi khukhuriwa hi mati.

¹⁶ Kuteloko hi hundzile edzongeni wa xihlalenyana xin'wana lexi va nge i Kawuda, hi koka byatso hi byi nghenisa engalaveni hi ku nonon'hweriwa swinene;

¹⁷ loko vatluti va byi kokile, va lunghisa ngalava hi ku yi boha ehansi hi mapindza; kutani hi ku chava ku nkhinsa esaveni ra Siriti, va phutsa matsanga, kutani hi mukhuva wolowo va tlhela va khukhuriwa hi magandlati.

¹⁸ Loko ri xa, a hi biwa ngopfu hi xidzedze; hikokwalaho va cukumeta mindzhwalo ya ngalava elwandle.

¹⁹ Kutani hi siku ra vunharhu, va cukumeta swigotso swa ngalava elwandle, hi mavoko ya vona vinyi.

²⁰ Hi masiku layo tala dyambu a ri nga ha vonaki, hambi ti ri tinyeleti; xidzedze a xi ya emahlweni xi hi ba hi matimba, hi nga ha tshembi nikutsongo leswaku hi ta pona.

²¹ Leswi a ku ri khale va nga dyanga nchumu, Pawulo a yima exikarhi ka vona, a ku: “Loko onge mi ndzi yingisile, vavanuna, mi nga sukanga eKreta, ingi mhangu leyi ni ku lahleka loku swi nga humelelanga.

²² Kambe sweswi ndza mi khongotela leswaku mi tiyisa timbilu, hikuva a ku na un'we wa n'wina loyi a nga ta lahlekeriwa hi vutomi bya yena; i ngalava ntsena leyi nga ta lova.

²³ Ntsumi ya Xikwembu lexi ndzi nga nandza wa xona, lexi ndzi xi gandzelaka, yi tikombisile ka mina evusikwini lebyi,

²⁴ yi ku: ‘Pawulo, u nga tshuki u chava, hikuva u fanele ku ya yima emahlweni ka Khezari; kutani tiva leswaku Xikwembu xi ku nyikile vanhu hinkwavo lava fambaka na wena engalaveni, leswaku u va ponisa.’

²⁵ Hikokwalaho vavanuna, tiyisani timbilu, hikuva ndzi ni ku tshemba eka Xikwembu leswaku swi ta va hilaha ndzi byeriweke hakona.

²⁶ Ntsena hi ta ya hi ya cukumetiwa exihlaleni xin'wana.”

Ta ngalava loko yi tshoviwa hi magandlati

²⁷ A byi ri vusiku bya vu-14, loko hi ri karhi hi dlita-dliteka elwandle ra Adriya; exikarhi ka vusiku vatluti va anakanya leswaku hi tshinelerile kusuhi ni ribuwu rin'wana.

²⁸ Loko va pima ku enta ka mati, va kuma mpimo wa 37 m; emahlweninyana va tlhela va pima, va kuma mpimo wa 28 m.

²⁹ Kutani hi ku chava ku ya ba maribye ya le ribuwini, va hoxa mune wa tinsoma enyalweni; kutani va langutela ku xa.

³⁰ Kambe vatluti lava va ringeta ku baleka va huma engalaveni; va nembeleta byatso elwandle, va endla wonge hi loko va lava ku ya hoxa tinsoma enkondzweni wa ngalava.

³¹ Kutani Pawulo a ku ka ndhuna ni ka masocha: “Loko vanhu lava va nga tshami engalaveni, a mi nga poni.”

³² Kavaloko masocha ma tsema mapindza ya byatso, ma byi tshika byi wela ematini.

³³ Kuteloko ri ya eku xeni, Pawulo a va khongotela hinkwavo ku dya swakudya, a ku: “Namuntlha i siku ra vu-14, mi ri karhi mi langutela ntsena, mi titsona mi nga dyi nchumu.

³⁴ Ndza mi khongotela ku dya xanchumu; swa laveka, loko mi rhandza ku pona; hikuva a ku na un'we wa n'wina loyi a nga ta lahlekeriwa hi nsisi wa nhloko ya yena hambi wu ri wun'we.”

³⁵ Loko a vurile sweswo, a teka xinkwa, a nkhensa Xikwembu emahlweni ka vona hinkwavo, a phema, a sungula ku dya.

³⁶ Kutani hinkwavo va tiyisa timbilu, va dya swakudya na vona.

³⁷ Loko ku hlayiwa hinkwavo lava a va ri engalaveni, ku kumeka leswaku a hi ri vanhu va 276.

³⁸ Loko va hetile ku dya va xurhile, va vevukisa ngalava hi ku cukumeta ndzhwalo wa mavele elwandle.

³⁹ Loko ri xile, vatluti a va tivanga misava ya kona leswaku hi yihi; kambe loko va vona nsonga lowu nga ni ribuwu, va lava ku yisa ngalava kona, loko va swi kota.

⁴⁰ Kuteloko va tsemile tinsoma, va ti tshika ti wela elwandle, va ri karhi va ntshunxa tinketani ta swihendzulo; kutani va vamba tsanga ra le nkondzweni, va rhiya mheho, va kongoma eribuwini.

⁴¹ Kambe va ya ba xitsunga xa sava ematini, kutani ngalava yi nkhinsa kona; nkondzo wa yona wu khomiwa hansi, wu nga ha tsekatseki; kambe nyalo yi sungula ku tshoviwa hi matimba ya magandlati.

⁴² Kavaloko masocha ma tilunghisela ku dlaya vabohiwa, hi ku chava leswaku un'wana wa vona a nga tshuka a balekile hi ku hlambela ematini.

⁴³ Kambe ndhuna a yi lava ku ponisa Pawulo, kutani yi sivela masocha ku endla sweswo; yi lerisa leswaku hinkwavo lava tivaka ku hlambela, va rhanga va tihoxa ematini, va ya humelela esaveni;

⁴⁴ van'wana yi va byela ku tipfuna hi timhandze, van'wana hi swimpombondzwana swa ngalava; kutani hi mukhuva wolowo va fika eribuwini, va ponile hinkwavo.