Timhaka 24 - BIBELE Mahungu Lamanene

Ta nandzu lowu Pawulo a mangaleriwaka ha wona

¹ Loko ku hundzile ntlhanu wa masiku, Ananiya Muprista lonkulu a rhelela, a ri ni vakulukumba van'wana ni xivulavuri xin'wana lexi a va ku i Tertulo; kutani va ya ehosini ku ya mangalela Pawulo.

² Va vitana Pawulo, kutani Tertulo a sungula ku n'wi mangalela, a ku: “Wena Felikisi la chavisekaka! Leswi hi kumeke ku rhula loku hetisekeke hikwalaho ka wena, ni leswi timhaka ta tiko leri ti lulamisiwaka namuntlha hi ku tikarhata ka wena,

³ hina hi amukela swilo leswi hi ku nkhensa lokukulu, hinkwako ni minkarhi hinkwayo.

⁴ Kambe a ndzi lavi ku ku onhela nkarhi; hikokwalaho ndza ku khongela leswaku, hi vunene bya wena, wa nga hi lombanyana tindleve nkarhinyana.

⁵ Hi kumile leswaku munhu loyi ú vanga mpfilumpfilu. Ú pfuxa madzolonga exikarhi ka Vayuda hinkwavo lava akeke kwihi na kwihi emisaveni; hi yena la nga nhloko ya dyondzo yo hambuka ya Vanazarene.

⁶ Naswona, ú ringetile ku nyamisa Tempele. Hi n'wi khomile, [kutani a hi lava ku n'wi avanyisa hi nawu wa hina;

⁷ kambe Lisiya, ndhuna ya nyimpi, ú tile a hi vutlela yena hi matimba lamakulu,

⁸ kutani ú lerisile vamangaleri va yena leswaku va ta emahlweni ka wena.] Loko u n'wi vutisisa, u ta ti twa hi yena, timhaka hinkwato leti hi n'wi mangalelaka ha tona.”

⁹ Na vona Vayuda va yima na Tertulo, va tiyisa, va ku: “Kunene swi tano.”

Ta Pawulo loko a tihlamulela emahlweni ka Felikisi

¹⁰ Hosi yi koweta Pawulo leswaku a vulavula; kutani yena a hlamula, a ku: “Leswi ndzi tivaka leswaku ku ni malembe u ri muavanyisi wa tiko leri, ndzi ta tihlamulela ndzi tsakile.

¹¹ U nga swi kuma hi wexe: A ku si hundza masiku ya 12 hi mpfhuka ndzi fika eYerusalema ku ta gandzela kona.

¹² Vayuda a va ndzi kumanga ndzi ri la hlamulanaka ni munhu eTempeleni, kumbe la hlohlotelaka vanhu emasinagogeni ni le mutini.

¹³ Naswona a va koti ku humesa vumbhoni bya timhaka leti va ndzi mangalelaka ha tona sweswi.

¹⁴ A ndzi ku fihleli leswaku ndzi tirhela Xikwembu xa vatatana hi ndlela leyi va yi vulaka leswaku yi hambukile; kambe ndzi pfumela hinkwaswo leswi tsariweke eNawini ni ka Vaprofeta.

¹⁵ Leswi ndzi swi languteleke eka Xikwembu, hi swona leswi na vona va swi languteleke: hileswaku lavo lulama ni lava nga lulamangiki va ta pfuka eku feni.

¹⁶ Hikokwalaho ndzi ringeta hi matimba, masiku hinkwawo, ku kumeka ndzi ri la ntshunxekeke eripfalweni ra mina, emahlweni ka Xikwembu ne mahlweni ka vanhu.

¹⁷ “Ndzi vuyile eYerusalema endzhaku ka malembe layo talanyana, ku tisa swihanano eka tiko ra ka hina ni ku humesa magandzelo.

¹⁸ Va ndzi kumile eTempeleni ndzi ri karhi ndzi tirha swilo leswi, ndzi ri la tibasiseke hi nawu; a ku ri hava ntshungu kona, a ku nga pfukanga dzolonga.

¹⁹ Kambe Vayuda van'wana va tiko ra Asiya a va ri kona. Ingi va tile sweswi emahlweni ka wena ku ta ndzi mangalela, loko ku ri ni mhaka exikarhi ka vona na mina.

²⁰ Na vona lava nga kwala a va vule xiendlo lexo biha lexi va xi kumeke ka mina, siku ndzi yimeke ehubyeni;

²¹ va nga vilela hi xilo xin'we ntsena lexi ndzi nga huwelela ha xona exikarhi ka vona, loko ndzi te: ‘Ndzi avanyisiwa hi n'wina namuntlha hikwalaho ka ku pfuka ka vafi.’ ”

Ta Pawulo loko a siyiwa ekhotsweni

²² Leswi Felikisi a a tiva leswo talanyana hi tlhelo ra Ndlela ya Hosi, a pfala huvo, a ku: “Loko Lisiya, ndhuna ya nyimpi, a ta va a rhelerile a fika haleno, hi kona ndzi nga ta kambisisa mhaka ya n'wina.”

²³ Kutani a lerisa ndhuna ya dzana ra masocha ku hlayisa Pawulo ekhotsweni, a ku: “Mi n'wi nyika ku ntshunxekanyana, mi nga siveli ni un'we wa vanakulobye ku ta n'wi pfuna hi swin'wana.”

²⁴ Loko ku hundzile masiku ma nga ri mangani, Felikisi a ta a ri na Drusila, nsati wa yena loyi a a ri Muyuda; kuteloko a vitanile Pawulo, a n'wi yingisela loko a vulavula hi ta ku pfumela eka Kriste Yesu.

²⁵ Kambe loko Pawulo a vulavula hi ta ku lulama, ni ta ku tikhoma, ni ta ku avanyisiwa loku nga ta ta, Felikisi a khomiwa hi ku chava, a hlamula, a ku: “Namuntlha, famba u ya tshama; siku ndzi kumaka nkarhi, ndzi ta tlhela ndzi ku vitana.”

²⁶ Kambe hi tlhelo rin'wana a a ri ni xitshembo xa leswaku Pawulo ú ta n'wi nyika mali; hikokwalaho a a tala ku rhuma vanhu va ya n'wi vitana, leswaku a ta vulavula na yena.

²⁷ Kambe loko ku hundzile malembe mambirhi, Porkiyo Festo a vekiwa hosi ematshan'wini ya Felikisi; kasi Felikisi a a siyile Pawulo ekhotsweni, hikuva a a navela ku nkhensiwa hi Vayuda.