Swivuriso 8 - BIBELE Mahungu Lamanene

Ku tidzunisa ka vutlhari

¹ Vutlhari bya huwelela, ku twala rito ra ku twisisa leri tlakukeke.

² Byi yima eswitsungeni etlhelo ka magondzo, ni le mahandzeni ya tindlela bya kumeka.

³ Byi ya ni le tindleleni leti nghenaka emutini, byi yima etlhelo ka tinyangwa, byi huwelela byi ku:

⁴ “N'wina vanhu hinkwenu, ndza mi rhamba, ndzi vitana un'wana ni un'wana wa n'wina.

⁵ N'wina mi kalaka mano, tlharihani, dyondzani ku anakanya, n'wina swiphunta.

⁶ Yingisani, hikuva ndzi ni mhaka ya ntikelo, leswi ndzi nga ta swi vula, swi tiyile.

⁷ Leswi humaka enon'wini wa mina i ntiyiso ntsena, eka mina swa yila ku vulavula leswo homboloka.

⁸ Hinkwaswo leswi ndzi swi vulaka swi lulamile, a ku na xin'we xa swona lexi gombonyokeke kumbe ku huma endleleni;

⁹ eka loyi a twisisaka, marito ya mina ma twala swinene, ni ka loyi a nga ni vutivi, ma le rivaleni.

¹⁰ Ematshan'wini ya silivhere, hlawula swiletelo swa mina, ni vutivi ematshan'wini ya nsuku lowunene,

¹¹ hikuva vutlhari byi tlula swilo swo bomba ha swona, hinkwaswo leswi munhu a swi lavaka swi nga ka swi nga byi tluli.

¹² “Mina vutlhari, ndzi pfula miehleketo, ndzi kumiwa hi loyi a nga ni vutivi ni mianakanyo leyinene.

¹³ Loyi a chavaka HOSI Xikwembu ú venga leswo biha. Ku tikurisa, ni ku tiarisa, ni mahanyelo layo biha, ni ku vulavula mavunwa, ndza swi venga.

¹⁴ Ndzi ni switsundzuxo ni mianakanyo leyinene, ku twisisa ni matimba i swa mina.

¹⁵ Tihosi ti fuma hi matimba ya mina, vafumi va veka milawu leyinene hikwalaho ka mina.

¹⁶ Hinkwavo lava fumaka hi ku lulama, hambi tindhuna kumbe varhangeri, va pfuniwa hi mina.

¹⁷ Ndzi rhandza lava va ndzi rhandzaka, lava fambaka va ndzi lava, va ndzi kuma.

¹⁸ Rifuwo ni ku dzuneka swi le ka mina, hi mina ndzi nga ni xuma lexi nga boriki ni minkateko.

¹⁹ Mihandzu leyi kumekaka eka mina yi ni nkoka ku tlula nsuku lowo tenga, ntshovelo lowu ndzi wu nyikaka wu tlula silivhere leyo saseka.

²⁰ Gondzo leri ndzi fambaka ha rona ri yisa eka leswo lulama, i ndlela leyi kongomaka emilawini leyinene.

²¹ Ndzi fumisa lava va ndzi rhandzaka, ndzi tata vuhlayiselo bya xuma xa vona.”

Vutlhari i bya khale

²² “HOSI Xikwembu xi rhangile xi endla mina xi nga si tumbuluxa nchumu, ndzi va ntirho wa xona wo sungula;

²³ ndzi nyikiwile xivumbeko khale ni misava yi nga si va kona.

²⁴ Mina ndzi velekiwile, xidziva lexikulu ni swihlovo leswi pfelelaka mati swi nga si tumbuluxiwa.

²⁵ Loko tintshava ni swintshabyana swi simekiwa, mina a ndzi velekiwile khale;

²⁶ ndzi vile kona HOSI Xikwembu xi nga si endla misava ni swimila, hambi ritshuri rinene a ri nga si va kona.

²⁷ Mina a ndzi ri kona loko HOSI Xikwembu xi vamba matilo, ni loko xi ba xirhendzevutana emakumu ka malwandle.

²⁸ A ndzi ri kona loko xi hayeka mapapa empfhukeni, ni loko swihlovo swa xidziva lexikulu swi sungula ku pfelela hi matimba.

²⁹ Loko HOSI Xikwembu xi bela lwandle ndzilekana leswaku mati ma nga tluli nawu wa xona, ni loko xi veka masungulo ya misava,

³⁰ mina a ndzi lo gèè, etlhelo ka xona, ku fana ni n'wana, masiku hinkwawo a ndzi xi tsakisa, ndzi tihuhela emahlweni ka xona.

³¹ A ndzi tiphina emisaveni ya xona, ndzi titsakela ni vanhu hinkwavo.

³² “N'wina vana, ndzi yingiseni: Ku katekile lava hlayisaka switsundzuxo swa mina.

³³ Yingisani swiletelo, mi ta tlhariha, mi nga tshuki mi swi ba hi makatla.

³⁴ Ku katekile munhu loyi a ndzi yingisaka, loyi a tshamaka a langutile enyangweni ya mina, a nghena emutini wa mina minkarhi hinkwayo.

³⁵ Loyi a ndzi kumeke, ú kumile vutomi, kutani HOSI Xikwembu xi ta n'wi tsakela;

³⁶ kambe loyi a nga ndzi kumiki, wo tivavisa, hinkwavo lava va ndzi vengaka, vo lava rifu.”