Timhaka 18 - BIBELE Mahungu Lamanene

Ta Pawulo loko a ri eKorinto

¹ Endzhaku ka sweswo Pawulo a suka eAtena, a ya eKorinto.

² Emutini lowu, a kuma Muyuda un'wana loyi a va ku i Akwila, la velekiweke ePonto, loyi a a fikile hi le Italiya ku nga ri khale, a ri na Prisila nsati wa yena; hikuva hosi Klawudiyo a yi lerisile leswaku Vayuda hinkwavo va suka eRhoma. Pawulo a ya ka vona.

³ Kutani leswi a a ri wa ntirho lowu fanaka ni wa vona, a tshama na vona, a ri karhi a tirha; hikuva ntirho wa vona a wu ri wa ku rhunga matende.

⁴ Kutani, masiku hinkwawo ya Savata, Pawulo a a hlamulana ni lava a va ri esinagogeni, a ringeta ku khorwisa Vayuda ni Vagriki.

⁵ Loko Silasi na Timotiya va tile va huma le Makedoniya, Pawulo a tinyiketa ku dyondzisa Rito ntsena, a nga ha tirhi swin'wana; a tiyisa eka Vayuda leswaku Mesiya, hi yena Yesu.

⁶ Kambe loko vona va n'wi kaneta ni ku n'wi sandza, a phumunha ntshuri eswiambalweni swa yena, a ku ka vona: “Nandzu lowu, wu dlaya n'wina vini va wona; loko ndzi ri mina, ndzi humile ka wona; ku sukela sweswi, ndzi ta ya eka vamatiko.”

⁷ Hiloko a hambana na vona, a ya tshama ekaya ka wanuna un'wana loyi a va ku i Titiyo Yusto, munhu wo chava Xikwembu, loyi muti wa yena a wu vandzekene ni sinagoga.

⁸ Kambe Krispo, mufambisi wa sinagoga, a pfumela ka Hosi, a ri ni va ndyangu wa yena hinkwavo; na vona Vakorinto lavo tala, loko va twa Rito, va pfumela, va va va khuvuriwa.

⁹ Vusiku byin'wana Hosi yi humelela eka Pawulo hi xivono, yi ku ka yena: “U nga chavi; kambe vulavula, u nga miyeri,

¹⁰ hikuva ndzi na wena; a ku na munhu la nga ta ku pfukela, a ku endla leswo biha; hikuva ndzi ni vanhu lavo tala emutini lowu.”

¹¹ Kutani Pawulo a tshama kona lembe rin'we, ni tin'hweti ta 6, a ri karhi a dyondzisa rito ra Xikwembu exikarhi ka vona.

¹² Enkarhini lowu Galiyo a ri muyimeri wa vuhosi le Akaya, Vayuda va pfumelelana ku pfukela Pawulo, kutani va n'wi yisa ehubyeni,

¹³ va ku: “Munhu loyi ú khorwisa vanhu ku gandzela Xikwembu hi mukhuva lowu hambaneke ni Nawu.”

¹⁴ Loko Pawulo a ha lava ku hlamula, Galiyo a ku ka Vayuda: “N'wina Vayuda, loko ingi hi tenga mhaka yo homboloka leyi nga endliwa, kumbe ku kanganyisa kun'wana loko biha ngopfu, a swi ta ndzi boha ku amukela ku mangala ka n'wina;

¹⁵ kambe leswi ku kaneriwaka mhaka ya marito, ni ya mavito, ni ya Nawu wa ka n'wina, swi voneni hi n'wexe, hikuva mina a ndzi lavi ku va muavanyisi wa timhaka leto tano.”

¹⁶ Kutani a va hlongola ehubyeni.

¹⁷ Kavaloko hinkwavo va khoma Sostene, mufambisi wa sinagoga, kutani va n'wi ba emahlweni ka huvo; kambe Galiyo a a nga ri na mhaka na swona.

Ta Pawulo loko a tlhelela eAntiyoka

¹⁸ Kuteloko Pawulo a xwile eKorinto masiku layo tala, a lelana ni vamakwavo, a ya eSiriya hi ngalava, a ri na Prisila na Akwila. A suka a byewuriwile nhloko eKenikreya, hikuva a a tibohile hi ku hlambanya.

¹⁹ Va ya fika le Efesa, laha Pawulo a nga siya va Akwila kona; kutani a nghena esinagogeni, a hlamulana ni Vayuda.

²⁰ Vona va n'wi kombela leswaku a xwa na vona a hlwelanyana, kambe a nga pfumelanga.

²¹ Kutani a lelana na vona, a ku: “Ndzi ta tlhela ndzi vuya la ka n'wina, loko Xikwembu xi swi rhandza.” Kutani a suka le Efesa hi ngalava.

²² Kuteloko a fikile eKhezariya, a tlhandlukela eYerusalema, a xeweta kereke, kutani a rhelela a ya eAntiyoka.

²³ A tshama nkarhinyana kona, kutani a suka, a rhendzeleka hinkwako ematikweni ya Galatiya ni ya Frigiya, a ri karhi a tiyisa vadyondzisiwa hinkwavo.

Ta Apolosi loko a twarisa Rito le Efesa

²⁴ Muyuda un'wana loyi a va ku i Apolosi, a fika eEfesa. A a velekiwile le Aleksandriya, a ri wanuna wa matimba eku vulavuleni, la tivaka ngopfu Matsalwa.

²⁵ A a dyondzisiwile Ndlela ya Hosi; kutani, hi ku hiseka ka yena emoyeni, a a vula ni ku dyondzisa timhaka ta Yesu hi ndlela ya tona, hambileswi a a tiva nkhuvulo wa Yohane ntsena.

²⁶ A sungula ku vulavula esinagogeni, a nga chavi nchumu. Kuteloko Prisila na Akwila va n'wi twile, va n'wi rhurhela, va n'wi hlamusela swinene-nene Ndlela ya Xikwembu.

²⁷ Kambe leswi a a lava ku ya fika eAkaya, vamakwavo va seketela makungu ya yena, kutani va tsalela vadyondzisiwa, ku kombela leswaku va n'wi amukela. Loko a fikile ka vona, a pfuna ngopfu lava a va pfumerile hi ku tsakeriwa hi Xikwembu;

²⁸ hikuva, hi marito ya matimba, a a kanetana ni Vayuda erivaleni, a ri karhi a va komba hi Matsalwa leswaku Mesiya, hi yena Yesu.