Swivuriso 9 - BIBELE Mahungu Lamanene

Vutlhari ni vuphukuphuku

¹ Vutlhari byi tiakerile yindlu, byi dzima ni tiphuphu ta yona ta 7;

² byi tlhavile xifuwo, byi hlanganiserile vhinyo ya byona, byi andlalela ni tafula ra byona.

³ Vutlhari byi rhumile malandza ya byona, ma ya huwelela eswitsungeni swa muti, ma ku:

⁴ “N'wina hinkwenu mi kalaka mano, tanani haleno!” Loyi a nga ehleketiki swinene, vutlhari byi ku ka yena:

⁵ “Tana hi ta dya swin'we, hi nwa vhinyo leyi ndzi yi hlanganiseleke.

⁶ Hambana ni lavo pfumala vutivi, u ta hanya, tekelela mahanyelo ya lava twisisaka.”

⁷ Loyi a tsundzuxaka musandzi, ú tivangela ku rhuketeriwa, loyi a layaka munhu wo homboloka, ú tilavela timbanga.

⁸ Musandzi, u nga n'wi tshinyi, hikuva ú ta ku venga, tshinya loyi a tlhariheke, yena ú ta ku rhandza.

⁹ Tsundzuxa munhu loyi a tlhariheke, vutlhari bya yena byi ta engeteleleka, loyi a lulameke, n'wi dyondzise, a ta dyondza a ya emahlweni.

¹⁰ Masungulo ya vutlhari i ku chava HOSI Xikwembu, Muhlawuleki ú tiviwa hi loyi a twisisaka.

¹¹ Mina vutlhari ndzi ta engetela masiku ya ku hanya ka wena, u ta hanya malembe layo tala.

¹² Loko u tlharihile, swi ta pfuna wena n'wini, loko u sandza, hi wena u nga ta twa ku vava.

¹³ Vuphukuphuku byi fana ni wansati wa pongo ngopfu, wa mintirho ya manyala, loyi a nga nyumiki.

¹⁴ Ú tshama enyangweni ya yindlu ya yena, kumbe eswitsungeni swa muti,

¹⁵ a vitana vavanuna lava tihundzelaka hi ndlela, lava tiyelaka lomu va kongomeke kona, a ku:

¹⁶ “N'wina hinkwenu lavo-ke-mano, tanani haleno!” Loyi a nga ehleketiki swinene, wansati ú ri ka yena:

¹⁷ “Mati lama yiviweke, a hi ku nandziha ka wona, swakudya swa le xihundleni, swi tsakisa ngopfu.”

¹⁸ Vanhu a va swi tivi leswaku ka fiwa emutini wa wansati loyi, lava va n'wi endzeleke, va le xivandleni xa vafi.